ދެކުނު ޕޮލިސް ކޮމާންޑަރަކަށް އާތިފް

ރާއްޖޭގެ އެންމެ ދެކުނުގެ ދެ ސިޓީ ކަމަށްވާ އައްޑޫ އާއި ފުވައްމުލައް ހިމެނޭ ފުލުހުންގެ ސައުތު ޑިވިޝަން ކޮމާންޑަރަކަށް ސްޕްރިންޑެންޓް އޮފް ޕޮލިސް އަހުމަދު އާތިފް ހަމަޖައްސައިފި އެވެ.

ހިތަދު އަށް އުފަން އާތިފަކީ ދުވުމާއި ފެތުމުގެ ދާއިރާ އިން ރާއްޖޭގައި ވަރަށް މަގުބޫލު ޝަހުސިއްޔަތެކެވެ. އޭނާ ފުލުހުންގެ ސައުތު ޑިވިޝަންގެ އިސް ވެރިޔާގެ މަގާމާ ހަވާލުވުމާ ގުޅިގެން މިއަދު އައްޑޫ ސިޓީ ކައުންސިލާ ވެސް ބައްދަލުކުރެއްވި އެވެ.

އެ ބައްދަލުވުމާ ބެހޭ ގޮތުން އާތިފު ވިދާޅުވީ އައްޑޫ ސިޓީ ކައުންސިލަކީ ފުލުހުންނާ އަބަދުވެސް ވަރަށް ގާތް ގުޅުމެއް ބާއްވާ ކައުންސިލެއް ކަމަށާއި އރ ކަމަށްޓަކައި ޝުކުރު ވެސް އަދާކުރައްވާ ކަމަށެވެ. އަދި އެ ގުޅުން ކުރިއަށް އޮތް ތަނުގައި ވެސް އޮންނާނެ ކަމަށް އުންމީދުކުރައްވާ ކަމަށް ވިދާޅުވި އެވެ.

އާ ކޮމާންޑަރާ އެކި ބޭއްވި ބައްދަލުވުމުގައި މޭޔަރު އަބްދުﷲ ސޯދިގް (ސޯބެ) ވިދާޅުވީ ކޮވިޑް-19ގެ ހާލަތު އައްޑޫގައި އިތުރަށް ގޯސްނުވެ މިހާތަނަށް ހިފަހެއްޓުނީ ފުލުހުންނާއި ހުރިހާ މުއައްސަސާތަކެއް ގުޅިގެން ކުރި މަސައްކަތުގެ ސަބަބުން ކަމަށެވެ. އެގޮތުން މިދިޔަ އަހަރު އައްޑޫގެ ތިން ޕޮލިސް ސްޓޭޝަނަށް އައްޔަންކުރި ކުރެއްވުނު ކޮމާންޑަރުންގެ ދަށުން ފުލުހުން ކުރި މަސައްކަތަކީ ނަމޫނާ މަސައްކަތެއް ކަމަށް ވިދާޅުވި އެވެ.

މީގެ އިތުރުން އަވަށްތަކުގައި ދިމާވާ މައްސަލަތައް ހައްލުކުރަން ފުލުހުންނާއި ކައުންސިލުން ކުރާ މަސައްކަތަށް އެއްބާރުލުން ދިނުމުގެ ގޮތުން ކޮންމެ އަވަށެއްގައި ވެސް މިހާރު މުނިސިޕަލް އިންސްޕެކްޓަރުން ތިބޭކަން ފާހަގަކޮށް މޭޔަރު ވިދާޅުވީ މުނިސިޕަލް އިންސްޕެކްޓަރުންގެ ސަބަބުން މިހާރު އެކިއެކި ކަންކަމުގައި ވަރަށް ބޮޑެތި ލުއި ފަސޭހަތަކެއް ލިބެމުން އަންނަ ކަމަށެވެ.

ސޯބެ ވިދާޅުވި ގޮތުގައި ގާނޫނުގެ ތެރެއިން ފުލުހުންނާ އެކު ކައުންސިލާއި އެހެނިހެން މުއައްސަސާތައް ގުޅިގެން މަސައްކަތް ކުރެވޭނެ ގޮތުގެ ޕްލޭނެއް އެކުލަވާލުމަކީ ވަރަށް މުހިންމު ކަމެކެވެ.

މިއަދުގެ ބައްދަލުވުމުގައި އައްޑޫގެ ރައްޔިތުންގެ ރައްކާތެރިކަން ކަށަވަރުކޮށް ދިނުމާއި ރައްޔިތުންނަށް ހިދުމަތް ކުރުމުގައި ފުލުހުން ކުރާ މަސައްކަތްތަކަށް ކައުންސިލުން ދޭ އެއްބާރުލެއްވުން ފާހަގަކޮށް، ސައުތު ޕޮލިސް ޑިވިޝަންގެ ފަރާތުން ކައުންސިލަށް ހަނދާނީ ފިލާއެއް ދީފައިވެ އެވެ.

ފުލުހުންގެ ސައުތު ޑިވިޝަން ކޮމާންޑަރަކަށް އެންމެ ފަހުން ހުންނެވީ ޗީފް އިންސްޕެކްޓަރު އޮފް ޕޮލިސް އަމީން އަބްދުލް ގައްޔޫމެވެ.

އައްޑޫގައި ޕޮލިސް ސްޓޭޝަންތައް ގާއިމުކޮށްފައިވާ އަވަށްތަކަކީ ހިތަދު އާއި ގަމާއި ހުޅުމީދު އެވެ.