ކުއްލި ހާލަތުތަކުގައި "100" އަށް ގުޅުމުން މިހާރު އެމްބިއުލާންސް ލިބޭނެ

އިމަޖެންސީ މެޑިކަލް ސާވިސްގެ ދަށުން "100" އަށް ގުޅުމުން މިހާރު އެމްބިއުލާންސް ލިބޭނެ ކަމަށް ހެލްތު އިމަަޖެންސީ އޮޕަރޭޝަން ސެންޓަރު (އެޗްއީއޯސީ) އިން މިއަދު ބުނެފި އެވެ.

އެ އިދާރާ އިން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު، މަބްރޫކް އަޒީޒް ވިދާޅުވީ ހެލްތު މިނިސްޓްރީ އާއި އެމްއެންޑީއެފް ގުޅިގެން މިހާރު އިމަޖެންސީ މެޑިކަލް ސާވިސް ފޯރުކޮށްދެމުން އަންނަ ކަމަށެވެ. އޭގެ ދަށުން ކުއްލި ހާލަތްތަކުގައި "100" އަށް ގުޅައިގެން އެމްބިއުލާންސް ލިބޭނެ ކަމަށް މަބްރޫކް ވިދާޅުވި އެވެ.

"އިމަޖެންސީ މެޑިކަލް ސާވިސް އުފެއްދުމުގެ ވިސްނުމަކީ ފުޅާ ދާއިރާއެއްގައި އެމްބިއުލާންސްގެ ހިދުމަތަކީ ވަކިކުރެވިފައި އޮންނަ ރިލެޔަބަލް ސާވިސްއަކަށް ހެދުން. އެހެން ނަމަވެސް މީގެ ފުރަތަމަ ފޭސް ކަމަށް ވާތީ ފޯކަސް ކުރަމުން ގެންދަނީ ކޮވިޑަަށް ޕޮޒިޓިވް ވެފައިވާ އިމަޖެންސީ ކޭސްތަކުގެ އެމްބިއުލާންސް ސާވިސްގެ ގޮތުގައި،" އޭނާ ވިދާޅުވި އެވެ.

ކޮވިޑް-19 އަށް ޕޮޒިޓިވްވެފައިވާ މީހުންގެ ތެރެއިން ހާލު ބޮޑުވެ، އިމަޖެންސީގައި ފަރުވާދޭން ޖެހޭ ފަދަ މީހުންނަށް ހާއްސަކޮށް އިމަޖެންސީ މެޑިކަލް ސާވިސް ފެށިއިރު، މި މަހުގެ ކުރީކޮޅު، ކޮވިޑް-19 ގައި އުމުރުން 10 އަހަރުގެ ކުއްޖަކު މަރުވެފައި ވަނީ އެމްބިއުލާންސް ލަސްވެ، ފަރުވާ ނުދެވިގެންނެވެ. އެ މައްސަލައިގައި އެތައް ބަޔަކު ރުޅިގަދަވެ، ސަރުކާރު "ހޫނުފެނަށް" ވެއްޓުމުން ތަހުގީގެއް ކޮށް، އިހުމާލުވާ ދިމާތައް މިހާރު އަންނަނީ ހޯދަމުންނެވެ.

އިމަޖެންސީ ހާލަތުތަކުގައި އަވަހަށް އެމްބިއުލާންސް ފޯރުކޮށް ދިނުމަށް އާ ހިދުމަތެއް ފެށިއިރު، މަބްރޫކް ވަނީ އިމަޖެންސީ ނޫން ހާލަތްތަކުގައި އެ ހިދުމަތް ބޭނުންނުކުރުމަށް އެދިވަޑައިގެންފަ އެވެ.