މޫސަ: ލާމަރުކަޒީ ނިޒާމަކަށް އަތޮޅު ބަދަލުވާނެ

ޓޫރިޒަމް ދާއިރާގައި 14 އަހަރު މަސައްކަތް ކުރެއްވިޔަސް މޫސާ ޝަފީގަކީ އިސްލާހީ ހަރަކާތުގައި އުފަން ރަށް، ހއ. ދިއްދޫގެ މުހިއްމު ބައިވެރިވެރިއެކެވެ. އެކަމުގެ އެންމެ ބޮޑު ހެއްކަކީ ޕްރައިމަރީއަކާ ނުލައި އަތޮޅު ކައުންސިލްގެ އެމްޑީޕީ ޓިކެޓު އޭނާއަށް ލިބިވަޑައިގަތުމެވެ.

މާދަމާ ބާއްވާ ލޯކަލް ކައުންސިލް އިންތިޚާބަކީ މޫސަގެ މި ފަދަ ފުރަތަމަ އިމްތިހާނެވެ.

ލާމަރުކަޒީ ގާނޫނަށް ބަދަލު ގެނައުމުގެ ކުރިން އޭނާ ތައްޔާރުވަމުން ދިޔައީ ދިއްދޫ ދާއިރާއިން އަތޮޅު ކައުންސިލަށް ނުކުމެވަޑައިގަންނަވާށެވެ. އެކަމަކު ޕްރައިމަރީއަށް ތައްޔާރުވިއިރު ގާނޫނަށް ގެނައި ބަދަލުތަކާ މެދު ވަރަށް ހިތްހަމަޖެހިވަޑައިގަތެވެ؛ ކައުންސިލްތަކަށް ބޮޑެތި ބާރުތަކެއް ދީގެން އަމިއްލައަށް އަތޮޅާއިި ރަށް ތަރައްގީކުރަން ފުރުސަތު ވެސް ފަހިވެގެން ދިޔައީ އެވެ.

އަމިއްލަ އަތޮޅާއި ރަށުގައި ހުރި މައްސަލަތަކާއި ގޮންޖެހުންތައް ހައްލުކުރަން އެނގޭނީ، މޫސާ ދެކެވަޑައިގަންނަވާ ގޮތުގައި އެތަނެއްގެ ބަޔަކަށެވެ.

"މި ނިޒާމުގެ ތެރެއިން، ހއ. އެންމެ ރަނގަޅަށް ރާއްޖޭގައި ކާމިޔާބުކަމާއެކު ނިޒާމު ހިންގޭ އަތޮޅަކަށް ހަދަން ވެސް މި އޮތީ ފުރުސަތު ލިބިފައި. ހަގީގަތުގައި ވެސް ލާމަރުކަޒީ ނިޒާމަކީ އެމްޑީޕީ ވުޖޫދުކުރި އެއްޗެއް،" ރަށުގެ ކްލަބް ޖަމިއްޔާތައް ހިންގުމުގައި އިސް ދައުރެއް އަދާކުރައްވާފައިވާ މޫސަ ވިދާޅުވި އެވެ.

މީގެ ކުރިން އަތޮޅަށް ބަޖެޓެއް ދިނަސް މަސައްކަތް ކުރެވޭނެ މާ ބޮޑު ފުރުސަތެއް ނެތެވެ. ރަށެއްގެ ސިއްހީ މަރުކަޒު ބޮޑުކުރަން ހުޅުވާލިއަސް އެކަން ކާމިޔާބުކުރަނީ ވެރިރަށް މާލޭގައި ހިންގާ ކުންފުނިތަކަށް ވުމުން ރަށަށް ލިބެނީ އިމާރާތެއް އެކަނި ކަމަށް ވިދާޅުވި އެވެ.

ނަމަވެސް ލާމަރުކަޒީ ގާނޫނަށް ގެނައި ބަދަލުން ފަސް މިލިއަން ރުފިޔާއަށްވުރެ ދަށުގެ ޕްރޮޖެކްޓުތައް ހިންގަން ކައުންސިލްތަކަށް ބާރު ލިބެ އެވެ. އަތޮޅު ކައުންސިލްގެ ރައީސަކަށް ހޮވިވަޑައިގެންފިނަމަ އެ ރަށަކަށް ކަނޑައަޅާފައިވާ ޕްރޮޖެކްޓުތައް ހިންގަން ބާރު އަޅާނެ ކަމަށާއި އަތޮޅު ކައުންސިލްގައި އެ ކަންތައްތައް ތަންފީޒުކޮށްދޭނެ ކަމަށް ވިދާޅުވި އެވެ.

ސިއްހަތާއި ތައުލީމު، އެންމެ ބޮޑު މައްސަލަ

ހއ. އަތޮޅުގައި މީހުން ދިރިއުޅޭ 14 ރަށަށް ވެސް މައިގަނޑު ގޮތެއްގައި ދިމާވެފައިވާ އެންމެ ބޮޑު ދެ ގޮންޖެހުމަކީ ސިއްހަތާއި ތައުލީމެވެ. ރަށުން ޓެސްޓެއް ނުހެދި ބަލިވުމުން ހަމައަށް ބޭހެއް ނުލިބެ އެވެ. އެ ކަންކަމަށް ހައްލު ހޯދުމަށް ދިއްދޫގައި ހުންނަ ހޮސްޕިޓަލުން އެ އަތޮޅުގެ އެހެން ރަށްރަށަށް ޑޮކްޓަރުން ފޮނުވައި މެޑިކަލް ކޭމްޕް ބާއްވަ އެވެ.

"ސިއްހީ ނިޒާމު އިތުރަށް ލާމަރުކަޒީކުރަން މަސައްކަތްކުރަން. ދިއްދޫގައި ތިބޭ ސްޕެޝަލް ޑޮކްޓަރުން ކޮންމެ މަހަކު އެކި ރަށްރަށަށް ފޮނުވައި ކޭމްޕުތައް ހިންގާ. ގޮންޖެހުންތައް ކުޑަވޭ. ތައުލީމު ވެސް ބަލަނީ ވަށާ ޖެހޭ ގޮތަކަށް، މިހާރު އެބަ ގެންނަން ޖޫނިއާ ކޮލެޖެއް މި ކޮޅަށް،" މޫސަ ވިދާޅުވި އެވެ.

އޭނާ ވިދާޅުވީ ޓެކްލް ކުރަން ޖެހިފައި ވަނީ ސިއްހަތާއި ތައުލީމުގެ މައްސަލަތަކަށެވެ. ކައިރި މުސްތަގުބަލެއްގައި އެ ދެ ކަންތައް ވެސް ފުރިހަމަވެގެންދާނެ ކަން ފާހަގަކުރެއްވި އެވެ.

އެޑިޓަރުގެ ނޯޓު: މިއީ ކައުންސިލް އިންތިހާބުގެ ކެންޑިޑޭޓުންނަށް "މިހާރު" އިން ހާއްސަކުރި ޕެކޭޖެއްގައި ހިމެނޭ ކޮންޓެންޓްގެ ބައެކެވެ.