ބުޅަލެއް ސަލާމަތްކުރި ބަޔަކަށް ދުބާއީގެ ބޮޑުވަޒީރުގެ ތައުރީފް

ދުބާއީގެ އިމާރާތެއްގެ ތިން ވަނަ ބުރިން މަގުމައްޗަށް ފުންމާލަން އުޅުނު ބުޅަލަކަށް އަނިޔާވިޔަ ނުދީ ސަލާމަތްކުރަން ބަޔަކު ކުރި މަސައްކަތަށް ޔޫއޭއީގެ ނައިބު ރައީސް އަދި ބޮޑުވަޒީރު ޝައިޚް މުހައްމަދު ބިން ރާޝިދު އަލް މަޚްތޫމް ތައުރީފުކުރައްވައިފި އެވެ.

ބުޅާ ފުންމާލަން އުޅުނު ތަން މަގުމަތީގައި ތިބި ބަޔަކަށް ފެނިގެން އެ ސަލާމަތްކުރަން ފޮތިގަނޑެއް ދިއްކޮށްގެން އޭގެ މައްޗަށް ބުޅާ ފުންމާލި މަންޒަރު ފެންނަ ވީޑިއޯ ސޯޝަލް މީޑިއާގައި ދައުރުވާން ފެށުމުން މުހައްމަދު އެ ވީޑިއޯ ޓްވިޓާގައި ޕޯސްޓްކުރެއްވި އެވެ. އޭގައި އޭނާ ވިދާޅުވީ ބުޅާ ސަލާމަތްކޮށްދިން މީހުންގެ ފަރާތުން ފެނުނު އޯގާތެރިކަމާ މެދު ފަހުރުވެރިވަޑައިގަންނަވާ ކަމަށެވެ.

އަދި އެއީ ކޮން ބައެއްކަން ފާހަގަކޮށްދެއްވަން އެދިވަޑައިގެންފައިވެ އެވެ.