ސިވިލް ސާވިސްއާ ވަކިން ފޮރިން ސާވިސް ހިންގަން ބިލެއް ހުށަހަޅައިފި

ހާރިޖީ ދާއިރާގައި މަސައްކަތްކުރާ މުވައްޒަފުން، ސިވިލް ސާވިސް އިން ވަކިކޮށްް، ހާރިޖީ ހިދުމަތަކީ ވަކި ދާއިރާއަކަށް ހަދަން ސަރުކާރުން ރައްޔިތުންގެ މަޖިލީހަށް ހުށަހެޅި ބިލުގެ ބަހުސް މިއަދު ފަށައިފި އެވެ.

ސަރުކާރުގެ ފަރާތުން ހެންވޭރު ދެކުނު ދާއިރާގެ އެމްޑީޕީގެ މެމްބަރު ހުސައިން ޝަހީމް (އަނދުން ހުސައިން) ހުށަހެޅުއްވި ބިލުގައިވާ ގޮތުން އެ ބިލް ގާނޫނަކަށް ވުމާއެކު ފޮރިން ސާވިސްގެ ހުރިިހާ މުވައްޒަފުން ސިވިލް ސާވިސް އިން ވަކިވާނެ އެވެ.

ބިލުގެ މަގުސަދުތަކުގެ ގޮތުގައި މައިގަނޑު ހަތް ކަމެއް ބަޔާން ކޮްފައި ވެ އެވެ. އޭގެ ތެރެއިން ފުރަތަމަ މަގުސަދަކީ ރާއްޖޭގެ މިނިވަންކަމާއި ސަރަހައްދުގެ ރައްކާތެރިކަން ދެމެހެއްޓުމަށް ރައީސުލްޖުމްހޫރިއްޔާ އަށް އެހީތެރިވާން ޕްރޮފެޝަނަލް ފޮރިން ސާވިސް އެއް ގާއިމު ކުރުމެވެ. ރާއްޖޭގެ ސިޔާދަތަށް އިހުތިރާމްކުރުން އިތުރުކުރުމާ އެކު ބައިނަލްއަގްވާމީ މުޖުތަމައަށް އަދާކުރަން ޖެހޭ ޒިންމާތައް އަދާކުރަން ރައީސަށް އެހީތެރިވުމަކީ ވެސް ބިލުގައިވާ ގޮތުން ފޮރިން ސާވިސްގެ މަގުސަދެކެވެ.

ބިލުގެ އެހެން މަގުސަދުތަކުގެ ތެރޭގައި ރާއްޖޭގެ ހާރިޖީ ސިޔާސަތު ތަންފީޒުކުރުމަށްޓަކައި ހުނަރުވެރި އިލްމީ ފަރާތްތަކެއްގެ މައްޗަށް އެކުލެވޭ ފޮރިން ސާވިސް އެއް ގާއިމްކުރުން ހިމެނެ އެވެ. ފޮރިން ސާވިސް އަށް މުވައްޒަފުން އައްޔަންކުރުމާއި ވަކިކުރުމުގެ އުސޫލުތައް ބަޔާން ކުރުމަކީ ވެސް މަގުސަދެކެވެ.

ބިލުގެ އިބްތިދާއީ ބަހުސްގައި މިއަދު ބައިވެރިވެވަޑައިގެންނެވި އެމްޑީޕީގެ ގިނަ މެމްބަރުން އެ ބިލަށް ތައުރީފުކުރެއްވި ނަމަވެސް ބައެއް މެމްބަރުން ވިދާޅުވީ، އިސްލާހުކުރަން ޖެހޭ ގިނަ ކަންތައްތަކެއް އެބަހުރި ކަަމަށެވެ.

މެދު ހެންވޭރު ދާއިރާގެ މެމްބްރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމް ވިދާޅުވީ، ފޮރިން ސާވިސްގެ މަސައްކަތްތައް ކުރަން ބިލުގެ ސަބަބުން ފަސޭހަވާނެ ކަމަށެވެ. މި ބިލުން ކުރާ ކަމަކީ އޭނާ ވިދާޅުވިގޮތުގައި، ކެރިއާ ފޮރިން ސާވިސް އޮފިސަަރުންތަކެއް އުފައްދައި ހާރިޖީ ސިޔާސަތުތައް ހިންގުމުގެ ބާރު އެ ފަރާތްތަކަށް ދިނުމެވެ.

"ސަރުކާރު ބަދަލުވާ ކޮންމެ ފަހަރަކު އަޅުގަނޑުމެންގެ ސަފީރުންތައް ކަނޑާލައި، އެކިއެކި ތަންތަނަށް ލައި ފޮރިން ސާވިސް އޮފިސަރުން، އަޅުގަނޑުމެންގެ ދައުލަތުން އެތައް ހަރަދެއް ކޮންގެން އަަޅުގަނޑުމެން އެ ހިސާބަށް ގެންދިޔަ އެތައް ބައެއް، ފޮރިން ސާވިސް އޮފިސަރުންތަކެއް ކަނޑާލައި ސިޔާސީ ބައެއްގެ އަތްމައްޗަށް އަޅުގަނޑުމެންގެ ފޮރިން ސާވިސް، މުޅިން އެހެން ދިމާލަކަށް ދިއުން ހުއްޓުވުމަށް އަޅުގަނޑު ދެކޭ ގޮތުގައި ވަރަށް ބޮޑު ބާރެއް [ބިލުން] އެބަ އަޅާ،" އާޒިމް ވިދާޅުވި އެވެ.

ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވީ އެ ބިލް ގާނޫނަކަށް ވުމުން ރާއްޖޭގެ ފޮރިން ސާވިސްގެ ފެންވަރު ރަނގަޅުވެ، ހިންގުމަށް ހެޔޮ ބަދަލުތަކެއް އަންނަނާނެ ކަމަށެވެ.

މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވީ، ބިލަށް އޭނާ ތާއީދުކުރައްވާ ކަމަށާއި ނަމަވެސް އިސްލާހުކުރަން ޖެހޭ ގިނަ ކަންތައްތަކެއް އެބަހުރި ކަމަށެވެ. އެގޮތުން ފޮރިން ސާވިސްއަށް މީހުން އައްޔަން ކުރުމާއި ވަކިކުރުމުގައި ފޮރިން މިނިސްޓަރަށް ދީފައިވާ ބޮޑެތި ބާރުތައް އެއީ އިސްލާހުކުރަން ޖެހޭ ކަމެއް ކަަމަށް އޭނާ ވިދާޅުވި އެވެ.

"މި ސާވިސް ވަކިވާ އިރުގައި ކިތަންމެ ގާބިލް، ކިތަންމެ އިތުބާރު ކުރެވޭ ބޭފުޅެއްގެ ބެލުމުގެ ދަށުގައި އޮތް ކަމުގައި ވިޔަސް މިއީ މުސްތަގުބަލަށް ހެދޭ ގާނޫނެއް. ގާނޫނުގައި ޗެކް އެންޑް ބެލެންސް ގާއިމްކުރެވެން ވާނެ،" ޝަރީފް ވިދާޅުވި އެވެ.

އޭނާ ވިދާޅުވިގޮތުގައި، ފޮރިން ސާވިސް މުވައްޒަފުން ސިވިލް ސާވިސް އިން ވަކިވާ އިރު، ސިވިލް ސާވިސް ގާނޫނުގެ ދަށުން ލިބިދޭ ފަދަ ވަޒީފާގެ ރައްކާތެރިކަން ލިބެން ވާނެ އެވެ.