އީރާންގެ ދިފާއަށް ނިއުކްލިއާ ހަތިޔާރު ބޭނުމެއް ނޫން

އީރާންގެ ބިމާއި ގައުމީ މިނިވަންކަން ދިފާއު ކުރުމަށް، ނިއުކްލިއާ ހަތިޔާރު ފަދަ ފަނާކުރަނިވި ބާވަތުގެ އެއްވެސް ހަތިޔާރެއް ބޭނުން ނުވާ ކަމަށާއި، އެ ގައުމުގެ ނިއުކްލިއާ ޕްރޮގްރާމްގެ ތެރެއިން އެފަދަ ހަތިޔާރެއް އުފައްދަން ވެސް މަސައްކަތް ނުކުރާ ކަމަށް، އީރާންގެ ރައީސް ހަސަން ރޫހާނީ ވިދާޅުވެއްޖެ އެވެ.

އީރާނުގައި އަލަށް ބަނދެފައިވާ ދެ މަނަވަރު، ކަނޑުގެ ސިފައިންގެ ހިދުމަތަށް ނެރެދެއްވަމުން މިއަދު ދެއްކެވި ވާހަކަފުޅުގައި ރޫހާނީ ވިދާޅުވީ ހުޅަނގުގެ ގައުމުތަކާ އެކު ގާއިމުކޮށްފައިވާ ނިއުކްލިއާ މުއާހަދާ ތަންފީޒުކުރުމުން، ސަރަހައްދުގެ ހަމަޖެހުމާއި އަމާންކަން ކަށަވަރުވެގެންދާނެ ކަމަށެވެ.

ރޫހާނީ ވިދާޅުވި ގޮތުގައި އީރާނަކީ އެއްވެސް އިރެއްގައި ސަރަހައްދީ ހަމަޖެހުން ނަގައިލުމަށް މަސައްކަތްކުރި ގައުމެއް ނޫނެވެ. އަދި އީރާނާ އެކު ގާއިމުކޮށްފައިވާ ނިއުކްލިއާ މުއާހަދާގެ އެހެން ބައިވެރިން ވެސް، އެ މުއާހަދާ އަށް ފުރިހަމަ އަށް އަމަލުކުރާ ނަމަ، އީރާނުން ވެސް އެ މުއާހަދާގެ ހުރިހާ ކަމެއް ފުރިހަމަ އަށް ތަންފީޒު ކުރާނެ ކަމަށް ވެސް ރޫހާނީ ވިދާޅުވި އެވެ.

ސަރަހައްދުގައި ހަނގުރާމައެއް ފަށަން ބޭނުން ނުވިޔަސް، އަދި ހަމަޖެހުން ނަގައިލަން މަސައްކަތް ނުކުރި ނަމަވެސް، އީރާނާ ދެކޮޅަށް ބަޔަކު އަދާވާތްތެރިވާ ނަމަ، އީރާނުގައި ހުރި އެންމެ މަތީ ކުޅަދާނަކަމަކާ އެކު އެ އުދުވާނަކަށް ރައްދު ދޭނެ ކަމަށް ވެސް ރޫހާނީ ވިދާޅުވި އެވެ.

އަނެއްކޮޅުން، ވިއެނާގައި ބޭއްވި، އީރާންގެ ނިއުކްލިއާ މުއާހަދާއާ ގުޅޭ ވާހަކަތަކާ ބެހޭ ގޮތުން، އީރާންގެ ހާރިޖިއްޔާގެ ތަރުޖަމާނު ސައީދު ހަތީބު ޒާދާ ވިދާޅުވީ، ނިއުކްލިއާ މުއާހަދާގެ މަޝްވަރާތަކާ މެދު މުޅިން އެއްބަސްވުމަކަށް ނާދެވުނު ނަމަވެސް، މަޝްވަރާތަކުން ކުރިއެރުން ލިބިފައިވާ ކަމަށެވެ. އެހެން ނަމަވެސް، ހައްލުކުރަން ޖެހޭ މުހިންމު ބައެއް ކަންތައް އެބަހުރި ކަމަށް ވެސް އޭނާ ވިދާޅުވި އެވެ.

މިފަހަރުގެ ވާހަކަތަކުން ލިބުނު އެންމެ ބޮޑު ކުރިއެރުމަކީ، އީރާނުން ކުރާ ތެލާއި ހަކަތައިގެ ވިޔަފާރި އާއި ބޭންކުތަކާއި އިންޝޫރެންސް ކުންފުނިތަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލުމަށް އެއްބަސްވުމެވެ.

އީރާންގެ ނިއުކްލިއާ ޕްރޮގްރާމް ވަރަށް ބޮޑަށް ތަރައްގީކޮށް، ނިއުކްލިއާ ހަތިޔާރު އުފެއްދުމާ ދާދި ގާތްވެފައިވާ ކަމަށް ދެކެވޭ ވާހަކަތަކާ ގުޅޭ ގޮތުން، ބައިނަލްއަގްވާމީ އެޓޮމިކް ހަކަތައާ ބެހޭ އިދާރާގެ ޑިރެކްޓަ ޖެނެރަލް ރަފައޭލް މާރިޔާނޯ ވިދާޅުވީ، އެފަދަ ކަމެއްގެ މައުލޫމާތު ލިބިފައި ނުވާ ކަމަށެވެ.

އީރާނުން އަބަދުވެސް ބުނަމުން އަންނަނީ، އެ ގައުމުގައި ނިއުކްލިއާ މަޝްރޫއެއް ފަށާފައިވަނީ، ނިއުކްލިއާ ހަތިޔާރު އުފެއްދުމުގެ ބޭނުމުގައި ނޫން ކަމަށާއި، އީރާނުން މަސައްކަތް ކުރަނީ، އެ ގައުމުގެ ކަރަންޓު ވިއުގަ ތަރައްގީ ކުރަން ކަމަށެވެ. ނަމަވެސް އެމެރިކާ އިން އެކަން ގަބޫލެއް ނުކުރެ އެވެ. އޭގެ ބަދަލުގައި އެމެރިކާ އާއި އިޒްރޭލުން ތުހުމަތުކުރާ ގޮތުގައި، އީރާނުން މަސައްކަތްކުރަނީ ނިއުކްލިއާ ހަތިޔާރުގެ ގާބިލްކަން ހޯދައި، ސަރަހައްދުގެ އެހެން ގައުމުތަކުގެ މައްޗަށް ނުފޫޒު ފޯރުވާށެވެ.