Roadha Mihaaru
ލޮކްޑައުންއަކަށް ދިއުމާ މެދު ގޮތެއް ނުނިންމުނު

ލޮކްޑައުންއަކަށް ދިއުމާ މެދު ގޮތެއް ނުނިންމުނު

11 މެއި 2021

ރާއްޖޭގެ ކޮވިޑް-19ގެ ހާލަތު ދުވަހަކު ގޯސް ނުވާވަރަށް ގޯސްވެ، މާލެ ސަރަހައްދު ލޮކްޑައުުން ކުރުމާ ގުޅޭ ގޮތުން ވާހަކަތަކެއް ދެއްކެވި، ދެން އަޅާނެ ފިޔަވަޅަކާ މެދު މަޝްވަރާކުރުމަށް ރޭ ސިއްހީ އިދާރާތަކުން ރައީސް އިބްރާހިމް މުހައްމަދު ސޯލިހާ އެކު ބޭއްވި ބައްދަލުވުމުން ވެސް ވަކި ގޮތެއް ކަނޑަނޭޅި ނިންމާލައިފި އެވެ.

އާމިނަތު ޝިފްލީން އާމިނަތު ޝިފްލީން

ރާއްޖޭގެ ކޮވިޑް-19ގެ ހާލަތު ދުވަހަކު ގޯސް ނުވާވަރަށް ގޯސްވެ، މާލެ ސަރަހައްދު ލޮކްޑައުުން ކުރުމާ ގުޅޭ ގޮތުން ވާހަކަތަކެއް ދެއްކެވި، ދެން އަޅާނެ ފިޔަވަޅަކާ މެދު މަޝްވަރާކުރުމަށް ރޭ ސިއްހީ އިދާރާތަކުން ރައީސް އިބްރާހިމް މުހައްމަދު ސޯލިހާ އެކު ބޭއްވި ބައްދަލުވުމުން ވެސް ވަކި ގޮތެއް ކަނޑަނޭޅި ނިންމާލައިފި އެވެ.

އެނގިފައިވާ ގޮތުގައި ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އާއި ޓެކްނިކަލް އެޑްވައިޒަރީ ގްރޫޕް (ޓެގް)ގެ އޮފިޝަލުން ރޭ މަޝްވަރާ ކުރެއްވީ، މިހާރު އޮތް ހާލަތުން އަރައިގަތުމަށް މާލެ ލޮކްޑައުންއަކަށް ދިޔުމަށް ނުވަތަ އެ ފަދަ ހަރުކަށި ފިޔަވަޅެއް އެޅުމާ ގުޅޭގޮތުންނެވެ. އޭގެ ކުރިން، މި އަންނަ ފިތުރު އީދުގެ ފަހުން މާލެ ލޮކްޑައުން ކުރާނެ ކަމަށް ބައެއް މީޑިއާތަކުން ރިޕޯޓު ކުރި ނަމަވެސް، ރައީސް އޮފީހުގެ ތަރުޖަމާނު މުޙައްމަދު މަބްރޫކް އަޒީޒް އެކަން ދޮގުކުރެއްވި އެވެ.

ރޭ ބޭއްވި އެޗްއީއޯސީގެ ނޫސްވެރިންގެ ބައްދަލުވުމެއްގައި މަބްރޫކް ވިދާޅުވީ، ލޮކްޑައުންކުރުމާ ގުޅޭގޮތުން އަދި ވަކި ގޮތެއް ނުނިންމާ ކަމަށާއި ރައީސްއާ އެކު ބޭއްވި ބައްދަލުވުމުން ދެން އަޅާނެ ފިޔަވަޅެއް ނިންމުން އެކަށީގެންވާ ކަމަށެވެ.

"އެކަމަކު ވަކި ގޮތެއް ނުނިންމުނު،" އޭނާ މިއަދު "މިހާރު" އަށް ވިދާޅުވި އެވެ.

މަބްރޫކް ވިދާޅުވި ގޮތުގައި އެކަމާ ގުޅޭގޮތުން މަޝްވަރާ ކުރުމަށް މިއަދު ވެސް ރައީސާއި އެހެން ފަރާތްތަކާ އެކު ވެސް ބައްދަލުވުންތަކެއް ބޭއްވުމަށް ވަނީ ނިންމައިފަ އެވެ.

އެނގިފައިވާ ގޮތުގައި ސިއްހީ މުއައްސަސާތަކުން ބާރު އަޅަނީ މާލެ ލޮކްޑައުން ކުރުމަށެވެ. ހާލަތު ކޮންޓްރޯލް ނުވާ ނަމަ، ލޮކްޑައުން ކުރަން ޖެހިދާނެ ކަމުގެ އިޝާރާތެއް ވެސް ޓެގުން ވަނީ ދީފަ އެވެ.

ޓެގްގެ މެމްބަރު ޑރ. އަހުމަދު ޝަހީދު ވިދާޅުވީ މިހާރަށް ވުރެ ހަރުކަށި މޫވްމަންޓް ރިސްޓްރިކްޝަނެއް ގެންނަން ޖެހޭ ކަމަށާއި އެ ފިޔަވަޅުން ވެސް ކޮވިޑުގެ ހާލަތު ރަނގަޅުނުވާނަމަ ލޮކްޑައުނަކަށް ދިއުން އެކަށީގެންވާ އެކަށީގެންވާ ކަމަށެވެ.

"ބަލި ފެތުރުން ހުއްޓުވުމަށްޓަކައި އެކިއެކި ފިޔަވަޅުތައް އަޅާފައި މި ވަނީ. އޭގެ ތެރޭގައި ހިމެނޭ ރޭގަނޑު 9 ން ފަތިހު ހަތަރަކަށް މި ވަނީ ކާފިއު ގަޑިއެއް ވެސް އިއުލާނުކޮށްފައި މޫވްމަންޓް ރެސްޓްރިސްޓް ކުރުމުގެ ގޮތުން." ޑރ. ޝަހީދު ވިދާޅުވި އެވެ.

"އަޅުގަނޑުމެން ދެކޭ ގޮތުގައި ވަރަށް އަވަހަށް މިއަށްވުރެ ހަރުކަށި މޫވްމަންޓް ރެސްޓްރިކްޝަންތަކެއް ގެންނަންޖެހޭ ކަމަށް އަޅުގަނޑުމެން ގަބޫލުކުރަނީ. މޫވްމަންޓް ރެސްޓްރިކްޝަންތަކާ އެކު ވެސް އަދަދުތައް މައްޗަށް ދިއުން ކޮންޓްރޯލް ނުވާނަމަ އެކަށީގެންވޭ ހަމަ ލޮކްޑައުނަކަށް ދާން ޖެހުން ވެސް،"

މާލެ ތެރެއިން އެންމެ ފުރަތަމަ ކޮވިޑް ކޭހެއް ފެނުމާއެކު، މިދިޔަ އަހަރުގެ އޭޕްރީލް މަހުގެ ތެރޭގައި މާލެ ލޮކްޑައުން ކުރި އެވެ. އެކަމަކު ގޭގައި ބަންދުވެ ތިބެން ޖެހުންވީ، ގިނަ ބަޔަކަށް ބޮޑު ވޭނަކަށެވެ. ގިނަ ބައެއްގެ ވަޒީފާ ގެއްލި، އާމްދަނީ ނުލިބި އަދި ނަފްސާނީ މައްސަލަތައް ވެސް އިތުރުވި އެވެ. އެހެންވެ، ކޭސްތައް އިތުރުވެ، ރާއްޖެ ނުރައްކާތެރި ހާލަތެއްގައި އޮތް ނަމަވެސް ލޮކްޑައުންއަކަށް ދާން ގިނަ ބަޔަކު މިހާރު ދެކޮޅު ހަދަ އެވެ.