އިޒްރޭލުގެ ރަށްތަކުގައި ދާހިލީ ހަމަނުޖެހުން ބޮޑުވަނީ

އިޒްރޭލުގެ ރަށްތަކުގެ ތެރެއިން އަރަބި ދަރިކޮޅުގެ މުސްލިމުންނާއި ޔަހޫދީން ދިރިއުޅޭ ރަށްތަކުގައި މިދިޔަ މެއި މަހުގެ ތެރޭގައި ފެށުނު ހަމަނުޖެހުންތައް އިތުރަށް ހޫނުވެ، ދާހިލީ ހަމަނުޖެހުމެއްގެ ބިރު އުފެދިއްޖެ އެވެ.

މެއި މަހުގެ ތެރޭގައި އިޒްރޭލް ސިފައިން ގާޒާ އަށް ދިން ހަމަލާތަކާ ދެކޮޅަށް، އިޒްރޭލުގެ އަރަބިން ބައެއް ސަހަރުތަކުގައި މަގުތަކަށް ނުކުމެ އިޒްރޭލް ސަރުކާރާ ދެކޮޅަށް އަޑުއުފުލަން ފެށުމުން، އިޒްރޭލުގެ ޔަހޫދީން ވެސް މަގުތަކަށް ނުކުމެ އިޒްރޭލު ސަރުކާރުގެ ދިފާއުގައި އަޑު އުފުލި އެވެ. ދެ ފަރާތުގެ މުޒާހަރާތައް ހޫނުވެ އެއް ބަޔަކު އަނެއް ބަޔަކަށް ހަމަލާ ދޭން ފެށުމުން، އޭރު މުޒާހަރާތައް ކޮންޓްރޯލް ކުރީ އިޒްރޭލު ފުލުހުން ބާރުގެ ބޭނުންކޮށްގެންނެވެ.

ގުދުސްގައި އަރަބިންނާއި ޔަހޫދީން ދިރިއުޅޭ ބައެއް އަވަށްތަކުގައި، ދެބައިމީހުންގެ މެދުގައި ފުރަތަމަ ފެށެނީ ބަހުގެ ހަމަލާތަކާއި ޒުވާބުކުރުންތަކެވެ. އެއަށް ފަހު އެއް ބަޔަކު އަނެއް ބަޔަކަށް އެއްޗެހި އުކައި، ގަޔަށްބޮލަށް އަރައިގަންނަ ހިސާބަށް މަސްރަހު ހޫނުވެ އެވެ. މިދިޔަ ހަފުތާގައި ވެސް، ގުދުސްގެ ބައެއް އަވަށްތަކުގައި، އެއް ބަޔަކު މަގުން ހިނގާފައި ނުވަތަ ދުއްވާފައި ދާއިރު، އަނެއް ބަޔަކަށް ހަމަލާ ދިނުމާއި، އެއް ބަޔަކު އަނެއް ބައެއްގެ މުދަލަށާއި ވިޔަފާރިތަކަށް ގެއްލުން ދިނުމުގެ ހާދިސާތައް ވެސް ހިނގާފައިވެ އެވެ. އޭގެ އިތުރުން އެއް ބަޔަކު އަނެއް ބައެއްގެ ދީނީ ބިނާތަކުގެ ހުރުމަތް ކެނޑުމުގެ އަމަލުތައް ވެސް ހިނގާފައިވެ އެވެ.

މެއި މަހު ފެށުނު މި ހަމަނުޖެހުންތައް ދެ މަސް ވެގެން ދިޔަ އިރުވެސް ހުއްޓުމަކަށް ނާންނާތީ، އިޒްރޭލުގެ ރަށްތަކުގައި ޔަހޫދީންނާއި އަރަބީންނާ ދެމެދު ދާހިލީ ހަނގުރާމައެއް ފެށިދާނެ ކަމުގެ ބިރު މިހާރު ވަނީ އުފެދިފަ އެވެ. އިއްޔެގެ ހިނގި ކުރިމަތިލުންތަކުގައި، ޔަހޫދީ ވަޒަންވެރިއަކު ފިސްތޯލަ ޖެހުމުގެ ސަބަބުން، ފަލަސްތީނު ދަރިކޮޅުގެ އިޒްރޭލު މީހަކު މަރުވި އެވެ. އަދި ޔަހޫދީއަކު ދުއްވި ކާރަކަށް ފަލަސްތީނު ދަރިކޮޅުގެ ބަޔަކު އޮއްގަލުން ހަމަލާ ދިނުމުގެ ސަބަބުން، އެ ޔަހޫދީ މީހާ މަރުވި އެވެ.