ކުޅުދުއްފުށީގައި މާބަނޑު މީހެއްގެ އޯވަރީން ބޮޑު ސިސްޓެއް ނަގައިފި

ހދ. ކުޅުދުއްފުށީ ރީޖަނަލް ހޮސްޕިޓަލަށް ދުވަސްނުފުރައި ވިހަން ދިޔަ މާބަނޑު މީހެއްގެ އޯވަރީން ބޮޑު ސިސްޓެއް ނަގައި ބޮޑު އޮޕަރޭޝަނެއް ކޮށްފި އެވެ.

އެ ހޮސްޕިޓަލްގެ މެނޭޖަރު އަހުމަދު ދާއޫދު މިއަދު ވިދާޅުވީ ރ. ހުޅުދުއްފާރުން ޑޮކްޓަރަށް ދައްކަން ދިޔަ އަންހެނެއްގެ ސްކޭން ހެދިއިރު ވާތްފަރާތު އޯވަރީގައި ވަރަށް ބޮޑު ސިސްޓެއް އިންކަން އެނގުނު ކަމަށެވެ.

އެހެންވެ، މިިދިޔަ މަހުގެ 27 ވަނަ ދުވަހު ކުރި ދެ ގަޑިއިރަށް ދެމިގެންދިޔަ އޮޕަރޭޝަނުގައި 24 ސެންޓިމީޓަރު ދިގު އަދި 20 ސެންޓިމީޓަރު ފުޅާ ސިސްޓެއް ނެގި އެވެ. އެކަން ކުރުމުގައި ތިން ޕައިންޓުގެ ލޭ އަޅަންޖެހުނު ކަމަށް ހޮސްޕިޓަލުން ބުންޏެވެ.

އެ އޮޕަރޭޝަން ކުރެއްވީ ކުޅުދުއްފުށީ ހޮސްޕިޓަލްގެ އަންހެނުންގެ ބަލިތަކާ ބެހޭ ހާއްސަ ޑޮކްޓަރު، ޑރ. ލުތުފީ ބާޝާ އެވެ.

"މަންމަ އާއި ދަރިފުޅު މިހާރު ވަނީ ހޮސްޕިޓަލުން ދޫކޮށްލާފައި،" ދާއޫދު ވިދާޅުވި އެވެ.

އޭނާ ވިދާޅުވިގޮތުގައި، މިއީ މާލެ ސަރަހައްދު ފިޔަވައި އެހެން ތަނެއްގައި ކުރި މިފަދަ އެންމެ ބޮޑު އެއް އޮޕަރޭޝަނެވެ.