ނޯރާ "އޭބީސީޑީ 3" އަށް

މަޝްހޫރު ކޮރިއޮގްރާފަރު ރެމޯ ޑި ސޫޒާ ޑައިރެކްޓްކޮށް ގެނެސްދޭ ޑާންސް ފިލްމު ސީރީޒް އެބީސީޑީ (އެނީބަޑީ ކޭން ޑާންސް) ގެ ތިން ވަނަ ފިލްމަށް ތައްޔާރުވަމުން އަންނަ ކަމަށް މިދިޔަ ހަފުތާގައި ބުނެފައި ވަނިކޮށް، އެ ފިލްމުގެ ލީޑް ރޯލަށް ނޯރާ ފަތެހީ ސޮއިކޮށްފައިވާ ކަމަށް ރިޕޯޓްތައް ބުނެފި އެވެ.

މިދިޔަ އަހަރު ރެމޯ ގެނެސްދިން "ސްޓްރީޓް ޑާންސާ" ގައި ވެސް ރޯލެއް ކުޅުނު ހުނަރުވެރި ނެށުންތެރިޔާ ރެމޯގެ އާ ފިލްމަށް ސޮއިކުރި ވާހަކަ މީޑިއާތަކުން ތިލަކޮށްފައި މި ވަނީ މި ހަފުތާގެ ކުރީކޮޅު އެ ދެ މީހުން ބައްދަލުކުރަނިކޮށް ނަގާފައިވާ ފޮޓޯތަކެއް ވެސް އާންމުވެފައި ވަނިކޮށެވެ. އެ ފޮޓޯތަކުގައި ފެންނަނީ ރެމޯ އާއި ނޯރާ ހިނިތިވުންވެ ތިބެ، ފޮޓޯގްރާފަރުންނަށް ހަނާއަޅާ ތަނެވެ.

ރެމޯ މިދިޔަ ހަފުތާގައި ބުނިގޮތުގައި "އޭބީސީޑީ 3" ހަދާނީ ވަރުގަދަ ނެށުންތެރިއަކު ލީޑަށް ލައިގެންނެވެ. އެހެންވެ ފިލްމަށް ނޯރާ ސޮއިކުރި ކަމަށް ބުނާ ވާހަކަ ކަށަވަރު ވާހަކައަކަށްވެއްޖެ ނަމަ މި ފިލްމަށް ކުރެވޭ އުންމީދުތައް ވަރަށް ވެސް ބޮޑުވާނެ އެވެ. "އޭބީސީޑީ" ގެ ކުރީގެ ދެ ފިލްމު ގެނެސްދީފައި ވަނީ ފިރިހެނުން ނެށުންތެރިން ލީޑްކުރާ ފިލްމުތަކެއްގެ ގޮތުގައި ކަމަށް ވިޔަސް "އޭބީސީޑީ 3" ގެ ޕްލޮޓް އަންހެން ނެށުންތެރިއަކަށް ހާއްސަވާނެ ކަމަށް ބެލެވެ އެވެ.

ނޯރާ އަކީ މި ވަގުތު ބޮލީވުޑްގައި ނެށުމަށް އެންމެ އަރާހުރި ފަންނާނެވެ. އޭނާގެ ހުނަރު މިހާތަނަށް އެތައް ލަވައަކުން ދައްކާލާފައިވާ އިރު "ސްޓްރީޓް ޑާންސާ" ގައި ހިމެނުނު ނޯރާގެ ލަވަ "ގަރުމީ" އަކީ މިދިޔަ އަހަރު އެންމެ ގިނަ ބަޔަކު އެ ލަވައެއްގެ ސްޓެޕްތައް އެންމެ ބޮޑަށް ޖެއްސި ލަވަ އެވެ.

ޕްރަބޫދޭވާ ލީޑަށް ލައިގެން ރެމޯ "އޭބީސީޑީ" ގެނެސްދިނީ 2013 ގަ އެވެ. އަދި ވަރުން ދަވަނާއި ޝްރަދާ ކަޕޫރާ އެކު "އޭބީސީޑީ 2" ގެނެސްދިނީ 2015 ގަ އެވެ. "ސްޓްރީޓް ޑާންސާ" ގެ ލީޑް ކުޅުނީ ވެސް އެ ދެ ތަރިންނެވެ.

"އޭބީސީޑީ 3" އަށް ތައްޔާރުވާ ވާހަކަ ރެމޯ ބުންޏަސް ފިލްމުގެ މަސައްކަތް ފަށާނެ އިރެއް އަދި އިއުލާނެއް ނުކުރެ އެވެ. އޭނާ ވަނީ ދާދި ފަހުން ހާޓްއެޓޭކެއް ޖެހިގެން ބޮޑު އޮޕަރޭޝަނެއް ވެސް ކޮށްފަ އެވެ.

ނޯރާ، 29، ގެ ކުރިއަށް އޮތް އެއް ފިލްމަކީ އަޖޭ ދޭވްގަންގެ "ބޫޖް: ދަ ޕްރައިޑް އޮފް އިންޑިއާ" އެވެ. މި ތާރީހީ ހަނގުރާމަ ފިލްމުގެ ކާސްޓްގައި ސަންޖޭ ދަތާއި ސޮނާކްސީ ސިންހާ ވެސް ހިމެނެ އެވެ.