މުއިއްޒަށް ކުރާ ދައުވާގެ ޝަރީއަތް މާދަމާ ފަށަނީ

މާލޭގެ މޭޔަރުު އަދި ކުރީގެ ހައުސިން މިިނިސްޓަރު މުހައްމަދު މުއިއްޒުގެ މައްޗަށް ކުރާ ދައުވާގެ ޝަރީއަތް ކްރިމިނަލް ކޯޓުން މާދަމާ ފަށަން ތާވަލްކޮށްފި އެވެ.

ދޮގު ބަޔާން ދިނުމުގެ ދައުވާ މުއިއްޒުގެ މައްޗަށް ކުރަނީ އޭނާ ހައުސިން މިނިސްޓަރަކަށް ހުންނެވިއިރު، ނޫމަޑި ރިސޯޓްސް އެންޑް ރެސިޑެންސް ކުންފުންޏާ އެކު ސަރުކާރުން ހެދި އެއްބަސްވުން ބާތިލްކުރި މައްސަލާގައިި، ނެދަލޭންޑްސްގައިި ހުންނަ އާބިޓްރޭޝަންގައި ދޮޮގު ބަޔާނެއް ދެއްވި ކަމަށް ބުނެ އެވެ.

އެ މައްސަލާގައި މުއިއްޒުގެ މައްޗަށް ކުރާ ދޮގު ބަޔާން ދިނުމުގެ ދައުވާގެ އިބްތިދާއީ އަޑުއެހުން ކޯޓުން ފަށަން ހަމަޖައްސާފައިވަނީ މާދަމާ ހެނދުނު އެވެ.

ގާނޫނުލް އުގޫބާތުގެ 520 ވަނަ މާއްދާގެ ދަށުން ކުރާ އެ ދައުވާ ސާބިތުވެއްޖެ ނަމަ އަންނާނެ އަސާސީ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ. ނަމަވެސް އެއަށް ވުރެ އަދަބު ބޮޑުވުމުގެ ނުވަތަ ކުޑަވުމުގެ ފުރުސަތު ވެސް އޮންނާނެ އެވެ.

ނޫމަޑިން 155 މިލިއަން ޑޮލަރު ހޯދަން ސަރުކާރާ ދެކޮޅަށް އާބިޓްރޭޝަނަށް ހުށަހެޅި މައްސަލާގައި ސަރުކާރުން ވަނީ ކޯޓުން ބޭރުގައި މައްސަލަ ހައްލުކޮށް، 55 މިލިއަން ޑޮލަރު އެ ކުންފުންޏަށް ދީފަ އެވެ. އާބިޓްރޭޝަނަށް މުއިއްޒު ބަޔާން ދެއްވި މައްސަލާގައި ރައްޔިތުންގެ މަޖިލީހަށް ވެސް އޭނާ ހާޒިރުކޮށް، ކުރިން ސުވާލުކުރި އެވެ.