ހެލީ ބެރީގެ ޝަކުވާ އަކީ ކަމުދާ ރޯލެއް ކުޅެން ނުލިބުން

މޮޅު ބަތަލާގެ އޮސްކާ އެވޯޑް ލިބުނަސް އެކަމުގެ ސަބަބުން ކެރިއަރަށް އައި މާ ބޮޑު ބަދަލެއް ނެތް ކަމަށާއި އެންމެ ބޭނުންވާ ކަހަލަ ރޯލުތައް ވެސް ކުޅެން ނުލިބޭ ކަމަށް ހޮލީވުޑްގެ މަޝްހޫރު ބަތަލާ ހެލީ ބެރީ ބުނެފި އެވެ.

ރޮމޭންޓިކް ޑްރާމާ "މޯންސްޓާޒް ބޯލް" އިން އޮސްކާ ލިބުނު ބަތަލާގެ ކުރިއަށް އޮތް ފިލްމު "ބްރޫޒްޑް" ގެ ޕްރޮމޯޝަންގެ ތެރެއިން އެންޓަޓައިންމަންޓް ވީކްލީ އަށް ދިން އިންޓަވިއުއެއްގައި ބުނީ ކަމުދާ ކަހަލަ ރޯލުތައް ހޯދަން މިހާރު ވެސް ވަރަށް އުނދަގޫ ކަމަށެވެ. އެހެންވެ އެކްޓިން ހުނަރު ދައްކާލަން ބޭނުން ފެންވަރަށް ނުދެއްކި މާޔޫސްކަން އަބަދު ވެސް އޮންނަ ކަމަށް ބުންޏެވެ.

"ބައެއް މީހުން ހީކޮށްފާނެ ކަންނޭނގޭ މޮޅު ބަތަލާގެ އޮސްކާ ލިބުނީމާ އަހަރެންގެ ފިލްމީ ކެރިއަރަށް ވަރަށް ބޮޑެތި ހެޔޮ ބަދަލުތަކެއް އަންނާނޭ. ހަގީގަތަކީ އެވޯޑްގެ ސަބަބުން މީހުން އަހަންނާ ދޭތެރޭ ދެކޭ ގޮތް ބަދަލުވިކަން،" ބެރީ ބުންޏެވެ. "އެކަމަކު ތެދަތަށް ބުނަންޏާ މޮޅު ބަތަލާގެ އޮސްކާ ލިބުމަކުން މާ ބޮޑެތި އަދި މާ ހާއްސަ ރޯލުތަކެއް ކުޅޭކަށް ނުލިބޭ."

އޭނާ ބުނި ގޮތުގައި ގިނަ ސްކްރިޕްޓްތައް ކިޔަން ލިބުނަސް ގަޔާވާ ކަހަލަ ރޯލަކާ ދިމާވަނީ ވެސް ހާލަކުން ފަހަރަކު އެވެ.

"އެހެންވެ އެންމެ ކުރިއެކޭ އެއްގޮތަށް އަދިވެސް އަހަންނަކީ ރަނގަޅު ރޯލުތައް ހޯދަން މަސައްކަތްކުރާ މީހެއް. މަސައްކަތްކުރަން އެބަޖެހޭ. އެކަމަކު ކުރަން ބޭނުން ވަނީ އަބަދު ވެސް ވަރަށް ފާހަގަކޮށްލެވޭ މަސައްކަތްތަކެއް،" ގިނަ ފިލްމުތަކެއް މިހާތަނަށް ކުޅެފައިވާ ބެރީ ބުންޏެވެ.

އޭނާ ބުނި ގޮތުގައި ކުރިއަށް ދާން އަދިވެސް އޮތް ހުރަހެއް ކަމަށް ދެކެނީ ކަޅު ނަސްލުގެ ބަތަލާއަކަށްވުމެވެ. އެހެންވެ އޭގެ ސަބަބުން ބައެއް ރޯލުތައް ގެއްލިފައިވާ ކަމަށް ވެސް ބުންޏެވެ. އެކަމަކު އެކްޓިން އަކީ ހޮބީއަކަށް ކުރާ ކަމެއް ނޫން ކަމަށާއި އެއީ ދިރިއުޅުމަށް ކުރާ މަސައްކަތަށްވާތީ، ފިލްމީ މަސައްކަތުގައި ދެމިހުންނަން ބޭނުންވާ ކަމަށް ބުންޏެވެ.

"އަނެއްކާ އެކްޓިން އަކީ އަހަރެން ވަރަށް ލޯބިކުރާ ކަމެއް އަބަދު ވެސް. މިކަން އަހަރެން ކުރަނީ އާއިލާ ބަލަހައްޓަން ކުރާ ފުލް ޓައިމް ވަޒީފާއެއްގެ ގޮތުގައި،" ދެ ކުދިންގެ މަންމަ ބުންޏެވެ. "އެހެންވެ އެއްވެސް އިރެއްގައި ފިލްމު ކުޅުމަކީ ހޮބީއެއް ނޫން."

މި އަހަރުގެ ނޮވެމްބަރުގައި ރިލީޒްކުރާ "ބްރޫޒް" އަކީ ބެރީ ކުޅުމުގެ އިތުރަށް އަމިއްލަ އަށް ޑައިރެކްޓް ވެސް ކޮށްފައިވާ ފިލްމެކެވެ. މިއީ އޭނާގެ އަލަތު ޑައިރެކްޝަނެވެ.

"އެކްސް މެން" ސީރީޒްގެ ފިލްމުތަކާއި ޖޭމްސް ބޮންޑް ސީރީޒްގެ ފިލްމު "ޑައި އެނަދަ ޑޭ" ގައި ވެސް މަސައްކަތްކޮށްފައިވާ ބަތަލާގެ ކުރިއަށް ހުރި އިތުރު ފިލްމުތަކުގެ ތެރޭގައި "މޫންފޯލް" އާއި "ދަ މަދަޝިޕް" ހިމެނެ އެވެ.