ކެޓްރީނާ އާއި ވިކީ ރައްޓެހިވެގެން އުޅޭކަން ހާޝް އަށް ކަށަވަރު

ބޮލީވުޑްގެ ތަރިން ކަމަށްވާ ކެޓްރީނާ ކައިފާއި ވިކީ ކޯޝަލް ލޯބީގެ ގޮތުން ގުޅިގެން އުޅޭ ވާހަކަ އިންޑަސްޓްރީގައި މިހާރު އަލެއް ނޫނެވެ. މި ވާހަކަ ދެކެވޭތާ މިހާރު ދެ އަހަރަށް ވުރެ ގިނަ ދުވަސްވެދާނެ އެވެ.

ތަފާތަކީ ރައްޓެހިވެގެން އުޅޭކަން އަމިއްލަ އަށް ދެ ތަރިން ކަށަވަރުކޮށްނުދިނުމެވެ. އެކަމަކު އިންސްޓަގްރާމްގައި ދެ މީހުން ބަދަލުކުރާ ކޮމެންޓްތަކާއި ފޮޓޯތަކުން ވެސް ކެޓްރީނާ އާއި ވިކީއާ ދެމެދު މިހާރު އެކުވެރި ކަމަށް ވުރެ ގާތް ގުޅުމެއް އޮތް ކަމަށް ގިނަ ފޭނުން ވެސް ގަބޫލުކުރެ އެވެ.

މި ދެ މީހުންގެ ގުޅުމުގެ ވާހަކަ މީޑިއާތަކުގައި ދެކެވެމުން އަންނިކޮށް، އެކްޓަރު އަނިލް ކަޕޫރްގެ ފިރިހެން ދަރިފުޅު ހާޝްވަރްދަން ކަޕޫރް މި ހަފުތާގައި ޒޫމް ޓީވީ އަށް ދިން އިންޓަވިއުއެއްގައި ވަނީ ވިކީ އާއި ކެޓްރީނާ ރައްޓެހިވެގެން އުޅޭކަމާ މެދު އޭނާ އެއްވެސް ޝައްކެއް ނުކުރާ ކަމަށް ބުނެފަ އެވެ.

އެ ޗެނެލްގެ "ބައި އިންވައިޓް އޮންލީ" ސީޒަން 2ގެ އެޕިސޯޑެއްގައި މެހުމާނެއްގެ ގޮތުގައި ބައިވެރިވުމުން ހާޝްއާ ކުރި އެއް ސުވާލަކީ ރައްޓެހިވެގެން އުޅޭ ކަމަށް އަޑުއަރާފައިވާ ތަރިންގެ ތެރެއިން ތެދެއްކަން ނުވަތަ ހަމައެކަނި ޕީއާރަށް އަރުވާ އަޑެއް ކަމަށް ދެކެނީ ކޮން ތަރިންނެއް ގުޅުމުގެ ވާހަކަތޯ އެވެ؟

ޖަވާބުގައި ހާޝް ބުނީ އެއީ ހަމައެކަނި އަރުވާ އަޑެއް ނޫން ކަމަށާއި ކެޓްރީނާ އާއި ވިކީ އުޅެނީ ރައްޓެހިވެގެންކަން އޭނާ ގަބޫލުކުރާ ކަމަށެވެ. އެ ޖަވާބާ އެކު އަނެއްކާ މައްސަލަގަނޑެއް ނުކުމެދާނެތޯ އެހުމުން ބަތަލާ ސޯނަމް ކަޕޫރްގެ ކޮއްކޮ ހާޝް ބުނީ ތެދެއް ބުނެގެން މައްސަލައަކަށްވާން ނުޖެހޭ ކަމަށެވެ.

ބޮލީވުޑްގައި މިހާރު އެންމެ ބާރަށް ކުރިއަރަމުން އަންނަ ޒުވާން އެކްޓަރުންގެ ތެރޭގައި ހިމެނޭ ވިކީ، 33، އާއި ކެޓްރީނާ، 37، ގެ ލޯބީގެ ވާހަކަ ގަދަވެފައިވާ އިރު ދެ ތަރިން އަދި އެކީގައި ފިލްމަކުން ފެނިފައެއް ނުވެ އެވެ.

ކެޓްރީނާ ކުރިން ރައްޓެހިވި ބޮލީވުޑްގެ ތަރިންނަކީ ސަލްމާން ޚާނާއި ރަންބީރް ކަޕޫރެވެ. ރަންބީރާ އޭނާ ރައްޓެހިވީ، ސަލްމާނާ ރައްޓެހިވެގެން އުޅޭތާ ގިނަ ދުވަސްތަކެއް ފަހުން އަމިއްލަ އަށް އެ ގުޅުމުގައި ސިއްކަ ޖެހުމަށް ފަހު އެވެ. ވަކިވި ނަމަވެސް ސަލްމާނާއި ކެޓްރީނާއާ ދެމެދު އަބަދު ވެސް ޕްރޮފެޝަނަލް ގުޅުން ހަމަ ކުރިއެކޭ އެއްގޮތަށް އޮވެ އެވެ. ދެ ތަރިންގެ އަތުގައި މިހާރު ވެސް އެކީގައި ކުޅޭ ފިލްމެއް އެބަ އޮތެވެ. އެއީ "ޓައިގާ" ސީރީޒްގެ ތިން ވަނަ ފިލްމެވެ.