ރޫހާނީގެ ފާޑުވިދާޅުވުން އީރާނުގެ ޕާލަމެންޓަށް

އީރާންގެ ނިއުކްލިއާ މުއާހަދާއާ ގުޅޭ ގޮތުން، ވިއެނާގައި ކުރަމުން އައި މަޝްވަރާތަކުން ނަތީޖާއެއް ނުނެރެވި، އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާނުލައި އަދިވެސް އޮތީ، ގާނޫނު ހަދާ މަޖިލީހުގެ ސަބަބުން ކަމަށް، ރައީސް ހަސަން ރޫހާނީ އިއްޔެ ވިދާޅުއްޖެ އެވެ.

އީރާންގެ ރައީސް ހަސަން ރޫހާނީ ވިދާޅުވި ގޮތުގައި، ނިއުކްލިއާ މަޝްވަރާތަކަށް ހުރަސް އެޅީ ގާނޫނު ހަދާ މަޖިލީހުގެ ތެރެއިންނެވެ. ދުނިޔޭގެ ބޮޑެތި ގައުމުތަކުން އީރާނާ އެކު 2015 ވަނަ އަހަރު ސޮއިކުރި، މުއާހަދާ އިން، 2018 ވަނަ އަހަރު އެމެރިކާ ވަކިވެފައިވާތީ، އަލުން އެމުއާހަދާ އަށް އަމަލުކުރުމާ ގުޅޭ ގޮތުން، މަޝްވަރާތައް ފެށީ މިއަހަރުގެ އެޕްރީލް މަހުގެ ތެރޭގަ އެވެ.

ނިއުކްލިއާ މަޝްވަރާތައް ފަށައިގެން ހަ ބުރެއްގެ މަތިން މަޝްވަރާ ކުރުމަށް ފަހު، ވާހަކަތައް މެދުކެނޑުނީ ޖޫން 20 ވަނަ ދުވަހުން ފެށިގެންނެވެ. ވާހަކަތައް މެދުކެނޑިފައިވަނީ، އީރާންގެ ރިއާސީ ދައުރު ނިމެން ކައިރިވެފައިވާތީ، އާ ރިއާސީ ދައުރު ފެށުމުގެ ކުރިން، ނިއުކްލިއާ މަޝްރޫއާ ބެހޭ ގޮތުން، ވަކި ގޮތެއް ނިންމުމުގެ ބާރު، އީރާންގެ ރައީސަށް ނުދިނުމަށް، ގާނޫނު ހަދާ މަޖިލީހުން ނިންމުމާ ގުޅިގެންނެވެ.

ރޫހާނީ ވިދާޅުވި ގޮތުގައި ނިއުކްލިއާ މުއާހަދާއާ ގުޅޭ ގޮތުން، ވިއެނާގައި ކުރެވުނު މަޝްވަރާތައް މިހާރު އޮތީ، ހުރިހާ ބައިވެރިންނަށް އެއްބަސްވެވޭ ހިސާބަށް އާދެވިފަ އެވެ. ނަމަވެސް، އީރާންގެ ގާނޫނު ހަދާ މަޖިލީހުން ވަނީ، ނިއުކްލިއާ މުއާހަދާގެ މަޝްވަރާތަކާ ބެހޭ ގޮތުން، އެ މުއާހަދާގެ އެހެން ބައިވެރިންނާއެކު އެއްވެސް އެއްބަސްވުމެއް ގާއިމުކުރުން މަނާކޮށްފަ އެވެ.

ގާނޫނު ހަދާ މަޖިލީހުން މިހާރު ނިންމާފައިވާ ގޮތުން، ނިއުކްލިއާ މަޝްރޫއާ ގުޅޭ ގޮތުން، އެ މުއާހަދާގެ ބައިވެރިންނާ އެކު އެއްބަސްވުމެއް ގާއިމުކުރާނީ، އިންތިހާބީ ރައީސް އިބްރާހީމް ރައީސީ މަގާމާ ހަވާލުވެވަޑައިގަތުމަށް ފަހުގަ އެވެ.

ރޫހާނީ ވިދާޅުވި ގޮތުގައި ގާނޫނު ހަދާ މަޖިލީހުން ހުރަސް ނޭޅި ނަމަ، އީރާނާ ދެކޮޅަށް އަޅާފައި ހުރި ދަތިކުރުމުގެ ފިޔަވަޅުތައް، މިއަހަރުގެ މާޗް މަހުގެ ތެރޭގައި އުވައިލެވުނީހެވެ. ނަމަވެސް، ގާނޫނު ހަދާ މަޖިލީހުން ހުރަސް އެޅުމުގެ ސަބަބުން، ނިއުކްލިއާ މަޝްވަރާތައް މިހާރު ވަނީ އުނދަގޫ މަރުހަލާއެއްގައި ކަމަށް ވެސް އޭނާ ވިދާޅުވި އެވެ.

އެމެރިކާގެ ހާރިޖިއްޔާ އިން ބުނި ގޮތުގައި އީރާންގެ ނިއުކްލިއާ މުއާހަދާގެ މަޝްވަރާތައް އަލުން ފެށުމަށް އެމެރިކާ އޮތީ ތައްޔާރަށެވެ. ނަމަވެސް ނިއުކްލިއާ މަޝްވަރާތަކުގައި ބައިވެރިވާ ޑިޕްލޮމޭޓަކު ވިދާޅުވި ގޮތުގައި، އާ ރައީސް މަގާމާ ހަވާލުވެވަޑައިގަތުމުގެ ކުރިން، ނިއުކްލިއާ މަޝްވަރާތައް އަލުން ފެށުމަށް އީރާން ބޭނުމެއް ނޫނެވެ.

އީރާންގެ ނިއުކްލިއާ މަޝްރޫއުގެ ތެރެއިން ނިއުކްލިއާ ހަތިޔާރެއް އުފެއްދުމުގެ ގާބިލްކަން ލިބުނަ ނުދިނުމަށްޓަކައި، އެމެރިކާ އާއި ވިލާތުގެ ގައުމުތައް ބައިވެރިވެގެން، އީރާނާ އެކު މުއާހަދާއެއްގައި ސޮއިކުރީ، އެމެރިކާގެ ކުރީގެ ރައީސް ބާރަކް އޮބާމާގެ ވެރިކަމުގައި 2015 ވަނަ އަހަރުގެ ތެރޭގަ އެވެ. އެ މުއާހަދާ އިން އެމެރިކާ ވަކިވީ، އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ވެރިކަމުގައި 2018 ވަނަ އަހަރުގެ ތެރޭގަ އެވެ.

ނަމަވެސް، މިއަހަރުގެ ޖެނުއަރީ މަހުގެ ތެރޭގައި އެމެރިކާގެ ރައީސްކަމުގެ މަގާމާ ހަވާލުވެވަޑައިގަތުމަށް ފަހު، ރައީސް ޖޯ ބައިޑެން ނިންމަވާފައިވަނީ އަލުން އެ މުއާހަދާގައި އެމެރިކާ ބައިވެރިވާށެވެ.