ނަރުދޫގައި ދެ ފާރު ދޭތެރޭ ކުއްޖަކު ތާށިވުމުން ފާރު ތަޅާލައިގެން ސަލާމަތްކޮށްފި

ށ. ނަރުދޫގައި ދެ ފާރު ދޭތެރޭ ކުއްޖަކު ތާށިވުމުން ފާރު ތަޅާލައިގެން ކުއްޖާ ސަލާމަތްކޮށްފި އެވެ.

އެ ރަށު ކައުންސިލްގެ ރައީސް މުހައްމަދު މުސްތަރުސިދު ވިދާޅުވީ ހަތަރު އަހަރުގެ ފިރިހެން ކުއްޖާ ތާށިވީ ގޭގެ އިންފާރާއި ގޭގެ ފާރާ ދޭތެރޭގައި ކަމަށެވެ. އެ ދެ ފާރު ރާނާފައި ހުރި ގޮތުން، ބޭރަށް ހުންނަ ހިސާބުން ހުންނަނީ ފުޅާކޮށް، އެތެރެއަށް ވަދެވޭ ގޮތަށް ކަމަށާއި އެތެރެއަށް ދިޔަ ވަރަކަށް ވަނީ ހަނި ކަމަށް އޭނާ ވިދާޅުވި އެވެ.

ކުއްޖާ އެ ދޭތެރޭގައި ތާށިވީ ދެ ފާރު ދޭތެރެއަށް ވަދެ މާބޮޑަށް އެތެރެއަށް ވަނުމުންނެވެ.

ކައުންސިލްގެ ރައީސް ވިދާޅުވި ގޮތުގައި މީގެ ގާތްގަނޑަކަށް ދޮޅު ގަޑިއިރުކުރިން ހިނގި ހާދިސާގައި ކުއްޖާ ސަލާމަތްކުރީ ރަށުގެ ގިނަ ބައެއްގެ މަސައްކަތުންނެވެ. ކުއްޖާ ސަލާމަތްކުރީ އެ ކުއްޖާ އަށް ނުކުމެވޭ ވަރަށް ފާރުން ބާގަނޑެއް ހަދައިގެންނެވެ.

"ކުއްޖާގެ މަންމަ ކާން ވެގެން ހުއްޓައި މި ކަން ހިނގީ. އިދާރަކުރެއްވިއްޔާ ކުއްޖާއަކަށް ނުލިބޭ އެއްވެސް އަނިޔާއެއް. ގައިގައި ހިރަފުސް ޖެހިފައި ހުރީ. އިތުރު ކަމެއް ނުވޭ،" އޭނާ ވިދާޅުވި އެވެ.

ކުއްޖާ ތާށިވެފައި ހުރި އިރު ނަގާފައިވާ ފޮޓޯއެއް ފެންނަ ގޮތުގައި ކުއްޖާ ހުރީ ދެ ފާރު ދޭތެރޭ ކޮޅަށެވެ.