"ސްޓާޓްއަޕް ގްރައިން އެކްސް"ގެ މިއަހަރުގެ ފުރަތަމަ އިވެންޓް ބާއްވައިފި

ދިރާގާއި ސްޕާކްހަބް ގުޅިގެން ބާއްވަމުން އަންނަ "ސްޓާޓްއަޕް ގްރައިޑް އެކްސް"ގެ މި އަހަރުގެ ފުރަތަމަ އިވެންޓް ބާއްވައިފި އެވެ.

މި އިވެންޓްގައި ގެސްޓެއްގެ ގޮތުގައި ބައިވެރިވީ ލޮޓީފައިލްސްގެ ކޯ-ފައުންޑާ ނަސްރުﷲ އަދްނާން (ނައްޓު) އެވެ. ލޮޓީފައިލްސް އަކީ އާފްޓާ އިފެކްޓްގައި ހަދާ އެނިމޭޝަންތަކުގައި ޑިވެލޮޕަރުންނަށް ފަސޭހަ ޑޭޓާ ފޯމެޓަކަށް ބަދަލުކޮށްލެވޭނެ އެޕްލިކޭޝަނެކެވެ. މި އެނިމޭޝަންތައް ފަސޭހައިން ވެބާއި މޮބައިލް އެޕްލިކޭޝަންތަކުގައި ވެސް ބޭނުންކުރެވެ އެވެ. ލޮޓީފައިލްސް 2017ގައި ލޯންޗުކުރުމަކީ ދުނިޔޭގެ ޑިޒައިން އިންޑަސްޓްރީ އަށް އައި ބޮޑު އިންގިލާބެކެވެ. ދިރާގާއި ސްޕާކްހަބް އިން ބާއްވާ ސްޓާޓް އަޕް ގްރައިންޑް އަކީ ތައުލީމީ ފަރާތްތަކާއި، އަލަށް ވިޔަފާރިތައް ފަށަން މަސައްކަތް ކުރާ ފަރާތްތަކުގެ އިތުރުން އިންވެސްޓަރުން ހިމެނޭ ގޮތަށް ފެށި ރާއްޖޭގައި އޮންނަ އެންމެ ބޮޑު ސްޓާޓް އަޕް ކޮމިއުނިޓީ އެވެ.

ވާޗުއަލްކޮށް ބޭއްވި ސްޓާޓްއަޕް ގްރައިންޑް އިވެންޓުގައި ނައްޓުވަނީ އެ ކުންފުނި އުފެއްދުމުގައި ކަންކަން ހިނގާދިޔަ ގޮތް ހިއްސާކޮށްފަ އެވެ. އަދި ލޮޓީފައިލްސް ކުންފުނި ފުޅާ ކުރުމުގައި ދިމާވި ގޮންޖެހުންތައް ވެސް އޭނާ ކިޔައިދިނެވެ.

ލޮޓީފައިލްސްއަށް މައިކްރޮސޮފްޓްގެ ވެންޗާ ފަންޑު އެމް12 އިން ނުވަ މިލިއަން ޑޮލަރުގެ ފަންޑިން އިންވެސްޓްކޮށްފައިވެ އެވެ. އޭގެ ތެރޭގައި "500 ސްޓާޓްއަޕްސް"ގެ ހިއްސާއެއް ވެސް ހިމެނެ އެވެ.

މި ސްޓާޓް އަޕް ކޮމިއުނިޓީން އަންނަނީ، ރާއްޖޭގައި ސްޓާޓް އަޕް ކުންފުނިތައް އުފައްދައި، އެ ކުންފުނިތައް ހިންގާނެ ގޮތުގެ މައުލޫމާތު ފޯރުކޮށް ގިނަ ފުރުސަަތުތައް ހޯދައިދެމުންނެވެ.