ފުލުހުންގެ އިސް އޮފިސަރުން ވަކިކުރާ މައްސަލަ 241 ކޮމިޓީ އަށް ހުށަހަޅަނީ

ފުލުހުންގެ އިސް ހަ އޮފިސަރަކު މަގާމުން ވަކި ކުރަން ޕޮލިސް ބޯޑުން އިއްޔެ ލަފާ ދޭން ނިންމި ނިންމުމަކީ ގާނޫނާ އެއްގޮތަށް ކުރި ކަމެއްތޯ ކަށަވަރުކުރުމަށްޓަކައި އެ މައްސަލަ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ އަށް ހުށަހަޅުއްވަން ދަނގެތި ދާއިރާގެ މެމްބަރު މުހައްމަދު ނާޒިމް މިރޭ ނިންމަވައިފި އެވެ.

މޯލްޑިވްސް ނޭޝަނަލް ޕާޓީ (އެމްއެންޕީ) ގެ ނަމުގައި ސިޔާސީ ޕާޓީއެއް އުފައްދަން މަސައްކަތް ކުރައްވާ ނާޒިމް، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ޕޮލިސް ކޮމިޝަނަރު މުހައްމަދު ހަމީދު ޓެގް ކުރައްވައި ކުރެއްވި ޓުވީޓެއްގައި ވިދާޅުވީ، ޕޮލިސް ބޯޑުން ނިންމި މައްސަލަ 241 ކޮމިޓީ އަށް ހުށަހަޅުއްވަން ނިންމަވާފައިވާ ކަމަށެވެ.

ފުލުހުންގެ ހިދުމަތުގައި ވަރަށް ގިނަ ދުވަސް ވަންދެން ތިއްބެވި ހަ އޮފިސަރަކު މަގާމުން ވަކިކުރަން ޕޮލިސް ބޯޑުން ލަފާ ދީފައިވީ ނަމަވެސް ޕޮލިސް ކޮމިޝަނަރު ހަމީދު އެ ނިންމުން އަދި ތަންފީޒެއް ނުކުރައްވަ އެވެ. އޭނާ އަދި ގެންދަވަނީ ބޯޑުގެ ނިންމުން ދިރާސާ ކުރައްވަމުންނެވެ.

ފުލުހުންގެ ގާނޫނުގައިވާ ގޮތުން، ފުލުހުންގެ ބޯޑު އައްޔަންކުރާތާ ހަތަރު މަސް ތެރޭގައި ކޮމިޝަންޑް އޮފިސަރުންގެ ތެރެއިން ކޮމިޝަނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސް އިން ފެށިގެން މަތީ ރޭންކުގެ ކޮމިޝަންޑް އޮފިސަރުން ގާނޫނީ ބާރާއި އިހްތިޔާރު ނަހަމަ ގޮތުގައި ބޭނުންކޮށް، ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭ ނުވަތަ މައްސަލައެއް ދައުލަތުގެ އިދާރާއަކަށް ނުވަތަ ކޮމިޝަނަކަށް ރިޕޯޓް ކުރެވިފައިވާ އޮފިސަރުން ވަކި ކުރުމާ މެދު ފެންނަ ގޮތެއް ނިންމަން ވާނެ އެވެ.

ރައީސް އިބްރާހިމް މުހައްމަދު ސޯލިހު ފުލުހުންގެ ބޯޑު އެކުލަވައިލެއްވީ މި އަހަރުގެ އޭޕްރިލް 9 ވަނަ ދުވަހު އެވެ. އެ ބޯޑު އުފެއްދިތާ ހަތަރު މަސް ހަމަވީ އިއްޔެ އެވެ. އަދި އިއްޔެ އިސް ހަ އޮފިސަރަކު ވަކިކުރަން ޕޮލިސް ބޯޑުން ވަނީ ލަފާދީފަ އެވެ.

ގާނޫނުގައިވާ ގޮތުން ބޯޑުގެ ނިންމުން ތަންފީޒު ކުރައްވާނީ ޕޮލިސް ކޮމިޝަނަރު ކަމަށް ވާއިރު، އޭނާ ވަކި ގޮތެއް ނިންމަވަންދެން އެ އޮފިސަރުންނަށް މަގާމުގައި ދެމިތިއްބެވޭނެ އެވެ. އެކަމަށް ވަކި މުއްދަތެއް ދީފައެއް ނެތެވެ.

އެ ނިންމުން ތަންފީޒު ކުރުމަށް އެންގުމުގެ ބާރު ހޯމް މިނިސްޓަރަށް ގާނޫނުން ލިބިދީފައިވީ ނަމަވެސް، މިނިސްޓަރު އިމްރާން އަބްދުﷲ ވެސް ފޯނު ނުނަންގަވާތީ އޭނާގެ ބަހެއް ލިބޭ ގޮތް އަދި ނުވެ އެވެ.

ބޯޑުން ގޮތެއް ނިންމުމުގައި އެ ފުލުހެއްގެ ތައުލީމީ ފެންވަރާއި އެ ފުލުހެއްގެ ދައުރާއި ކޮށްފައިވާ ހިދުމަތާއި ސުލޫކާއި މަސައްކަތުގެ އަހުލާގާއި ކުރެވިފައިވާ ތުހުމަތުގެ ތަބީއަތާއި އެ މައްސަލައަކާ ގުޅިގެން ލިބެން ހުރި ހެއްކާއި ގަރީނާ އަށް ފުލުސް ބޯޑުން ބަލަން ޖެހޭނެ ކަމަށް ގާނޫނުގައިވެ އެވެ.

ފުލުހުންގެ ގާނޫނު ބުނާ ގޮތުން ބޯޑު އެކުލެވިގެން ވަނީ ރައީސް އައްޔަންކުރައްވާ ދެ މެންބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިވަޑައިގެންފައިވާ ތިން މެންބަރުންގެ އިތުރުން އާންމުންގެ ތެރެއިން ދެ މެންބަރެއްގެ މައްޗަށެވެ.

ބޯޑުގެ ރައީސް އަލީ ފާއިޒު އަދި ނާއިބު ރައީސް އަހުމަދު ފަޔާޒް ހަސަންގެ އިތުރުން ޕޮލިސް ބޯޑުގައި ދެން ތިއްބަވަނީ އާއިޝަތު ނޫރާ މުހައްމަދު، އަހުމަދު ނާޝިދު، އާދަމް އިބްރާހީމް، ހާމިދު އަބްދުލްޣަފޫރު އަދި ސަފާ ޝަރީފެވެ.