ރޭޕުގެ ތުހުމަތުގައި ހައްޔަރު ކުރި މީހާ ދޫކޮށްލީ އަވަށުގެ ހުރިހާ އަންހެނުންގެ އެއްޗެހި ދޮވުމަށް ޝަރުތުކޮށް

ބިހާރު (ސެޕްޓެމްބަރު 24) - ރޭޕުގެ ތުހުމަތުގައި އިންޑިއާ އިން ހައްޔަރުކުރި މީހަކު، އޭނާގެ އަވަށުގައި އުޅޭ ހުރިހާ އަންހެނުންގެ އެއްޗެހި ހަ މަސް ދުވަސްވަންދެން ދޮވެ އިސްތިރި ކޮށްދިނުމަށް ޝަރުތުކޮށް، ކަފާލާތުގެ ދަށުން ދޫކޮށްލައިފި އެވެ.

ކޯޓުން ކަނޑައެޅި ޝަރުތުގެ ތެރޭގައި ހިމެނެނީ ބިހާރު ސްޓޭޓުގެ މަޖްހޯރު އަވަށުގައި ދިރިއުޅޭ ގާތްގަނޑަކަށް 2،000 އަންހެނުންގެ ލޯންޑަރީ ސާވިސް އަށް ބޭނުންވާ ޑިޓަޖެންޓް ވެސް ގަންނަން ޖެހޭނީ ރޭޕުގެ ތުހުމަތުކޮށްފައިވާ އުމުރުން 20 އަހަރުގެ ލަލަން ކުމާރު އަމިއްލަ އަށް ކަމަށެވެ.

ދިރިއުޅުމަށް އާމްދަނީ ހޯދުމުގެ ގޮތުން ދޮވެ އިސްތިރިކޮށް އުޅޭ ކުމާރު، ރޭޕުގެ ތުހުމަތުގައި ހައްޔަރުކޮށްފައި ވަނީ މިދިޔަ އެޕްރީލް މަހު އެވެ.

މަހްޖޯރު އަވަށުގެ ކައުންސިލްގެ ވެރިޔާ ނަސިމާ ކަތޫމް ވިދާޅުވީ ކުމާރުގެ މައްޗަށް ކޯޓުން ކަނޑައެޅި ޝަރުތާ މެދު އެ އަވަށުގެ ހުރިހާ އަންހެނުން ވެސް ހިތްހަމަޖެހިފައިވާ ކަމަށެވެ.

"މިއީ ތަފާތު އަދަބެއް. ކޯޓުގެ ނިންމުމުގެ ސަބަބުން މުޖްތަމައުގައި އަންހެނުންގެ ގަދަރު އުފުލިގެން ހިނގައްޖެ އަދި މިއީ ރޭޕިސްޓުންނަށް ދިން މެސެޖެއް،" އެ އަވަށުގެ އަންހެނެއް ކަމަށްވާ އަންޖުމް ޕަރްވީން ބުންޏެވެ.

އިންޑިއާގައި ރޭޕުގެ މައްސަލަތަކަށްދޭ ސަމާލުކަން ބޮޑުވީ 2012 ވަނަ އަހަރު ބަހެއްގެ ތެރޭގައި ޔުނިވާސިޓީގެ ދަރިވަރަކު ރޭޕްކޮށް ބޮޑެތި އަނިޔާތަކެއް ދިން ހާދިސާ އަށް ފަހު އެވެ. އުމުރުން 23 އަހަރުގެ ދަރިވަރު ސިންގަޕޫރަށް ގެންގޮސް ފަރުވާ ދެނިކޮށް ވަނީ މަރުވެފަ އެވެ. އޭގެ ފަހުން އިންޑިއާގައި ވަނީ ރޭޕިސްޓުންނަށް ދޭ އަދަބު ހަރުކަށިކޮށްފަ އެވެ. ނަމަވެސް ރޭޕުގެ ކުށުގެ އަދަދު ދަށެއް ނުވެ އެވެ. މިދިޔަ އަހަރު ވެސް ވަނީ 28،000 ރޭޕް ކޭސް ރިޕޯޓްކޮށްފަ އެވެ.