ކޮވިޑްގެ އެހީއަށް އެދި އިންޑޮނީޝިޔާ ރޮނީ

އިންޑޮނީޝިޔާގައި މިހާރު ހަލުވިކަމާ އެކު ފެތުރެމުންދާ ކޮވިޑް-19ގެ ވަބާގައި ގިނަ ބަޔަކު މަރުވެ އަދި ގިނަ ބަޔަކު ހޮސްޕިޓަލުތަކުގައި އެނދުމަތިކޮށްގެން ފަރުވާ ދޭން ޖެހިފައިވާ އިރު، އެ ގައުމުގެ ރައްޔިތުން ދުނިޔޭގެ އެހީތެރިކަމަށް އެދި އާދޭސް ކުރަން ފަށައިފި އެވެ.

އިންޑޮނީޝިޔާގެ މައި ސިޓީތަކުގެ ހުރިހާ ހޮސްޕިޓަލުތަކެއް ހެން ފުރިފައިވާ އިރު، އެ ސިޓީތަކުގައި ސަރުކާރުން މިހާރު ވަނީ ކޮވިޑުން ރައްކާތެރިވުމަށް ވަރަށް ހަރުކަށި ފުރަބަންދެއް އިއުލާން ކޮށްފަ އެވެ. އެ ގޮތުން ޒަރޫރީ ބޭނުމެއްގައި ނޫން ގޮތެއްގައި ބޭރަށް ނުނިކުތުމަށާއި، ސަރުކާރު މުވައްޒަފުން ގެސް ގޭގައި ތިބެގެން މަސައްކަތް ކުރާ ގޮތަށް ވަނީ ހަމަޖައްސައިފަ އެވެ.

ކޮވިޑް ކޮންޓްރޯލް ކުރުމަށް ސަރުކާރުން އަޅާފައިވާ ފިޔަވަޅުތަކާ އެކު ވެސް، ވެކްސިން ޖެހުމުގެ ޕްރޮގްރާމް އެކަށީގެންވާ ގޮތެއްގައި ކުރިއަށް ނުގެންދެވޭތީ، ބަލީގައި ބޮޑުވަރުގެ ފުރާނަ ގެއްލޭ މީހުންގެ އަދަދު އަންނަނީ އިތުރުވަމުންނެވެ. ބައެއް ސަރަހައްދުތަކުގައި މަރުވާ މީހުން ކަފުންކޮށް ވަޅުލުމަށް ބޭނުންވާ ކަފުނާއި ސަންދޯއް ލިބުން ދަތިވުމުން، ބައެއް މީހުން ވަޅުނުލެވި އެތައް ގަޑިއިރަކު ބައިތިއްބަން ޖެހެ އެވެ.

އިންޑޮނީޝިޔާގެ އެންމެ ބައި ބޯ އެއް ސިޓީ ކަމަށްވާ ޖާވާ އާއި ފަތުރުވެރިންގެ އެންމެ މަގުބޫލު މަންޒިލް ކަމަށްވާ ބާލީގައި އިއްޔެ ވަނީ ކޮވިޑުން ރައްކާތެރިވުމުގެ ގޮތުން ހާއްސަ ފިޔަވަޅުތަކެއް އަޅައި، ބޭރަށް ނުކުމެ އުޅުން ވަރަށް ބޮޑަށް ހަނިކޮށްފަ އެވެ.

ޖާވާގެ ވަޑާންގެތަކުގެ ވަޑިންނަށް އިތުރު ގަޑީގެ ފައިސާ ދީގެން، އިތުރު ވަގުތު މަސައްކަތް ކުރުވައިގެން ވެސް، ބޭނުންވާ އަދަދަށް ސަންދޯއް ޖެހުމުގައި ދަތިތަކެއް ކުރިމަތިވާ ކަމަށް، އެ ސިޓީގެ މުނިސިޕަލް އިދާރާ އިން ބުނެ އެވެ.

އިންޑޮނީޝިޔާގެ ކަމާ ބެހޭ އިދާރާތަކުން ބުނާ ގޮތުގައި، އިއްޔެ އެކަނިވެސް އެގައުމުން 28000 މީހަކަށް އަލަށް ކޮވިޑް ޖެހުނެވެ. އޭގެ ތެރެއިން 10000 މީހުންނަކީ ވެރިރަށް ޖަކާޓާގެ މީހުންނެވެ. މިއީ އެ ގައުމުން އެއް ދުވަހެއްގައި އެންމެ ގިނަ މީހުންނަށް ކޮވިޑް ބަލި ޖެހުނު ދުވަހެވެ. އެގައުމުން ކޮވިޑް ޖެހިގެން މިހާތަނަށް 60000 އަށް ވުރެ ގިނަ މީހުން މަރުވެއްޖެ އެވެ.

އެ ގައުމުގެ ސިއްހަތާ ބެހޭ ވުޒާރާ އިން ބުނި ގޮތުގައި މިފަހަކަށް އައިސް އެގައުމުގައި ގިނަ ބައެއްގެ މެދުގައި ކޮވިޑް ފެތުރެން ފެށީ، މިދިޔަ ކުޑަ އީދު ފާހަގަކުރުމުގެ ގޮތުން ގިނަ ބަޔަކު އެއްތަނަކަށް ޖަމާވެ، ގައިދުރުކަމަށް ސަމާލުކަން ނުދީ އުޅުމުގެ ސަބަބުންނެވެ. އޭގެ އިތުރުން، ކޮވިޑް ވައިރަހުގެ ޑެލްޓާ ބާވާތުގެ ވައިރަސް ފެތުރެން ފެށުމުން ވެސް ގިނަ ބަޔަކަށް ދަނީ މި ބަލި ޖެހެމުންނެވެ.

ކޮވިޑުން ރައްކާތެރިވުމަށް މިހާރު އަޅާފައިވާ ފިޔަވަޅުތަކުގެ ދަށުން، އާދައިގެ ކުދި ފިހާރަތައް ފިޔަވައި ބޮޑެތި ޝޮޕިން މޯލްތަކާއި ރެސްޓޮރަންޓްތައް ބަންދުވާނެ އެވެ. އަދި މުވައްޒަފުން މަސައްކަތް ކުރަންޖެހޭނީ އޮންލައިންކޮށެވެ. މަގުމަތީގައި އުޅޭ ނަމަ، ވެކްސިން ކާޑާއި، ޕީސީއާރް ޓެސްޓުގެ ނެގެޓިވް ނަތީޖާއެއް އޮންނަންވާނެ އެވެ. މިފިޔަވަޅުތައް މިމަހުގެ 20ގެ ނިޔަލަށް ތަންފީޒު ކުރުމަށް އިންޑޮނީޝިޔާ ސަރުކާރުން ވަނީ ނިންމައިފަ އެވެ.

ހޮސްޕިޓަލުތައް ފުރުމުގެ ސަބަބުން، ހާލު ބޮޑު ބައެއް މީހުންނަށް އެކަށީގެންވާ ފަރުވާ ނުދެވޭ ކަމަށް ބައެއް އާންމުން ޝަކުވާ ކުރެ އެވެ. އޭގެ އިތުރުން ބައެއް ހޮސްޕިޓަލުތަކުން އޮކްސިޖަން ހުސްވުމުގެ މައްސަލަ ވެސް ކުރިމަތިވާ ކަމަށް މީޑިއާގައި ރިޕޯޓްކޮށްފައިވެ އެވެ.