މެމްބަރަކު އަވަހާރަ ކޮށްލުމުގެ ވާހަކަ ވެސް، ގާނޫނުއަސާސީ އުވާލާ ވާހަކަ ވެސް މަޖިލީހުގައި ދެއްކޭނެ: ނަޝީދު

ރައްޔިތުންގެ މަޖިލީހުގެ މެމްބަރަކު އަވަހާރަ ކޮށްލުމުގެ ވާހަކަ އާއި ގާނޫނުއަސާސީ އުވައިލުމުގެ ވާހަކަ ވެސް ގަރާރު ހުށަހަޅައި މަޖިލީހުގައި ދެއްކޭނެ ކަމަށް، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ނަޝީދު މިހެން ވިދާޅުވީ، މިއަދުގެ ޖަލްސާ އަށް އެޖެންޑާ ކޮށްފައިވާ ގަރާރަކާ ގުޅިގެން ބައެއް މެމްބަރުންގެ މެދުގައި އުފެދުނު ހިޔާލު ތަފާތުވުންތަކަކަށް ދެއްވި ޖަވާބެއްގަ އެވެ. ކާށިދޫ ދާއިރާގެ މެމްބަރު އަބްދުﷲ ޖާބިރުގެ އެ ގަރާރުގައި ވަނީ ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތައް އުވައިލުމަށާއި ލޯކަލް ގަވާމަންޓް އޮތޯރިޓީ (އެލްޖީއޭ) ވެސް އުވައިލުމަށެވެ.

ނަމަވެސް އެ ގަރާރު އެޖެންޑާގައި ހިމެނުމުން އެމްޑީޕީގެ ބައެއް މަޖިލިސް މެމްބަރުން ވިދާޅުވީ، އެއީ ގާނޫނުއަސާސީއާ ހިލާފު ކަމެއް ކަމަށެވެ. އެހެންވެ، އެ ގަރާރު މަޖިލީހަށް ބަލައި ނުގަނެވޭނެ ކަމަށް އެ މެމްބަރުން ނިޒާމީ ނުކުތާ ނަންގަވައި ވިދާޅުވި އެވެ.

އެ ކަމަށް ރައްދު ދެއްވަމުން ނަޝީދު ވިދާޅުވީ، އެ މައްސަލައިގައި މަޝްވަރާކޮށް ގޮތެއް ނިންމައިފައިވާ ކަމަށެވެ. އިސްލާމް ދީނުގެ އަސްލަކާ ހިލާފު ނުވާ ކޮންމެ ވާހަކައެއް މަޖިލީހުގައި ދެއްކޭނެ ކަމަށް ނަޝީދު ވިދާޅުވި އެވެ. އެގޮތުން ނަޝީދު ވިދާޅުވީ ގާނޫނުއަސާސީ އުވައިލުމުގެ ވާހަކަ ވެސް މަޖިލީހުގައި ދެއްކޭނެ ކަމަށެވެ.

"މި މަޖިލީހުގައި ގަރާރަކުން ނުދެއްކޭނެ ހަމައެކަނި ވާހަކައަކީ އިސްލާމް ދީނުގެ އަސްލަކާ ހިލާފުވާ ވާހަކަ. މި މަޖިލީހުގައި ގަރާރަކުން އަޅުގަނޑުމެންނަށް ދެއްކި ދާނެ އިއްޒަތްތެރި މެމްބަރަކު އަވަހާރަ ކޮށްލުމުގެ ވާހަކަ ވެސް." މިސާލު ދައްކަވަމުން ނަޝީދު ވިދާޅުވި އެވެ.

ޑީއާރުޕީގެ ލީޑަރު ޖާބިރުގެ ގަރާރު ގާނޫނުއަސާސީއާ ހިލާފު ކަމަށް އެމްޑީޕީގެ ބައެއް މެމްބަރުން ވިދާޅުވުމުން ނިޒާމީ ނުކުތާއެއް ނަންގަވައި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ، އެކަމަކާ އެއްބަސް ނުވެވޭ ކޮންމެ ކަމަކީ ގާނޫނުއަސާސީއާ ހިލާފު ކަމެއް ކަމަކަށް ނުބެލޭނެ ކަމަށެވެ.

"އަދި މަޖިލީހަށް އެޖެންޑާ ނުކުރެވޭނެ ކަންކަމަކަށް ވެސް ނުހެދޭނެ،" އީވާ ވިދާޅުވި އެވެ.

ގާނޫނުއަަސާސީގައި ބަޔާން ކޮށްފައިވާ ގޮތާ ހަވާލާ ދެއްވައި އޭނާ ވިދާޅުވީ، ރާއްޖެ ހިންގަން ވާނީ ލާމަރުކަޒީ ނިޒާމަކުން ކަމަށެވެ. ނަމަވެސް އެލްޖީއޭ އާއި ކައުންސިލްތަކުގެ ވާހަކަ ގާނޫނުއަސާސީގައި ނެތް ކަމަށް އޭނާ ވިދާޅުވި އެވެ.

އީވާގެ އެ ވާހަކައާ ގުޅިގެން ނަޝީދު ވިދާޅުވީ، ޖާބިރުގެ ގަރާރު މަޖިލީހަށް ބަލައިގަތުމާއި ނުގަތުމާ މެދު ގޮތެއް ނިންމާނީ މަޖިލީހުގެ ތަޅުމުގައި ނަމާ ވޯޓަކުން ކަމަށެވެ.