މިއީ ރޮކް އާ ވައްތަރު މީހެއް

ސެލެބްރިޓީންނާ ވައްތަރުވެގެން އާންމުންގެ ސަމާލުކަން ލިބޭ މީހުން މިހާރު ވަރަށް ގިނަ އެވެ. ސޯޝަލް މީޑިއާގެ ނުފޫޒާ ހެދި މިކަން އާންމުވެފައި ވާއިރު ހޮލީވުޑްގެ މަޝްހޫރު ތަރި ޓޮމް ކްރޫޒާ މާ ވައްތަރު މީހަކު ޓިކްޓޮކުން ފެނިގެން ބައެއް މީހުންނަށް އޮޅުންއަރާ ހިސާބަށް ވެސް ދިޔަ އެވެ.

މި ފަހަރު ފެނުނީ ހޮލީވުޑްގެ ވަރުގަދަ ތަރި، ރޮކްގެ ނަމުން މަޝްހޫރުވި ކުރީގެ ރެސްލިން ތަރި ޑްވޭން ޖޯންސަންއާ ވައްތަރު މީހެކެވެ. އޭނާއާ މާ ވައްތަރު މީހަކު އެމެރިކާ އިން ފެނިގެން ސެލްފީ ނަގަން އެދޭ މީހުން ވެސް އަންނަނީ އިތުރުވަމުންވެ. މިއީ އެމެރިކާގެ އަލަބަމާގެ މޯގަން ކައުންޓީ ޝެރިފްސް އޮފީހުގައި މަސައްކަތްކުރާ ފުލުހެކެވެ. ޕެޓްރޯލް ލެފްޓިނަންޓެއްކަމުން އޭނާ ޑިއުޓީގެ ބޮޑު ބައި ހޭދަކުރަނީ މަގުމަތީގަ އެވެ. ރޮކްއާ ވައްތަރުކަމުން ސެލްފީ ނަފަން އަންނަ މީހުންނާ ހެދި ޑިއުޓީ އަށް ވެސް މިހާރު އުނދަގޫވާ ކަމަށް އެރިކް ފީލްޑްސް ބުންޏެވެ.

ރޮކް ގޮތަށް އެރިކްގެ ވެސް އިސްކޮޅު ދިގުވެފައި ހަށިގަނޑު ވަރުގަދަ އެވެ. ބޯ ވެސް ތަލަކޮށެވެ، ހިނިއައިސް ހުންނައިރު އަދި މާ ވައްތަރެވެ. ގިނަ ބަޔަކު ބުނެފައިވާ ގޮތުގައި އެރިކްގެ ސިފަ އާއި އޭނާގެ ބޮޑީ ލެންގްއޭޖް ރޮކްއާ ވައްތަރުކަމުން ދެ މީހުން އޮޅޭވަރުވެ އެވެ.

މިކަމާ ހެދި އެރިކަށް ލިބުނު ސަމާލުކަން އެރިކް ފާހަގަކުރަނީ ދިރިއުޅުމަށް ގެނުވި ބޮޑު ބަދަލެއްގެ ގޮތުގަ އެވެ.

"މިހާރު އަހަންނަށް އިހުސާސްކުރެވެނީ ސެލެބްރިޓީއެއް ގޮތަށް،" އޭނާ ބުންޏެވެ. "އެކަމަކު ރޮކްއާ ވައްތަރު ކަމަށް މީހުން ބުންޏަސް، އޭނާއާ ވައްތަރުވާކަށް އަހަރެން ވަކި ހާއްސަ އެއްވެސް ކަމެއް ނުކުރަން."

އެރިކް، 37، ބުނި ގޮތުގައި އޭނާގެ ފޮޓޯއެއް ވަރަށް ފަހުން ފޭސްބުކަށް ޕޯސްޓްކުރުމުން އެ ފޮޓޯ އަށް ގިނަ ބައެއްގެ ސަމާލުކަން ހުއްޓުނީ އެވެ. އަދި އެރިކަށް ލިބެމުން އަންނަ ސަމާލުކަމުގެ ވާހަކަ މޯގަން ކައުންޓީ ޝެރިފްސް އޮފީހުގެ ފޭސްބުކް ޕޭޖްގައި ވެސް ހިމަނާފައިވެ އެވެ.

"އެއީ ހަގީގަތުގައި މިކަމުގެ ފެށުމަކީ. އަހަރެން ނޫޅެން ކޮންމެހެން ރޮކަކަށްވާކަށް. މިއީ ހަމަ އަހަރެން ހުންނަ ސިފަ،" ފުލުހުންގެ ވަޒީފާގައި އުޅޭތާ 17 އަހަރުވީ އޮފިސަރު ބުންޏެވެ.