ޖާބިރު މަޖިލިސް އިދާރާގެ ދޮރުމަތީގައި އޮށޯވެ!

ރައްޔިތުންގެ މަޖިލިސް ޗުއްޓީއަށް ގޮސްފައި ވަނިކޮށް ކާށިދޫ ދާއިރާގެ މެމްބަރު އަބްދުﷲ ޖާބިރު މިއަދު މަޖިލީހުގެ އިދާރާގެ ކައިރިއަށް ވަޑައިގެން އަޑުގަދަކުރައްވައި މަޖިލީހުގެ ދޮރުމަތީގައި އިށީނދެ އަދި އޮށޯވެ ވަޑައިގެން އިހުތިޖާޖުކުރައްވައިފި އެވެ.

ސޯޝަލް މީޑިއާގައި އާއްމުކޮށްފައިވާ ވީޑިއޯތަކުން ފެންނަ ގޮތުގައި ޖާބިރު ވަޑައިގެން މަޖިލީހުގެ މައި ދޮރާށީގެ ކައިރީގައި އިށީނދެވަޑައިގެން ހަޅޭއް ލައްވަމުން ގެންދެވި އެވެ. ނަމަވެސް އޭނާ ވިދާޅުވަމުން ގެންދެވި ގިނަ ވާހަކަތައް ސާފެއް ނުވެ އެވެ. އޭނާ އެތަނުން ތެދުވެވަޑައިގަންނަވާތޯ އަނބިކަނބަލުން ފާތިމަތު ދިޔާނާ ސައީދު މަސައްކަތްކުރައްވާތަން ވެސް ވީޑިއޯތަކުން ފެނެ އެވެ. ނަމަވެސް ޖާބިރު އޭނާއަށް އިޖާބައެއް ނުދެއްވައި އިންނެވުމަށް ފަހު "ކަލޭ ވަޑައިގަންނަވާ" ށޭ ވިދާޅުވެ ޢެވެ. އެ ހިސާބުން ދިޔާނާ ވަޑައިގަތީ އެވެ.

ޖާބިރު ހިޔަލަށް ވަޑައިގަތުމަށް މީހަކު ގޮވާލި އަޑު ވީޑިއޯ އިން ޢިވެ އެވެ. ޖަވާބުގައި ވިދާޅުވީ "ރައްޔިތުންނަށްޓަކައި މި އަވި އަރާމު" ކަމަށެވެ.

ވީޑިއޯއިން ސާފުވާ ބައެއް ވާހަކަތަކުގައި އޭނާ ވާހަކަ ދެއްކެވީ ވަރަށް ހަޑިހުތުރު ބަހުންނެވެ. އަދި އޭނާގެ އަތުގައި އޮތް ފެން ފުޅި ބޮލަށް ވެސް އަޅުއްވަ އެވެ.

ޖާބިރު މިއަދު މަޖިލީހުގެ އިދާރާގެ ކައިރިއަށް ވަޑައިގެންނެވީ ސީދާ ކީއްވެ ކަމެއް ނޭނގެ އެވެ. އޭނާއަކީ އާއްމުކޮށް ވަރަށް އަވަހަށް މީޑިއާއަށް ޖަވާބުދެއްވާ މެމްބަރަކަށް ވިޔަސް މިއަދު ފޯނަކަށް ޖަވާބެއް ނުދެއްވަ އެވެ.

ރައްޔިތުންގެ މަޖިލީހުގެ ޖަލްސާތައް ކުރިއަށް ދަނިކޮށް ވެސް، އާއްމު އިޖުތިމާއީ މިންގަނޑުތަކާ ހިލާފަށް ޖާބިރު އަމަލުކުރައްވައިގެން ޖަލްސާ ދޫކުރައްވައި ވަޑައިގަންނަވަން މީގެ ކުރިން އެތައް ފަހަރަކު އަންގާފައި ވެ އެވެ.