ބޮލީވުޑްގެ ލަވައަކުން މި ފަހަރު ކަނޑިންމަ ރިސޯޓު

ބޮލީވުޑްގެ އެންމެ ބޮޑު އެއް މިޔުޒިކް ޕްރޮޑަކްޝަން ކުންފުނި، "ސޮނީ މިއުޒިކް" އާއި "ރީޕްލޭ މިއުޒިކް އިންޑިއާ" އާ ގުޅިގެން ނެރުނު އެންމެ ފަހުގެ ލަވައިން ކަނޑިންމަ ރިސޯޓުގެ ރީތިކަން ދައްކާލައިފި އެވެ.

"ކޭސޭ ޖުދާ ރަހޭ" ގެ ނަމުގައި އިއްޔެ ނެރުނު މި ވީޑިއޯ އަށް ޔޫޓިއުބުގައި މިހާތަނަށް 2.7 މިލިއަން ވިއުސް އާއި 69،000 އަށް ވުރެ ގިނަ ލައިކްސް ވަނީ ލިބިފަ އެވެ. މި ލަވަ ކުޅެފައިވަނީ ފަހަކަށް އައިސް ބޮލީވުޑްގެ އެންމެ މަޝްހޫރު ލަވަތަކުން ފެންނަ ސިދާތު ގުޕްތާ އާއި ޔޫޖީނާ ބެލޮސޯވާ އެވެ.

މި ލަވަ ފަށާއިރު އިންޑިއާގެ ބައެއް ތަންތަން ދެއްކި ނަމަވެސް ގިނައިން ފެންނަނީ ކަނޑިންމަ ރިސޯޓުގެ މަންޒަރުތަކެވެ. ލަވައިގައި ސިދާތު ޔޫޖީނާ އަށް ސަޕްރައިޒެއް ދިނުމަށް ރާއްޖެ އަށް އައުމަށް ދައުވަތު ދެ އެވެ. އޭނާ މި ދައުވަތު ގަބޫލުކޮށް ކަނޑިންމަ ރިސޯޓަށް ދަނީ، މަންޓާ އެއާގެ ސީޕްލޭނެއްގަ އެވެ.

ލަވައިގައި ކަނޑިންމަ ރިސޯޓުގެ ނަން ވަނީ "ކަބީރު ރިސޯޓްސް" އަށް ބަދަލުކޮށްފަ އެވެ. އެއީ ކަނޑިންމަ ރިސޯޓުގައި ނަގާފައިވާ މަންޒަރުތަކެއް ކަމަށް އެ ރިސޯޓުން ކަށަވަރުކޮށްދެ އެވެ.

ޔޫޖީނާ ރާއްޖެ އައުމަށް ފަހު ދައްކާ މަންޒަރުތަކުގައި ކަނޑިންމައިގެ ވޯޓާ ވިލާތަކާއި ރީތި ގޮނޑުދޮށުގެ އިތުރުން އެ ރިސޯޓުގައި ހިންގާ ބައެއް ހަރަކާތްތައް ވެސް ދައްކާލަ އެވެ. މީގެ ތެރޭގައި ޕެއިންޓް ކުރުމާއި ލޯންޗު ދުއްވުން ފަދަ ހަރަކާތްތަށް ހިމެނެ އެވެ.

މި ލަވައިގައި ސިދާތު އާއިޔޫޖީނާ ކައިވެނި ކުރާ މަންޒަރު ވެސް ނަގާފައިވަނީ ރާއްޖޭގަ އެވެ. އެ ދެމީހުން ކައިވެނި ކުރަނީ ކަނޑިންމަ ރިސޯޓުގެ ގޮނޑުދޮށުގަ އެވެ.

މި ލަވައިގެ ސަބަބުން އިންޑިއާ އާއި ދުނިޔޭގެ އެކި ހިސާބުތަކުގައި ރާއްޖެ ވަރަށް ބޮޑަށް އިޝްތިހާރު ވާނެ އެވެ.

ކޮވިޑް-19ގެ ފަހުން އިންޑިއާ އާއި ރާއްޖެއާ ދެމެދު ދަތުރުފަތުރުތައް ފެށުމާއެކު އެ ގައުމުން ރާއްޖެ އަށް ޓޫރިސްޓުން ވަނީ ވަރަށް ބޮޑަށް އިތުރުވެފަ އެވެ. މީގެ ތެރޭގައި ހާއްސަކޮށް ބޮލީވުޑްގެ ތަރިން ހިމެނެ އެވެ.

އެ ގައުމުގެ މިއުޒިކް ވީޑިއޯ ހަދާ މީހުންގެ މެދުގައި ވެސް ރާއްޖެ ވަނީ މަގުބޫލުވެފަ އެވެ. އެގޮތުން، މިދިޔަ ހަފުތާގައި އިންޑިއާގެ މަޝްހޫރު ޑާންސް ގްރޫޕް، "އެމްޖޭ5" އިން ނެރުނު ލަވައެއްގައި ވެސް ވަނީ ރާއްޖެ ދައްކާލައިފަ އެވެ. މި ލަވައިން ފެންނަނީ ކިހާ މޯލްޑިވްސްގެ މަންޒަރުތަކެވެ.