މަލީހް ވަކިކުރުމުން ޑރ. ޖަމީލް: ހައްގު ބަސް ބުނުމަކީ އާއިލީ ތަރުބިއްޔަތެއް

އިތުބާރު ނެތްކަމުގެ ވޯޓު ނަގައި މިއަދު މަގާމުން ދުރުކުރި ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލަކީ "ނަމޫނާއެއް" ކަމަށް، އޭނާގެ ދެބެންގެދެދަރި ބޭފުޅެއް ކަމަށްވާ އަދި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.

ޖުމްހޫރީ ޕާޓީގެ ސްލޮޓެއްގައި ކޮމިއުނިކޭޝަންސް މިނިސްޓަރަކަށް ހުންނަވަނިކޮށް މަލީހްގެ އިތުބާރު ނެތްކަމުގެ ވޯޓެއް ނަގައި، މަގާމުން ދުރުކުރީ އެމްޑީޕީން ރައްޔިތުންގެ މަޖިލީހަށް ހުށަހަޅައިގެންނެވެ.

މަލީހް ވަކިކުރަން މަޖިލީހުން ފާސްކުރުމުން ޑރ. ޖަމީލް އޭނާގެ ފޭސްބުކްގައި، މަލީހުގެ އެއްބަނޑުއެއްބަފާ ބައެއް ބޭފުޅުންނާ އެކު ނެންގެވި ފޮޓޯއައަކާ އެކު ލިޔުއްވީ "އެ އާއިލާއަކީ މައިންބަފައިންގެ ތަރުބިއްޔަތާ އެކު އިލްމާއި ހުނަރު ހޯދަން ގިނަ މަސައްކަތްތަކެއް ކުރާ ޒުވާނުންތަކެއް ހިމެނޭ އާއިލާއެއް" ކަމަށެވެ. މަލީހަކީ ނަމޫނާ އަދި ހުނަރުވެރި ބޭފުޅެއް ކަމަށާއި ސިޔާސީ މަސައްކަތުގައި ހައްގު ބަސް ވިދާޅުވުމަކީ އެ ބޭފުޅުންނަށް ލިބިވަޑައިގެންފައިވާ ތަރުބިއްޔަތެއް ކަމަށް ވެސް ޑރ. ޖަމީލް ލިޔުއްވި އެވެ.

"ސިޔާސީ މަސައްކަތުގައި އަބަދުވެސް ހައްގު ގޮތް، ހައްގު ބަސް ޚިޔާރު ކުރުމަކީ އަޅުގަނޑުމެންގެ ތަރުބިއްޔަތުގެ ބައެއް،" ޑރ. ޖަމީލް ވިދާޅުވި އެވެ.

އިތުބާރު ނެތްކަމުގެ ވޯޓަކުން މަގާމު ގެއްލިވަޑައިގެންނެވި މި ސަރުކާރުގެ ފުރަތަމަ މިނިސްޓަރަށް މަލީހު ވެވަޑައިގަތީ، 59 މެމްބަރުންގެ ވޯޓުންނެވެ.

މަލީހާ ދެކޮޅަށް އެމްޑީޕީން ވޯޓު ނެގިއިރު އަދި މިހާތަނަށް ވެސް، ރައީސް އިބްރާހިމް މުހައްމަދު ސޯލިހު، އެއްވެސް ބަހެއް ވިދާޅެއްނުވެ އެވެ.

ޑރ. ޖަމީލަށް ނައިބު ރައީސްކަން ގެއްލިވަޑައިގަތީ ވެސް މަޖިލިހުގައި ނެގި އިތުބާރު ނެތްކަމުގެ ވޯޓަކުންނެވެ. ކުރީގެ ރައީސް އަބްދުﷲ ޔާމީންގެ ފުރަތަމަ ނައިބު ރައީސަކަށް ހުންނެވި ޑރ. ޖަމީލްގެ އިތުބާރު ނެތްކަމަށް ވޯޓު ނެގީ އޭރު މަޖިލިސް ކޮންޓްރޯލްކުރި ޕީޕީއެމް ކޯލިޝަންގެ މެމްބަރުންގެ އިތުރުން އެމްޑީޕީގެ ބައެއް މެމްބަރުން ވެސް ވޯޓު ދެއްވައިގެންނެވެ.

މިހާރު ޖަލުގައި ހުންނެވި ޔާމީންގެ ދިފާއުގައި އެންމެ ބޮޑަށް ވަކާލާތުކުރައްވާ ޑރ. ޖަމީލް ވަނީ، އެ މަނިކުފާނުގެ އިތުބާރު ނެތްކަމުގެ ވޯޓަކީ ގާނޫނުއަސާސީއާ ހިލާފު ކަމެއް ކަމަށް ވިދާޅުވެ، ސުޕްރީމް ކޯޓަށް މައްސަލަ ލައްވައިފަ އެވެ.