ކާފިއު ގަޑީގައި ނުކުމެ އުޅުނު 731 މީހަކު ޖޫރިމަނާ ކުރި: އެޗްއީއޯސީ

މާލޭގައި ކާފިއު ހިންގާފައިވާ ގަޑިތަކުގައި ހުއްދައަކާ ނުލައި މަގުމައްޗަށް ނުކުމެ އުޅުނު 700 އަށް ވުރެ ގިނަ މީހުން ޖޫރިމަނާ ކޮށްފައިވާ ކަމަށް ހެލްތު އިމަަޖެންސީ އޮޕަރޭޝަން ސެންޓާ (އެޗްއީއޯސީ) އިން މިއަދު ބުނެފި އެވެ.

އެ އިދާރާ އިން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ކޮވިޑާ ގުޅިގެން އަޅާފައިވާ ފިޔަވަޅުތަކާ އެއްގޮތަަށް މީހުން އަމަލު ކުރޭތޯ ބެލުމަށް ފުލުހުންނާއި އެމްއެންޑީއެފް ގުޅިގެން ކުރާ މަސައްކަތުގެ ތެރޭގައި އިއްޔެ 6:00 އިން އޭގެ ކުރީ ރޭ 6:00 އާ ހަމައަށް ގިނަ ބަޔަކަށް ފިޔަވަޅު އަޅަން ޖެހުނު ކަމަށެވެ.

އެގޮތުން މާސްކު ނާޅާ އުޅުމުގެ ސަބަބުން 208 މީހަކު ޖޫރިމަނާ ކޮށްފައިވާ ކަމަށާއި ކާފިއު ގަޑިތަކުގައި މަގުމަތީ އުޅުމުގެ ސަބަބުން 731 މީހަކު ޖޫރިމަނާ ކޮށްފައިވާ ކަމަށް މަބްރޫކް ވިދާޅުވި އެވެ.

ކެފޭތަކާއި، ސެލޫން، ޖިމް އަދި ފިހާރަ ފަދަ ވިޔަފާރި ކުރާ 74 ތަނަކަށް ފިޔަވަޅު އަޅާފައިވާ ކަމަށް ވެސް މަބްރޫކް ވިދާޅުވި އެވެ.

"[ފިޔަވަޅު އެޅި ތަންތަނުގެ ތެރޭގައި] އެސްޓެބްލިޝްމަންޓުތަކާއި އެތަނުން ހިދުމަތް ހޯދަން އުޅުން މީހުން ވެސް ހިމެނޭ،" މަބްރޫކް ވިދާޅުވި އެވެ.

ރާއްޖޭގައި ކޮވިޑް-19 ގެ ހާލަތު ވަރަށް ބޮޑަށް ގޯސްވެފައިވާތީ ހަވީރު 4:00 އިން ހެނދުނު 8:00 އަށް މާލެ ސަރަހައްދުގައި ކާފިއު ހިންގުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ނިންމައިފަ އެވެ. ކާފިއު ނޫން ގަޑިތަކުގައި ވެސް ބޭރަށް ނިކުމެ އުޅެވޭނީ ފުލުހުންގެ ފަރާތުން ނަގާ ހާއްސަ ހުއްދައަކާ އެކުގަ އެވެ.

އެގޮތުން ވިޔަފާރިތަކަށް ޑެލިވަރީ ހިދުމަތް ދިނުމަށާއި ކޮންމެ ގޭބިސީއަކަށް ދެ ހުއްދަ ދިނުމަށް ފުލުހުން ވަނީ ނިންމައިފަ އެވެ. އެއާ ހިލާފުވާ ފަރާތްތައް 5000ރ. އިން ޖޫރިމަނާ ކުރުމަށް ވެސް ވަނީ ނިންމައިފަ އެވެ.