ބޮލީވުޑްގެ ޚަބަރުތައް ކުރުކޮށް

މިހާރު ޝޫޓިން ފަށާފައިވާ އަޔޫޝްމަން ކްރާނާގެ ފިލްމު "ޑޮކްޓަރު ޖީ" ގައި އޭނާ ފެންނާނެ ގޮތް ދައްކާލައިފި އެވެ.

އާންމުކުރި ފޮޓޯއެއްގައި އޭނާ ފެންނަނީ ނަމްބަރު އައިނަކާ އެކު، މޮޑަން ލުކެއްގަ އެވެ. އަލަށް ޑައިރެކްޝަނަށް ނުކުތް އަނޫބްތީ ކޭޝަޕް ޑައިރެކްޓްކުރާ "ޑޮކްޓަރު ޖީ" ގައި އަޔޫޝްމަން ކުޅެނީ އޮޕަރޭޝަން ޑޮކްޓަރެއްގެ ރޯލެވެ. އޭނާ ބުނި ގޮތުގައި މި ފިލްމުގެ ސްލްރީންޕްލޭ އަކީ މިހާތަނަށް ކިއީ އެންމެ މޮޅު އެއް ސްކްރިޕްޓެވެ.

"ޑޮކްޓަރު ޖީ" ގެ ބަތަލާ އަކީ އަޔޫޝްމަނާ އަލަށް މަސައްކަތްކުރާ ރަކުލް ޕްރީތު ސިންގް އެވެ.

މިހާތަނަށް ވަރަށް ތަފާތު ކޮންޓެންޓްތަކުގެ ކާމިޔާބު ފިލްމުތަކެއް ކުޅެފައިވާ އެކްޓަރުގެ ކުރިއަށް ހުރި އިތުރު ފިލްމުތަކުގެ ތެރޭގައި "ޗަންދީގަޅު ކަރޭ އާޝިގީ" އާއި "އަނޭކް" ހިމެނެ އެވެ.

ވިދުޔަތު ޕްރޮޑިއުސަރަކަށް

ދާދި ފަހުން ހޮލީވުޑްގެ އެޖެންސީއަކާ އެކު ސޮއިކުރި ބޮލީވުޑްގެ އެކްޝަން ތަރި ވިދުޔަތު ޖަމްވަލް އެކްޝަން ހީރޯ ފިލްމްސްގެ ނަމުގައި އަމިއްލަ ފިލްމު ކުންފުންޏެއް ހަދައި އޭގެ ދަށުން ޕްރޮޑިއުސްކުރާ ފުރަތަމަ ޕްރޮޖެކްޓް ވެސް އިއުލާންކޮށްފި އެވެ.

"އައިބީ71" ގެ ނަމުގައި ހަދާ ތުރިލާގެ ޑައިރެކްޓަރަކީ ނެޝަނަލް އެވޯޑް ހޯދާފައިވާ ސަންކަލްޕް ރެޑީ އެވެ. ފިލްމުގެ ޝޫޓިން ވަރަށް އަވަހަށް ފެށުމުގެ ތައްޔާރީތައް ވަމުން އަންނަ އިރު، އޭގެ އިތުރު ކާސްޓުންނަކީ ކޮބައި ކަމެއް އަދި ނޭނގެ އެވެ.

މި ފަހުން ރިލީޒްވި ވިދުޔަތުގެ އެންމެ ކާމިޔާބު ފިލްމަކީ މިދިޔަ އަހަރުގެ "ޚުދާ ހާފިޒު" އެވެ. އޭގެ ދެވަނަ ބައިގެ މަސައްކަތް ވެސް މިހާރު ވަނީ ފަށައިފަ އެވެ.

ސޮނާކްޝީގެ "ކަކުޑާ" ގެ ޝޫޓިން ފަށައިފި

ބަތަލާ ސޮނާކްޝީ ސިންހާ ކުޅޭ ފުރަތަމަ ހޮރޯ-ކޮމެޑީ "ކަކުޑާ" ގެ ޝޫޓިން ފަށައިފި އެވެ.

ގުޖްރާތުގައި މަންޒަރުތައް ނަގާ މި ފިލްމުގެ ބަތަލުންނަކީ ރިތޭޝް ދޭޝްމުކާއި ސާގިބް ސަލީމެވެ. "ކަކުޑާ" ގެ ޑައިރެކްޓަރަކީ ރިތޭޝް 2018 ގައި ކުޅުނު މަރާޓީ ފިލްމު "މައުލީ" ހެދި އަދިތިޔާ ސަރްޕޯޓްޑަރް އެވެ. އަންނަ އަހަރު ގެނެސްދޭން ހަމަޖެހިފައިވާ "ކަކުޑާ" އަކީ ރޯނީ ސްކްރޫވާލާ ޕްރޮޑިއުސްކުރާ ފިލްމެކެވެ.

ސޮނާކްޝީގެ ކުރިއަށް އޮތް ފިލްމަކީ އަންނަ މަހުގެ 13 ގައި ޑިޒްނީ ޕްލަސް ހޮޓްސްޓާ އިން ޕްރީމިއާކުރާ އަޖޭ ދޭވްގަންގެ ވަތަނީ ފިލްމު "ބޫޖް: ދަ ޕްރައިޑް އޮފް އިންޑިއާ" އެވެ.

އީޝާގެ "އޭކް ދުއާ" ގެ ޓްރެއިލާ

ކުރީގެ ބަތަލާ އިޝާ ޑިއޯލްގެ ވެބް ފިލްމު "އޭކް ދުއާ" ގެ ޓްރެއިލާ ދައްކާލައިފި އެވެ.

މި ފިލްމަކީ އޭނާ ދާދި ފަހުން އިއުލާންކުރި އަމިއްލަ ފިލްމު ކުންފުނި ބާރަތު އީޝާ ފިލްމު (ބީއީއެފް) އިން ޕްރޮޑިއުސްކޮށް ގެނެސްދޭ ފުރަތަމަ ފިލްމެވެ. އަންހެން ދަރިއަކަށްޓަކައި މަޔަކު ވާ ގުރުބާނީ ދައްކުވައިދޭ "އޭކް ދުއާ" އަކީ މި މަހުގެ 26 ގައި ވޫޓް ސިލެކްޓް އިން ޕްރީމިއާކުރަން ހަމަޖެހިފައިވާ ފިލްމެކެވެ.

މީގެ ޑައިރެކްޓަރަކީ އީޝާގެ 2018 ގެ ކުރު ފިލްމު "ކޭކްވޯކް" ހެދި ރާމް ކަމަލް މުކަރްޖީ އެވެ.