ކޮވިޑްގެ ހާލަތު ގޯސްވާތީ އޭޑީކޭ ހޮސްޕިޓަލްގައި ބަލި މީހުންނަށް ޒިޔާރަތްކުރުން މަނާކޮށްފި

ރާއްޖޭގައި ކޮވިޑް-19 ފެތުރޭ މިންވަރު ގިނަވުމާ ގުޅިގެން، އޭޑީކޭ ހޮސްޕިޓަލްގައި އެޑްމިޓް ކޮށްފައިވާ މީހުންގެ ކައިރިއަށް ޒިޔާރަތް ކުރުން އެ ހޮސްޕިޓަލުން މަނާކޮށްފި އެވެ.

އޭޑީކޭ އިން އިއްޔެ ނެރުނު ބަޔާނެއްގައި ބުނީ، ކޮވިޑާ ގުޅިގެން ސިއްހީ ހިދުމަތްތެރިންގެ ރައްކާތެރިކަމަށްޓަކައި ތަފާތު ފިޔަވަޅުތައް އަޅަމުން އަންނަ ކަމަށާއި އެހެންވެ، އެ ހޮސްޕިޓަލުގައި އެޑްމިޓްކޮށްގެން ފަރުވާދޭ މީހުންނަށް ޒިޔާރަތް ކުރުން މިއަދުން ފެށިގެން މަނާވާނެ ކަމަށެވެ.

އޭޑީކޭ އިން މިހާރު ހަމަޖައްސާފައިވާ ގޮތުން ބަލިމީހާ ކައިރީގައި މި ދުވަސްވަރު މަޑުކުރެވޭނީ އެންމެ އެހީތެރިއަކަށެވެ. އެކަމަކު އެއީ ކޮވިޑް-19 ގެ އެއްވެސް އަލާމާތެއް ނެތް މީހަކަށް ވާން ޖެހެ އެވެ.

"...ބަލި މީހުން ކައިރީ ތިބުމަށް ހޮސްޕިޓަލުން ހުއްދަ ދީފައިވާ ފަރާތްތައް ފިޔަވައި އެހެން ބޭފުޅުން ހޮސްޕިޓަލަށް ވަޑައިނުގެންނެވުމަށް ދަންނަވަން،" އޭޑީކޭގެ ބަޔާނުގައި ވެ އެވެ.

ކުރީގެ ރައީސް އަދި މިހާރު ރައްޔިތުން މަޖިލީހުގެ ރައީސް މުހައްމަދު ނަޝީދަށް މިދިޔަ ބުރާސްފަތި ދުވަހުގެ ރޭ ދިން ހަމަލާއާ ގުޅިގެން އެ މަނިކުފާނު ވެސް މިވަގުތު ފަރުވާ ހޯއްދަވަމުން އަންނަނީ އޭޑީކޭ އިންނެވެ. އެހެންކަމުން ނަޝީދުގެ އަރިހަށް ގިނަ އަދަދެއްގެ ސަޕޯޓަރުންނާއި ރައްޔިތުންގެ މަޖިލީހުގެ މެންބަރުން އަދި ސަރުކާރުގެ ވެރިން ކޮންމެ ދުވަހަކު ޒިޔާރަތް ކުރައްވަ އެވެ. އަދި ނަޝީދުގެ ހާލު ބަލަން ބޭނުންވާ، އެ މަނިކުފާނުގެ ސަޕޯޓަރުން ވެސް އޭޑީކޭ ހޮސްޕިޓަލްގެ ގޯތިތެރޭގައި ހަދާފައިވާ ޕާކުގައި ކޮންމެ ދުވަހަކު ގިނަ އިރުތަކެއް ވަންދެން އިށީނދެގެން ތިބެ އެވެ.

އެމްޑީޕީގެ ސެކްރެޓޭރިއޭޓުން ރޭގައި އެދިފައި ވަނީ ނަޝީދުގެ ހާލުކޮޅު ބެލުމަށް އޭޑީކޭ އަށް ދާ މީހުން އެ ހޮސްޕިޓަލްގެ އެންގުންތަކަށާއި އެޗްޕީއޭގެ ގައިޑްލައިންތަކަށް އިހުތިރާމް ކުރުމަށެވެ.

ރާއްޖޭގައި އެންމެ ފުރަތަމަ ކޮވިޑްގެ އައުޓް ބްރޭކެއް ހިނގި މިދިޔަ އަހަރުގެ މާޗު މަހުގެ ތެރޭގައި ވެސް އޭޑީކޭ ހޮސްޕިޓަލާއި އެހެން ހޮސްޕިޓަލްތަކުން ވެސް އެޑްމިޓް ކޮށްފައިވާ މީހުންގެ ކައިރިއަށް ޒިޔާރަތް ކުރުން މަނާކުރި އެވެ.

މިހާރު އަނެއްކާވެސް ރާއްޖޭގައި ކޮވިޑް-19 ބާރަށް ފެތުރެމުން ދާއިރު، ދުވާލަކަށް ޕޮޒިޓިވްވާ މީހުންގެ އަދަދު ހުންނަނީ 700 އިން މަތީގަ އެވެ. އަދި ކޮވިޑް ޖެހިގެން ރާއްޖޭގައި ގިނަ ބަޔަކު ވަރަށް ކައިރީ ކައިރީ އެބަ މަރުވެ އެވެ. ޑޮކްޓަރުން ވިދާޅުވާ ގޮތުގައި، މި ބަލީގައި މިހާރު ބޮޑުވަރުވެހެން އައިސީޔޫގައި ފަރުވާ ދޭން ޖެހިފައި ވަނީ ވެސް އުމުރުން 40 އަހަރުން ދަށުގެ މީހުންނަށެވެ.