އުތުރު ތިލަފަޅު އެއްބަސްވުމާ ބެހޭ ގޮތުން ދޮގުހަދާ ކަމަށް ބުނެ އެމްޑީޕީން މައްސަލައެއް

އުތުރު ތިލަފަޅުގައި އަސްކަރީ ބަނދަރެއް ހަދަން އިންޑިއާއާ އެކު ރާއްޖެއިން ވެފައިވާ އެއްބަސްވުމާ ބެހޭ ގޮތުން ދޮގުހަދައި އޮޅުވާލާ ކަމަށް ބުނެ އެކަން ތަހުގީގުކޮށް، ފިޔަވަޅު އަޅަން ގޮވާލައި، އެމްޑީޕީގެ މެމްބަރު މުހައްމަދު ރަޝީދު ހުސެއިން (ބިގޭ) މިއަދު ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފި އެވެ.

ބިގޭ މި މައްސަލަ ހުށައެޅުއްވި އިރު އިއްޔެ ވަނީ، އިންޑިއާ އާއި ރާއްޖެއާ ދެމެދު ކުރި އެއްބަސްވުމުގެ ޑްރާފްޓެއް ކަމަށް ބުނެ، މީޑިއާގައި ލިއެކިއުންތަކެއް ހާމަކޮށްފަ އެވެ. އިންޑިއާއާ އެކު ވެފައިވާ އެއްބަސްވުމާ ގުޅޭ ގޮތުން އެމްއެންޑީއެފް އާއި ސަރުކާރުން ކުރިން ބުނެފައިވާ ވާހަކަތާ ހިލާފު ބައެއް މާއްދާތައް، އެ ޑްރާފްޓްގައި ހިމެނެ އެވެ. އޭގެ ތެރޭގައި ބަނދަރު ބެލެހެއްޓުމުގެ ކަންކަމުގައި ސީދާ އިންޑިއާ ސިފައިން ބައިވެރިވުމާއި ތިބުމާއި، އެހެން އެއްވެސް ގައުމެއްގެ އަސްކަރީ އުޅަނދަކަށް އެތަން ބޭނުންކުރުމުގެ ފުރުސަތު ނެތުމާއި ބަނދަރާ ބެހޭ ހާއްސަ ކޮމިޓީތަކުގައި ރާއްޖެއަށް އަގުލަބިއްޔަތު ނެތި، ދެ ގައުމުން އެއްވަރަކަށް މެމްބަރުން ތިބުން ފަދަ ކަންކަން ހިމެނެ އެވެ.

ބިގޭގެ ކުއްލި މައްސަލާގައި އޭނާ އިޝާރަތްކުރައްވާފައި ވަނީ އުތުރު ތިލަފަޅު ތަރައްގީކުރަން ބޭރު ގައުމުތަކުގެ އެހީ ހޯދަން ފުރަތަމަ އުޅުނީ މި ސަރުކާރުން ނޫން ކަމަށެވެ. އެއީ ކުރިން ވެސް އެނގޭ ކަމެކެވެ. އުތުރު ތިލަފަޅު ހިއްކަން ފެށީ ކުރީގެ ރައީސް މުހައްމަދު ވަހީދުގެ ސަރުކާރުގައި އޭރުގެ ޑިފެންސް މިނިސްޓަރު އަދި ރަައްޔިތުންގެ މަޖިލިހުގެ ދަނގެތީ ދާއިރާ މެމްބަރު މުހައްމަދު ނާޒިމްގެ ބެއްލެވުމުގެ ދަށުންނެވެ. އޭނާ ވަނީ އިންޑިއާ ސަރުކާރަށް ވެސް އޭރު އެކަން ހުށައަޅުއްވައިފަ އެވެ.

ބިގޭ ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ވަނަ އަހަރު ވެސް އުތުރު ތިލަފަޅު ތަރައްގީކުރުމާ ބެހޭ ގޮތުން އިންޑިއާއާ އެކު ސޮއިކުރި ކަމަށެވެ.

އެކަން އެހެން އޮއްވައި ރާއްޖެ އާއި އިންޑިއާއިން ސޮއިކޮށްފައިވާ އެއްބަސްވުމުގެ ކޮޕީއެއް ކަަމަށް ބުނެ ވާހަކަތަކެއް ފަތުރަމުން ދަނީ ދިވެހި އަސްކަރިއްޔާގެ ވެރިންގެ ބޮލުގައި ރިޝްވަތުގެ ދޮގު ބަދުނާމު އަޅުވައި، އަސްކަރިއްޔާގެ ތަރައްގީއަށް ބޭރުގެ މާލީ އަދި ފަންނީ އެހީ ހޯދަން ސަރުކާރުން ކުރާ މަސައްކަތަށް ކަނޑައެޅިގެން ހުރަސް އަޅަން ކަމަށް، ބިގޭ ވިދާޅުވި އެވެ.

އޭނާ ވިދާޅުވި ގޮތުގައި ސިޔާސީ ބަޔަކު އަޑީގައި ތިބެގެން ފަތުރަމުން ގެންދާ އެ ވާހަކަތަކުގެ ބޭނުމަކީ ދިވެހި އަސްކަރިއްޔާ ތަރައްގީކޮށް، ސިފައިންގެ ގާބިލުކަން އިތުރުކުރަން ކުރާ މަސައްކަތް ހުއްޓުވުމެވެ. އަދި އިންޑިއާ ކަނޑުގެ ހަމަޖެހުން ނަގައިލުން ވެސް އެ މަސައްކަތުގެ މަގުސަދަކަށް ވާ ކަމަށް ކުއްލި މައްސަލައިގައި އޭނާ ތުހުމަތުކުރެއްވި އެވެ.

މައްސަލާގައި އޭނާ ސަރުކާރަށް ގޮވާލެއްވީ "ހަގީގަތާ ހިލާފަށް ދޮގު ވާހަކަތައް ފަތުރަމުން ދާތީ އެމައްސަލަ ބަލައި އެކަމުގައި ޝާމިލުވާ ފަރާތްތަކާ މެދު ފިޔަވަޅު އެޅުމަށެ"ވެ.

ބިގޭއަށް ކުއްލި މައްސަލަ ހުށަހަޅުއްވަން ފުރުސަތު ދެއްވި އިރު، އުތުރު ތިލަފަޅުގެ އެގްރިމެންޓް ހާމަކުރަން ގޮވާލައި ފެލިދޫ ދާއިރާގެ ޕީއެންސީ މެމްބަރު އިބްރާހީމް ފަޒުލް ރަޝީދު ހުށަހެޅުއްވި މައްސަލައަށް މަޖިލީހުގެ ރިޔާސަތުން ރައީސް މުހައްމަދު ނަޝީދު ފުރުސަތެއް ނުދެއްވަ އެވެ. އެ މައްސަލައަށް ފުރުސަތު ނުދެއްވީ، އެ މަނިކުފާނު ވިދާޅުވި ގޮތުގައި، ހަމަ އެ މައްސަލަ ނައިފަރު ދާއިރާގެ ޕީޕީއެމް މެމްބަރު މެމްބަރު އަހުމަދު ޝިޔާމް ވެސް ކުރިން ހުށަހަޅުއްވުމުން ބަލައި ނުގަނެވޭނެ ކަމަށް ނިންމަވާފައި އޮތުމުންނެވެ.

ބިގޭ ހުށަހެޅުއްވި މައްސަލައިގެ ބަހުސްގައި އެމްޑީޕީގެ މެމްބަރުން ވަނީ ޑްރާފްޓް އެގްރިމެންޓް ސޯޝަލް މީޑިއާގައި ލީކްކޮށްލެއްވި ކުރީގެ ހޯމް މިނިސްޓަރު އުމަރު ނަސީރާ ދެކޮޅަށް ފިޔަވަޅު އަޅަން ގޮވާލައްވައިފަ އެވެ.

ބިލެއްދޫ ދާއިރާގެ އެމްޑީޕީ މެމްބަރު އަހުމަދު ހަލީމް (ދޮންބިލެތް) ވިދާޅުވީ އުތުރު ތިލަފަޅުގެ އެއްބަސްވުމާ ބެހޭ ގޮތުން އުމަރު ދައްކަވާ ވާހަކައިން ހީވަނީ އިންޑިއާ ސަރުކާރުން އޭނާއަށް އެއްްބަސްވުން ފޮނުވައިގެން އުޅޭހެން ކަމަށެވެ.

"އެވަރަކަށް ދޮގެއް ނުހެދޭނެ. އެވަރަކަށް އޮޅުވައެއް ނުލެވޭނެ. އަޅުގަނޑު ގޮވައިލަން އުމަރު ނަސީރަށް ފިޔަވަަޅު އަޅަން ޖެހޭނެ،" އަހުމަދު ހަލީމް ވިދާޅުވި އެވެ.