ސިއްހީ ނުރައްކަލުގެ ހާލަތުގައި އޮތަސް، އިންތިޚާބު ބޭއްވޭ ގޮތަށް ގާނޫނު އިސްލާހުކުރަން ހުށަހަޅައިފި

ސިއްހީ ކުއްލި ނުރައްކަލުގެ ހާލަތު ދެމިއޮތަސް، ލޯކަލް ކައުންސިލް އިންތިޚާބު ބޭއްވޭ ގޮތަށް އެ އިންތިޚާބާ ބެހޭ ޚާއްސަ ގާނޫނަށް އިސްލާހު ގެންނަން ރައްޔިތުންގެ މަޖިލީހަށް ހުށަހަޅައިފި އެވެ.

ކޮވިޑް-19 އާ ގުޅިގެން އިއުލާންކުރި ސިއްހީ ކުއްލި ނުރައްކަލުގެ ހާލަތުގެ ސަބަބުން، މިދިޔަ އަހަރު ބާއްވަން އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްގީ އަށް މަސައްކަތްކުރާ ކޮމެޓީތަކުގެ އިންތިޚާބު މަޖިލީހުން ފާސްކުރި އިންތިޚާބާ ބެހޭ ޚާއްސަ ގާނޫނަކުން އެއް އަހަރަށް ކުރިން އޮތީ ފަސްކޮޮށްފަ އެވެ. އެ ގާނޫނު އޮންނަ ގޮތުން އިންތިޚާބު ބޭއްވޭނީ ސިއްހީ ނުރައްކަލުގެ ހާލަތު ނިމުމަކަށް އައުމުންނެވެ. އެކަމަކު އަނެއްކާވެސް އިތުރު އެއް މަހަށް އެ ހާލަތު ވަނީ އިތުރުކޮށްފަ އެވެ.

ސިއްހީ ކުއްލި ނުރައްކަލުގެ ހާލަތު ދެމިއޮތަސް، އިންތިޚާބު ބޭއްވޭނެ ގޮތް ގާނޫނު އިސްލާހުކުރަން މަޖިލީހަށް ބިލެެއް ހުުށަހެޅުއްވީ ސަރުކާރުގެ ފަރާތުން ހުޅުމާލޭ ދާއިރާގެ މެމްބަރު އަލީ ނިޔާޒެވެ. އޭނާ ހުށަހެޅުއްވީ އެ އިސްލާހު ތަސްދީގު ކުރާތާ ހަތް ދުވަހުގެ ތެރޭގައި އިންތިޚާބުގެ މަސައްކަތްތައް ފަށަން ޖެހޭ ގޮތަށެވެ.

އެހެން ނަމަވެސް ސިއްހީ ކުއްލި ނުރައްކަލުގެ ހާލަތުގައި އިންތިޚާބުގެ ކަންކަން ކުރިއަށް ގެންދަން ޖެހޭނީ ޑިރެކްޓާ ޖެނެރަލް އޮފް ޕަބްލިކް ހެލްތު ކަނޑައަޅާ މިންގަނޑުތަކާ އެއްގޮތަށް ކަމަށް އެ ބިލުގައިވެ އެވެ.

މީގެ އިތުރުން އެ އިސްލާހު ފާސްކުރަން ދައުރުން ބޭރުން ޚާއްސަ ޖަލްސާއެއް ބާއްވަން ވެސް އޭނާ ވަނީ މަޖިލީހުގެ ރައީސް މުހައްމަދުގެ ނަޝީދުގެ ކިބައިން އެދިވަޑައިިގެންފަ އެވެ.