ޓޫރިޒަމް ދުވަހުގެ ހަރަކާތް: ޖެޓްސްކީ ޓުއާގެ ބައިވެރިން މާލެ އަށް!

ދުނިޔޭގެ ޓޫރިޒަމް ދުވަސް ފާހަގަކުރުމުގެ ގޮތުން ރާއްޖޭގެ އެންމެ އުތުރު ތުރާކުނުން ރާއްޖޭގެ އެންމެ ދެކުނަށް ކުރާ ޖެޓްސްކީ ދަތުރުގައި ބައިވެރިވި މީހުން މިއަދު މާލެ އަތުވެއްޖެ އެވެ.

ފާތިމަތު ޝަނާ މުހައްމަދު

24 ސެޕްޓެމްބަރ 2021

މާލެ އަށް މިއަދު ހަވީރު ކުރި ބޯ ވިއްސާރައިގެ ތެރޭގައި އެ ޓީމު އައުމުން އިއްޒުއްދީނު ފާލަން ސަރަހައްދުން މަރުހަބާ ވިދާޅުވީ ޓޫރިޒަމް މިނިސްޓަރު ޑރ. އަބްދުﷲ މައުސޫމާއި މާލޭގެ މޭޔަރު ޑރ. މުހައްމަދު މުއިއްޒެވެ.

އައްޑޫގައި މި އަހަރުގެ ޓޫރިޒަމް ދުވަސް ފާހަގަކުރުމަށް ފެށި މި ހަރަކާތުގައި ހުރިހާ އަތޮޅަކަށް ދިއުމަށް ފަހު ޖެޓްސްކީގެ ބުރު ނިންމައިލާނީ އައްޑުއަށެވެ.

ޖެޓް ސްކީގައި ރާއްޖެވަށާ ބުރެއްޖެހުމަށް ކުރާ ދަތުރުގެ ބައިވެރިންނަށް މާލޭ ސިޓީގެ މޭޔަރ @MMuizzu މަރުހަބާ ދަންނަވައިފި pic.twitter.com/Zgy2fxccAB
— Male' City Council (@MaleCitymv) September 24, 2021

ޖެޓްސްކީގެ ބައިވެރިންނަށް މާލޭގެ މޭޔަރު ޑރ. މުއިއްޒު މަރުހަބާ ދަންނަވަނީ.

ޖެޓްސްކީގައި ހުރިހާ އަތޮޅަކަށް ދިއުމަކީ އައްޑޫގައި ޓޫރިޒަމް ދުވަސް ފާހަގަކުރަން ރޭވި އެންމެ ބޮޑު ހަރަކާތް ކަމަށް ވިޔަސް އެ ސިޓީގައި ކޮވިޑްގެ ހާލަތު ގޯސްވުމުން ވަނީ އެ ދުވަސް ފާހަގަ ނުކުރަން ޓޫރިޒަމް މިނިސްޓްރީން ވަނީ ނިންމައިފަ އެވެ. އެކަމަކު، މި ހަރަކާތް ރޭވި ގޮތަށް ކުރިއަށް ގެންދަން އެ މިނިސްޓްރީން ނިންމީ އެވެ.

ޖެޓްސްކީ ޓުއާގެ ބައިވެރިން މިއަދު މާލެ އަށް ގާތްކުރަނީ: މި ޓީމުން މާލެ އިން ފުރާނީ މާދަން ހެނދުނު.

މިދިޔަ ބުދަ ދުވަހު ފެށި މި ދަތުރު އަންނަ ހޯމަ ދުވަހަށް ނިންމައިލާއިރު، ރާއްޖޭގެ 20 ރަށަކަށް މަޑުކުރާނެ އެވެ. ބައެއް ރަށްރަށުގައި ރޭގަނޑު މަޑުކުރަން ވެސް ހަމަޖެހިފައިވެ އެވެ. މި ޓީމުން ތުރާކުނުން މާލެއަށް އައިސްފައިވާ އިރު މާދަން ހެނދުނު މާލެ އިން ފުރައިގެން އެންމެ ފުރަތަމަ ދާނީ އއ. ރަސްދުއަށެވެ.

Comments