ފަރުދީންގެ އާ ފިލްމުގެ ބަތަލާއަކަށް ކްރިސްޓަލް

އެކްޓިންއާ ދުރުގައި ހުންނަތާ ގިނަ ދުވަސްތަކެއް ފަހުން މިދިޔަ މަހުގެ ތެރޭގައި އާ ފިލްމެއްގެ މަސައްކަތް ފެށި ބޮލީވުޑްގެ ކުރީގެ އެކްޓަރު ފަރުދީން ޚާންގެ އާ ފިލްމު "ވިސްފޮޓް" ގެ ބަތަލާއަކަށް ކްރިސްޓަލް ޑި ސޫޒާ ސޮއިކޮށްފި އެވެ.

އެކަން ކަށަވަރުކޮށް ދޭން އޭނާ ވަނީ ފިލްމުގެ ސެޓުން ނަގާފައިވާ ފޮޓޯއެއް ވެސް ސޯޝަލް މީޑިއާގައި ޕޯސްޓްކޮށްފަ އެވެ. "ވިސްފޮޓް" އަކީ ކްރިސްޓަލް ސޮއިކުރި ބޮލީވުޑްގެ ދެވަނަ ފިލްމެވެ. އޭނާގެ ފުރަތަމަ ފިލްމަކީ މިދިޔަ އޮގަސްޓްގައި ރިލީޒްކުރި އިމްރާން ހާޝިމީ އާއި އަމީތާބް ބައްޗަންގެ މިސްޓްރީ ތުރިލާ "ޗެހެރޭ" އެވެ.

ކްރިސްޓަލް އަކީ ސްޓާ ޕްލަސް އިން ގެނެސްދިން ކާމިޔާބު ސިލްސިލާއެއް ކަމަށްވާ "އޭކް ހަޒާރޯ މޭ މޭރީ ބެހެނާ ހޭ" އިން ވިދި ބަތަލާއެކެވެ. އެ ސިލްސިލާގެ ކުރިންނާއި ފަހުން ވެސް 31 އަހަރުގެ ބަތަލާ ވަރަށް ގިނަ ސިލްސިލާތަކުގައި މަސައްކަތް ކޮށްފައިވެ އެވެ. އަދި "ފިތުރަތު" ކިޔާ ވެބް ސީރީޒެއް ވެސް ބޮލީވުޑްގެ އެކްޓަރު އަދިތިޔާ ސީލްއާ އެކު ކުޅެފައިވެ އެވެ.

ފަރުދީންގެ "ވިސްފޮޓް" އަށް ކްރިސްޓަލް ސޮއިކުރި އިރު، މި ފިލްމަކީ މި އަހަރުގެ މާޗްގައި ރިލީޒްކުރި ފިލްމު "މުމްބާއީ ސާގާ" ގެ ޑައިރެކްޓަރު ސަންޖޭ ގުޕްތާގެ ކުންފުނި ވައިޓް ފެދާ ފިލްމްސް އާއި ބުޝަން ކުމާރުގެ ޓީ ސީރީޒް ގުޅިގެން ހަދާ އެކްޝަން ތުރިލާއެކެވެ. ކުކީ ގްލާޓީ ޑައިރެކްޓްކުރާ ފިލްމުގެ ކާސްޓްގައި ރިތޭޝް ދޭޝްމުކް ވެސް ހިމެނެ އެވެ.

"ވިސްފޮޓް" އަކީ ވެނެޒުއެލާ އިން 2012 ގެ އޮސްކާ އެވޯޑްސްގެ ބޭރު ފިލްމު ކެޓަގަރީ އަށް ފޮނުވި "ރޮކް، ޕެޕާ އެންޑް ސިޒާސް" އަސްލަކަށް ބަލައިގެން ހަދާ އެއްޗެކެވެ. މީގައި ކިޔައިދޭނީ ޓެކްސީ ޑްރައިވަރެއްގެ ގޮތުގައި މަސައްކަތްކުރާ ކުރީގެ ޑްރަގް ޑީލަރަކު (ފަރުދީން)، ޕައިލެޓެއް (ރިތޭޝް ދޭޝްމުކް) ގެ ދަރިފުޅު ކިޑްނެޕް ކުރުމުން ދިމާވާ ހާދިސާތަކެކެވެ.