ކާފަރަށް ގޮވުން ހުއްޓުވަން އިބިލީހާ މަޝްވަރާކުރާކަށް ނުޖެހޭ: ބޮންޑޭ

އިސްލާމުންނާ ދިމާލަށް ކާފަރަށް ގޮވުން ހުއްޓުވަން އިބިލީހާ މަޝްވަރާ ކުރަން ނުޖެހޭނެ ކަމަށް ވިދާޅުވެ، ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑޭ)، ޖުމްހޫރީ ޕާޓީގެ ލީޑަރު ގާސިމް އިބްރާހީމަށް ވަރަށް ހުތުރުކޮށް ރައްދު ދެއްވައިފި އެވެ.

ސަރުކާރުގެ ފަރާތުން ތުޅާ ދާއިރާގެ މެމްބަރު ހިސާން ހުސައިން ރައްޔިތުންގެ މަޖިލީހަށް ހުށަހެޅުއްވި ބިލާ ބެހޭ ގޮތުން ސަރުކާރުން ޖުމްހޫރީ ޕާޓީއާ މަޝްވަރާނުކޮށް އޮވެދާނެ ކަމަށް ގަބޫލު ނުކުރައްްވާ ކަމަށް މެމްބަރަކު އިއްޔެ ވިދާޅުވި އެވެ. ބިލެއްދޫ ދާއިރާގެ މެމްބަރު އަހުމަދު ހަލީމް (ދޮންބިލެއް) ދެއްކެވި އެވާހަކަ ދޮގުކުރައްވައި ޖުމްހޫރީ ޕާޓީގެ ސެކްރެޓަރީ ޖެނެރަލް އަލީ އާރިފް ރޭ ވިދާޅުވީ އެފަދަ އެއްވެސް މަޝްވަރާއެއް ކޮށްފައި ނުވާ ކަމަށެވެ.

ޖޭޕީން އެހެން ބުނި ހަބަރު ހިއްސާކުރައްވައި ބޮންޑޭ މިއަދު ކުރެއްވި ޓްވީޓެއްގައި ވިދާޅުވީ އިސްލާމަކާާ ދިމާލަށް ކާފަރަށް ގޮވުން ހުއްޓުވަން، ރާއްޖެއަށް ރަލާއި އޫރުމަސް އެތެރެކުރަމުންދާ ފަރާތަކާ ނުވަތަ އިބިލީހާ މަޝްވަރާ ކުރާކަށް ނުޖެހޭނެ ކަމަށެވެ.

"އިސްލާމުންނާ ދިމާލަށް ކާފަރަށް ގޮވުން މަނާކުރުމަށްޓަކައި ޓަނުން ޓަނުން ރާއްޖެއަށް ބަނގުރާ އޫރުމަސް އެތެރެކުރަމުންދާ ފަރާތަކާ ނުވަތަ އިބިލީހާ ރައްޔިތުން ގެ ވޯޓުން އިންތިހާބުކޮށްފައިވާ އިސްލާމީ ދައުލަތެއްގެ ވެރިޔަކު މަސްވަރާކުރާކަށް ނުޖެހޭނެ އެވެ،" ޓްވީޓްގައި ބޮންޑޭ ލިއުއްވި އެވެ.

އޭނާގެ އެ ވާހަކައާ މެދު ޓުވިޓާގައި ބައެއް މީހުން ނުރުހުން ފާޅުކޮށް ރައްދު ދީފައި ވެ އެވެ. އޭގެ ތެރެއިން އެކަކު ސުވާލުކުރީ ވެރިކަން ބޭނުންވީމާ [ ގާސިމް އަރިހަށް ގޮސް] ސަލާންޖަހަން ޖެހޭތޯ އެވެ. ބޮންޑޭގެ ވާހަކަ އެއީ ނަފުރަތު އުފެއްދުން ނޫންތޯ ވެސް އޭނާ ސުވާލުކުރި އެވެ.

އެހެން މީހަކު ބުނީ އިސްލާމުންނާ ދިމާލަށް ކާފަރަށް ގޮވުން ހުއްޓުވަން ކަމަށް ވިދާޅުވެ ހަމަ އެ ނޭވާފައި މީހުންނަށް "އިބިލީސް" ކިޔާފަައިވާ ކަމަށެވެ.

"މިތާ އަހަރެމެން ހާާސިލްކުރަން މިއުޅެނީ ކޮން ކަމެއް،" އޭނާ ސުވާލުކުރި އެވެ.

ޓަނުން ޓަނުން ރާއްޖެއަށް ރާ އެތެރެކުރާތީ ކަންބޮޑުވާ ނަމަ އެތަކެތި ވެސް ހިމެނޭ ގޮތުން ދައުލަތަށް ނަގާ ޓެކްސް ފައިސާއިން ދޭ މުސާރަ ނުނަގާ ހުންނަން ބޮންޑޭއަށް ކެރޭނެތޯ ވެސް ރައްދު ދިން މީހަކު ސުވާލުކޮށްފައި ވެ އެވެ.

ސަރުކާރުން ހުށަހެޅި ބިލުގެ އެއް ވަނަ ނަމްބަރުގައިވާ ގޮތުން، އެ ބިލް ގާނޫނަކަށް ވުމުން، ވަކި މީހަކީ އިސްލާމްދީނާ ހިލާފަށް އުޅޭ މީހެއް ކަމަށް ނުވަތަ ދީނާ ދެކޮޅު މީހެއް ކަމަށް އާއްމު ތަނެއްގައި ބުނުން ވާނީ ޖަލު ހުކުމެއް އަންނާނެ ކުށަކަށެވެ. އެ މާއްދާ އެހެން އޮންނާތީ ބައެއް ދީނީ އިލްމުވެރިންނާއި އާއްމުން ވެސް ގެންދަނީ ކަންބޮޑުވުން ފާޅުކުރަމުންނެވެ. އެކަމާ ކަންބޮޑުވުން ފާޅުކުރާ ފަރާތްތަކުން ދެކޭ ގޮތުގައި އެއީ ރާއްޖޭގައި ފާޅުގައި އިސްލާމްދީނާ ދެކޮޅަށް ވާހަކަ ދައްކާ މީހުންނަށް ލިބިގެންދާނެ ބޮޑު މިނިވަންކަމަކަށް ވާނެ އެވެ.