ނިޔަފަތީގައި މައުލޫމާތު ރައްކާކޮށްދޭ ހިދުމަތެއް

ޒާތީ މުހިއްމު މައުލޫމާތުތައް ނިޔަފަތީގައި ރައްކާކޮށްލެވޭ ހިދުމަތެއް "މައިކްރޮޗިޕް މެނިކިއޯ" ގެ ނަމުގައި ދުބާއީގެ ސެލޫނަކުން ފަށައިފި އެވެ.

ގިނަ ބައެއްގެ މަގުބޫލުކަން ހޯދާފައިވާ ލެނޯ ބިއުޓީ ލައުންޖުން ދޭ ހިދުމަތަކީ "ސްމާޓް ނެއިލް" ގެ ހިދުމަތުގެ ގޮތުގައި ސިފަކުރެވެ އެވެ.

މި ހިދުމަތުން ކޮށްދޭ ކަމަކީ ނިޔަފަތީގެ މަތީގައި ބާއްވާއިލާ ކުޑަކުޑަ ޗިޕަކުން މީހާގެ މައުލޫމާތުތައް ރައްކާކޮށްދީ، އޭގެ ޒަރީރާ އިން ހިދުމަތްތައް ހޯދަން މަގުފަހިކޮށް ދިނުމެވެ.

މި ޗިޕް ނިޔަފަތީގައި ހަރުކޮށް، ދެން އެ ފޮރުވޭ ގޮތަށް ނިޔަފަތި ރީތިކޮށްލެވޭނެ އެވެ. އޭރުން ނިޔަފަތީގައި ޗިޕެއް އިންކަން ނުވެސް އެނގޭނެ އެވެ.

ނިއާ ފީލްޑް ކޮމިއުނިކޭޝަން ޓެކްލޮނޮޖީ ބޭނުންކޮށްފައިވާ "ސްމާޓް ނެއިލް" ގައި ރައްކާކުރެވޭ މައުލޫމާތުގެ ތެރޭގައި މީހާގެ ފުރިހަމަ ނަމާއި ފޯނު ނަމްބަރާއި ބޭނުންރާ ސޯޝަލް މީޑިއާ އެކައުންޓްތަކަށް އެކްސެސްވާން ބޭނުންކުރާ މައުލޫމާތުތައް ހިމެނެ އެވެ. އެހެންވެ މިއީ ޑިޖިޓަލް ބިޒްނެސް ކާޑެއްގެ ގޮތުގަ އާއި އިންސްޓަގްރާމް ފަދަ ޕްލެޓްފޯމްތަކަށް ވަންނަން ވެސް ބޭނުންކުރެވޭނެ އެއްޗެކެވެ.

މި ހިދުމަތާ ބެހޭ ގޮތުން ލެނޯ ބިއުޓީ ލައުންޖްގެ ވެރިޔާ ނޯރް މަކްރެމް ސީއެންއެން އަށް ވިދާޅުވީ "ސްމާޓް ނެއިލް" އަކީ މިދިޔަ އަހަރު ކުރިމަތިލާން ޖެހުނު ކޮވިޑް-19 ގެ ބަލިމަޑުކަމުގެ ތެރޭގައި އައި ހިޔާލަކާ އެކު ތައާރަފުކުރި ހިދުމަތެއް ކަމަށެވެ.

"މިހާރު މުޅި ޑިޖިޓަލް ދުނިޔެއެއްގެ ތެރޭގައި އުޅޭ އިރު އެބަޖެހޭ ކަންކަން ކުރެވޭ ގޮތްތައް ވީހާ ވެސް ޓެކްނޮލޮޖީ ބޭނުންކޮށްގެން ފަސޭހަކުރަން. އެގޮތުން ފެށުނު ކަމެއް މިއީ،" އޭނާ ބުންޏެވެ.

ނޯރް ބުނި ގޮތުގައި ހިދުމަތަށް މިހާރު އަންނަނީ ރަނގަޅު ތަރުހީބެއް ވެސް ލިބެމުންނެވެ.

"އާންމު ދިރިއުޅުމުގައި ކުރާ ކަންކަމާ ގުޅިފައި ހުންނަ ކަންކަމުގެ މައުލޫމާތު ފިޒިކަލްކޮށް ގެންގުޅުމަށް ވުރެ ފަސޭހަ ގޮތެއް ގެނައުން މީގެ އެއް ބޭނުމަކީ،" އޭނާ ވިދާޅުވި އެވެ. "އަހަރެމެންގެ އަމާޒަކީ ކުރިއަށް އޮތް ތަނުގައި ސްމާޓް ނެއިލް މެދުވެރިކޮށް ފައިސާގެ މުއާމަލާތްތައް ވެސް ކުރެވޭ ގޮތް ހެދުން. މިސާލަކަށް ރެސޓޯރަންޓްތަކުގެ ޑިޖިޓަލް މެނޫ އިން އޯޑަރުކޮށް ކޮންޓެކްޓްލެސް ޕޭމަންޓް ހެދުން ކަހަލަ ކަންކަން ކުރެވޭނެ ގޮތް ހެދުން."

ނޯރް ވިދާޅުވި ގޮތުގައި މީގައި އެންމެ ބޮޑު ގޮންޖެހުމަކީ ނިޔަފަތި ކަހަލަ ކުޑަކުޑަ އެއްޗަކަށް ފިޓްވާ ވަރަށް ވީހާ ވެސް ގިނަ މައުލޫމާތު ރައްކާކުރެވޭ ކަހަލަ ޗިޕެއް އުފެއްދުމެވެ.

"އެކަމަކު އެކަން ކުރެވޭނެ. މިއީ އަދި ފެށުމެއް،" އޭނާ ވިދާޅުވި އެވެ.

"މައިކްރޮޗިފް މެނިކިއޯ" ދޭން ފެށި ފަހުން މިހާތަނަށް 500 ވުރަ ގިނަ މީހުން ހިދުމަތް ހޯދާފައިވާ ކަމަށް ލެނޯ ބިއުޓީ ލައުންޖުން ބުންޏެވެ. އެ މެނިކިއޯ ސެޝަނެއްގެ އަގަކީ 250 ދިރުހަމް (68 ޑޮލަރު) އެވެ.