އައްޑޫ ސިޓީ ކައުންސިލްގެ ސުޕަ މެޖޯރިޓީ ވެސް އެމްޑީޕީ އަށް ގެއްލިއްޖެ

މިހާތަަނަށް އައްޑޫ ސިޓީ ކައުންސިލްގައި އެމްޑީޕީން ދަމަހައްޓަމުން އައި ބާރުވެރިކަން ކެނޑި، މިއަދު ބޭއްވި ލޯކަލް ކައުންސިލްތަކުގެ އިންތިޚާބުގައި އެ ސިޓީ އަށް އެ ކައުންސިލްގެ ސުޕަ މެޖޯރިޓީ ފުރަތަމަ ފަހަރަށް ގެއްލިއްޖެ އެވެ.

އައްޑޫ ސިޓީ ކައުންސިލްގެ 13 ގޮނޑީގެ ތެރެއިން މިއަދުގެ އިންތިޚާބުގައި، މި ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީ އަށް ނެގުނީ ހަތް ގޮނޑި އެވެ. ދެން ކާމިޔާބު ހޯދީ އިދިކޮޅު ޕީޕީއެމުން ތިން ގޮނޑި އަދި އަމިއްލަ ތިން ކެންޑިޑޭޓެކެވެ.

މޭޔަރަކަށް އެމްޑީޕީގެ އަލީ ނިޒާރު ހޮވާފައިވާއިރު، ކައުންސިލްގައި ވޯޓަކަށް ގޮސްފި ނަމަ، މިހާރު ގޮނޑިތައް ބެހިފައިވާ ގޮތުން ދެކޮޅު ހަމަހަމަވެ، މޭޔަރު ކާސްޓިން ވޯޓު ދެއްވަން ޖެހޭނެ އެވެ. ކައުންސިލްގައި މޭޔަރުގެ ވޯޓާ ނުލައި ދެން ވޯޓުގައި އެމްޑީޕީ ހައެއް އަދި ބާކީ ހަ ވޯޓު ވާނީ އެއްވަރެވެ.

މިހާތަނަށް އައްޑޫން އެމްޑީޕީ އަށް ނެގުނީ މޭޔަރުގެ ގޮނޑީގެ އިތުރުން ހިތަދޫ ރަސްގެދަރު ދާއިރާ އާއި ހިތަދޫ މެދުވައު ދާއިރާ އާއި ހިތަދޫ ބޭރުމަތި ދާއިރާ އާއި ހިތަދޫ ކޮރުވައު ދާއިރާ އާއި ހުޅުދޫ ދާއިރާ އާއި ފޭދޫ މަރަދޫފޫދޫ ދާއިރާ އެވެ. އިދިކޮޅު ޕީޕީއެމުން ނެގީ މީދު އާއި ފޭދޫ މާދެލަ އަދި ފޭދޫ މަގުއްދޫ ދާއިރާގެ ގޮނޑި އެވެ. އަމިއްލަ ތިން ކެންޑިޑޭޓުންނަށް ކާމިޔާބު ކުރެއްވުނީ ހިތަދޫ މާމެންދޫ ދާއިރާ އާއި ހިތަދޫ މޫލެކެޑެ ދާއިރާ އަދި މަރަދޫ ދާއިރާ އެވެ.

މި ފަހަރުގެ ލޯކަލް ކައުންސިލްތަކުގެ އިންތިޚާބުގައި މުހިންމު ބައެއް ދާއިރާތަކުން އެމްޑީޕީ އަށް ވަނީ ނާކާމިޔާބުވެފަ އެވެ. ޚާއްސަކޮށް މާލޭގެ މޭޔަރަކަށް އިދިކޮޅު ޕީޕީއެމްގެ ކެންޑިޑޭޓު ޑރ. މުހައްމަދު މުއިއްޒު ހޮވާފައިވާއިރު، އެ ކައުންސިލްގެ ގިނަ ގޮނޑިތަކެއް ވެސް ވަނީ ޕީޕީއެމުން ނަގައިފަ އެވެ. މިއާއެކު، ސަރުކާރާއި ރައްޔިތުންގެ މަޖިލީހުގެ ސުޕަ މެޖޯރިޓީ އޮތް އެމްޑީޕީ އަށް ވަނީ ބޮޑު ޝޮކެއް ލިބިފަ އެވެ.

މި އިންތިޚާބާ ދިމާކޮށް، އެމްޑީޕީން ވަނީ ކުއްލި ގޮތަކަށް ތަރައްގީގެ ބައެއް މަޝްރޫއުތައް އިއުލާންކޮށްފަ އެވެ. މިދިޔަ 2-3 ހަފުތާގައި މަޝްރޫއުތައް އިއުލާންކުރުން ނޫން ކަމެއް މި ސަރުކާރުގައި ނެތެވެ.