އަމީތާބާ އެކު މަސައްކަތްކޮށްލެވުމަކީ ބޮޑު ކާމިޔާބީއެއް: އިމްރާން ހާޝިމީ

ފިލްމެއްގައި އަމީތާބް ބައްޗަންއާ އެކު މަސައްކަތްކުރެވުމަކީ ލިބުނު ވަރަށް ބޮޑު ކާމިޔާބީއެއް ކަމަށާއި އެކަން ހަނދާނުން ނުފިލާނެ ކަމަށް އިމްރާން ހާޝިމީ ބުނެފި އެވެ.

އަންނަ މަހުގެ 9 ގައި ރިލީޒްކުރާ މިސްޓްރީ ތުރިލާ "ޗެހެރޭ" އަކީ އަމީތާބާއި އިމްރާންގެ ކުރިމަތިލުންތަކެއް ފެނިގެންދާނެ ފިލްމެކެވެ. އެ ފިލްމުގެ ތަޖުރިބާ ހިއްސާކުރަމުން އިމްރާން ބުނީ އެންމެ ބޮޑު އުފަލަކީ އަމީތާބް ފަދަ އިންޑިއާގެ ވަރުގަދަ ލެޖެންޑަކާ އެކު ސްކްރީން ހިއްސާކޮށްލަން ފުރުސަތު ލިބުން ކަމަށެވެ.

"ވަރަށް ގިނަ ދުވަހު އުންމީދުކޮށްގެން ހުއްޓައި ލިބުނު ފުރުސަތެއް ޗެހެރޭގައި އަމީތާބާ އެކު މަސައްކަތްކުރަން ލިބުމަކީ. ވަރަށް އުފާކުރަން އެ އުންމީދު މިހާރު ހަގީގަތަކަށްވެފައިވާތީ،" މާޑާ އާއި ރާޒް ސީރީޒްގެ ފިލްމުތައް ކުޅެފައިވާ އެކްޓަރު ބުންޏެވެ.

އިމްރާން ބުނިގޮތުގައި ބޮޑުވަމުން އައި ދުވަސްވަރު އެންމެ ގިނައިން ބެލިފައި ވެސް ހުންނާނީ އަމީތާބްގެ ފިލްމުތަކެވެ. އެހެންވެ އަމީތާބަކީ އަބަދު ވެސް އޭނާގެ ވަރަށް ބޮޑު ފޭނެއް ކަމަށް ބުންޏެވެ.

"އަހަރެން ދެކޭ ގޮތުގައި ބޮލީވުޑްގެ ކޮންމެ ފަންނަކީ ވެސް އަމީތާބް ސާއާ އެކު ފިލްމެއް ކުޅެން އުންމީދުކުރާނެ މީހެއް. އެކަން އަހަންނަށް މިހާރު ހާސިލުވެވުނީ ގަބޫލުރާ ހިތްވަނީ އެއީ ކެރިއަރުގައި މިހާތަނަށް ލިބުނު އެންމެ ބޮޑު އެއް ކާމިޔާބީއޭ." އިމްރާން ބުންޏެވެ.

އޭނާ ބުނީ އަމީތާބާ އެކީގައި މަސައްކަތްކުރުމަކީ ވެސް ވަރަށް ފަސޭހަ ކަމެއް ކަމަށާއި އެއީ ވަރަށް ޑިސިޕްލިން، މަސައްކަތަށް ވަރަށް ކަމޭހިތާ އެކްޓަރެއް ކަމަށެވެ.

"އެކަންވީ ވަރަށް ބޮޑު އިންސްޕިރޭޝަނަކަށް. ތެދަށް ބުނަންޏާ އަހަރެމެންގެ އިންޑަސްޓްރީން މަދުވާ އެއްޗަކީ ވެސް ޑެޑިޑޭޝަކާއ މަސައްކަތުގެ ޑިސިޕްލިން. އަމީތާބް ސާގެ ފަރާތުން އަހަންނަށް ފެނުނީ މަސައްކަތާއި ވަގުތަށް ބަހައްޓާ ފަރުވާތެރިކަމާއި މަސައްކަތުގެ ރަނގަޅު އަހުލާގު،" އިމްރާން ބުންޏެވެ. "އޭގެ ސަބަބުން އަމީތާބް ސާ އަށް އޮތް އިހުތިރާމާއި ގަދަރު ވެސް އިތުރަށް ބޮޑުވި."

އޭނާ ބުނި ގޮތުގައި ކެރިއަރުގެ ކުރިއަށް އޮތް ދުވަސްތައް ބައްޓަންކުރަން ބޭނުން ވަނީ އަމީތާބްގެ ފަރާތުން ލިބުނު އަދި ދަސްވި ފިލާވަޅުތަކާ އެކީގަ އެވެ.

"އެކީގައި މަސައްކަތްކޮށްލެވުނީމަ އަމީތާބް ސާގެ ޑެޑިކޭޝަން ފެނިފައި އަހަރެން އިތުރަށް މޯޓިވޭޓް ވެސް ވި. އަސްލު ވަރަށް ބޮޑު ހިތްވަރެއް މިއީ،" އިމްރާން ބުންޏެވެ. "މޮޅު ހުނަރުވެރި އެކްޓަރަކަށް މީހާ ވަނީ ގެންގުޅޭ މަސައްކަތުގެ އަހުލާގުގެ ސަބަބުން. އަމީތާބް ސާ އަކީ އޭގެ ނަމޫނާއެއް."

ރޫމީ ޖެފްރީ ޑައިރެކްޓްކޮށްފައިވާ "ޗެހެރޭ" އިން އަމީތާބާއި އިމްރާނާ އެކު ރިއާ ޗަކްރަބަތީ އާއި ޓީވީ ބަތަލާ ކްރިސްޓަލް ޑި ސޫޒާގެ އިތުރުން އައްނޫ ކަޕޫރް ވެސް ފެނިގެން ދާނެ އެވެ.

އިމްރާންގެ އެންމެ އަވަހަށް ރިލީޒްވާން އޮތް ފިލްމަކީ އަންނަ ހުކުރު ދުވަހު ރިލީޒްކުރާ ޑައިރެކްޓަރު ސަންޖޭ ގުޕްތާގެ "މުމްބާއީ ސާގާ" އެވެ. އަދި އޭނާ މިހާރު އަންނަނީ ސަލްމާން ޚާނާއި ކެޓްރީނާ ކައިފާ އެކު "ޓައިގާ 3" ގެ މަސައްކަތްކުރަމުން ކަމަށް މީޑިއާތަކުން ބުނެ އެވެ. ރިޕޯޓްތައް ބުނާގޮތުން އިމްރާނަކީ އެ ފިލްމުގެ މައި ވިލަން އެވެ.

"ޓައިގާ 3" އަކީ އިންޑިއާގެ އެންމެ ބޮޑު ފިލްމު ކުންފުނި ޔާޝްރާޖް ފިލްމްސް (ވައިއާރްއެފް) ގެ ފިލްމެއްގައި އިމްރާން މަސައްކަތްކުރާ ފުރަތަމަ ފަހަރެވެ. އަދި ސަލްމާނާއި ކެޓްރީނާއާ އެކީ ވެސް ފިލްމެއްގެ މަސައްކަތްކުރާ ފުރަތަމަ ފަހަރެވެ.