މުޒާހަރާ އިން ފުލުސް އޮފީހަށް ގެންދިޔަ 12 މީހުން ޖޫރިމަނާކޮށް ދޫކޮށްލައިފި

"ދޭތިން އެކައްޗަށް" ނަމުގައި އިދިކޮޅު ޕީޕީއެމް/ޕީއެންސީ އިން ރޭ ބޭއްވި މުޒާހަރާ އިން ފުލުހުންގެ ބެލުމުގެ ދަށަށް ގެންދިޔަ އެންމެން ދޫކޮށްލާފައިވާ ކަމަށް ފުލުހުން މިއަދު ބުނެފި އެވެ.

އެ މުޒާހަރާ އިން ފުލުހުންްގެ ބެލުމުގެ ދަށަށް ނުވަ މީހަކު ގެންދިޔަ ކަމަށް އިދިކޮޅު ކޯލިޝަންގެ ތަރުޖަމާނު، ހީނާ ވަލީދު ވިދާޅުވެ އެވެ. އެކަމަކު ފުލުހުންގެ މީޑިއާ އޮފިޝަލް ވިދާޅުވި ގޮތުގައި މުޒާހަރާ އިން 12 މީހަކު ފުލުހުންގެ ބެލުމުގެ ދަށަށް ގެންދިޔަ އެވެ. އެ އެންމެން ވެސް ދޫކޮށްލީ ކޮވިޑް ކޮންޓްރޯލްކުރުމަށް އަޅާފައިވާ ފިޔަވަޅުތަކާ ހިލާފަށް ގިނަ މީހުން އެއްވެ އުޅުމުންނެވެ.

ޕީޕީއެމް އޮފީސް ކުރިމައްޗަށް އިދިކޮޅުގެ ސަޕޯޓަރުން އެއްވީ މަނީ ލޯންޑަރިންގެ ކުށުގައި ފަސް އަހަރަށް ޖަލަށްލާފައިވާ ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލުމަށެވެ. ފުލުހުން ވަނީ މުޒާހަރާ ފެށެން ގާތްވެފައި ވަނިކޮށް އެ ސަރަހައްދުގައި ބެރިކޭޑް ޖަހައި، ޕީޕީއެމް އޮފީހަށް ދެވެން އޮތް ހުރިހާ މަގެއް ބަންދުކޮށްފަ އެވެ.

ޕީޕީއެމް އޮފީސް ސަރަހައްދުގައި މުޒާހަރާކުރުމަަށް ފަހު ބައެއް ސަޕޯޓަރުން ވަނީ މަޖީދީމަގަށް ވެސް ނުކުމެ އަޑު އުފުލައިފަ އެވެ. އެކަމަކު، ފުލުހުން ގޮސް އެއްވުން ރޫޅާލި އެވެ.

އިދިކޮޅު ޕީޕީއެމް/ ޕީއެންސީ ކޯލިޝަނުން ނެރުނު ބަޔާނެއްގައި ބުނީ "ދޭތިން އެކައްޗަށް" ނަމުގައި ކުރިއަށް ގެންދިޔަ މުޒާހަރާއަށް ހުރަސް އަޅާފައި ވަނީ ގާނޫނާ ހިލާފަށް ކަމަށެވެ. މީހުން ހައްޔަރުކުރުމުގައި ފުލުހުން ހާލަތާ ނުބައްދަލު ބާރުގެ ބޭނުންކޮށްފައިވާ ކަމަށާއި ޑިމޮކްރަސީއެެއްގައި ހިޔާލު ފާޅުކުރުމާއި އިހުތިޖާޖުކުރުމުގެ ހައްގު ލިބިދޭން ޖެހުނަސް ސަރުކާރުން އެ ހައްގަށް ވެސް އަރައިގެންފައިވާ ކަމަށް ބަޔާނުގައިވެ އެވެ.