އެމްއެންޕީގެ ނައިބު ރައީސަކަށް ޝިދާތާ، އަންހެނުންގެ ގޮފީގެ ލީޑަރަކަށް ދުންޔާ

މޯލްޑިވްސް ނެޝަނަލް ޕާޓީ (އެމްއެންޕީ) ގެ މަތި އުތުރު ރީޖަންގެ ނައިބު ރައީސްކަމަށް ކުރީގެ ޖެންޑާ މިނިސްޓަރު ޝިދާތާ ޝަރީފު އަދި އެ ޕާޓީގެ އަންހެނުންގެ ވިންގްގެ ލީޑަރަކަށް ކުރީގެ ފޮރިން މިނިސްޓަރު ދުންޔާ މައުމޫން މިއަދު އިންތިހާބުކޮށްފި އެވެ.

އެ ދެ ބޭފުޅުން އެ މަގާމުތަކަށް ކަނޑައެޅީ، ކުރީގެ ޑިފެންސް މިނިސްޓަރު އަދި ދަނގެތީ ދާއިރާގެ މެމްބަރު އަހުމަދު ނާޒިމް އިސްވެ އުފައްދަން މަސައްކަތް ކުރައްވާ ސިޔާސީ ޕާޓީ، އެމްއެންޕީގެ ވަގުތީ އެގްޒެކްޓިވް ކައުންސިލަށް މެންބަރުން ހޮވުމަށް ބޭއްވި އިންތިހާބުގަ އެވެ.

މިއަދު ކުރިއަށް ގެންދިޔައީ މަތި އުތުރު ރީޖަންގެ ނައިބު ރައީސާއި އަންހެނުންނަށް ހާއްސަ ކޮށްފައިވާ ނާއިބު ރައީސާއި އަންހެނުންގެ ވިންގްގެ ލީޑަރާއި ޒުވާނުންގެ ވިންގްގެ ލީޑަރުގެ އިތުރުން ކައުންސިލްގެ މެންބަރު ކަމަށް 14 ބޭފުޅަކާއި އަދި ކައުންސިލުން އަންހެނުންނަށް ހާއްސަކުރި ހަތް ގޮނޑިއަށް މީހުން އިންތިހާބުކުރުމުގެ ވޯޓުލުމެވެ.

ޝިދާތާ ކާމިޔާބުކުރެއްވި މަތި އުތުރު ރީޖަންގެ ނާއިބު ރައީސް ކަމަށް އޭނާއާ އެކު ކުރިމަތިލެއްވީ ޓީވީ ޕްރެޒެންޓަރު އަހުމަދު އަނޫޝް އާއި އާއި މުހައްމަދު ސައީދެވެ. ޖުމުލަ 276 މީހުން ވޯޓުލިއިރު، ޝިދާތާ ކާމިޔާބުކުރެއްވީ 137 މީހުންގެ ވޯޓުންނެވެ. އަނޫޝަށް 118 ވޯޓު ލިބުނުއިރު، ސައީދަށް ހޯއްދެވުނީ 21 ވޯޓެވެ.

އެމްއެންޕީގައި ހަ ނާއިބު ރައީސުން ތިއްބަވާނެ އެވެ. ވަދާކުރާނެ އިތުރު މީހަކު ނެތިގެން، އިންތިހާބަކާ ނުލައި ހަތަރު ނާއިބު ރައީސުން މިހާރު ވަނީ ހޮވިފަ އެވެ؛ އެއީ އުތުރު ރީޖަންގެ ނާއިބު ރައީސަކަށް ހުސައިން އިސްމާއީލާއި މެދު ރީޖަންގެ ނާއިބު ރައީސަކަށް ވިލިމާލެ ދާއިރާގެ މެމްބަރު އަހުމަދު އުޝާމް އާއި މެދު ދެކެނު ރީޖަންގެ ނާއިބު ރައީސަކަށް ތިމަރަފުށި ދާއިރާގެ މެމްބަރު އަބްދުﷲ ރިޔާޒާއި ދެކުނު ރީޖަނަށް ސައިރިކްސްގެ ޗެއާމަން އަހުމަދު ޝަރީފެވެ.

އަންހެން ވިންގުގެ ލީޑަރަށް ތިން ބޭފުޅަކު ވަދާކުރެއްވިއިރު، ދުންޔާ އެ މަގާމަށް އިންތިހާބުކުރީ 207 މީހުންގެ ވޯޓުންނެވެ. އެ މަގާމަށް ދެން ވާދަކުރި އައިޝަތު އަބްދުﷲ އަށް 43 ވޯޓު އަދި އައިޝަތު ހުސެއިން މަނިކަށް 11 ވޯޓު ލިބުނެވެ.

އިތުރު މަގާމުތަކަށް ހޮވި ބޭފުޅުން

- އަންހެނުންނަށް ހާއްސަ ކޮށްފައިވާ ރައީސް ކަމަށް، މިރުފަތު އިސްމާއިލް ޝަފީގް

- ޒުވާނުންގެ ވިންގު ލީޑަރު ކަމަށް، އުމެއިރު އަހްމަދު

- ކައުންސިލްގެ 14 މެމްބަރުގެ ގޮނޑި އަށް، އަސްރާ އަހްމަދު، މުހައްމަދު މަނިކު، މުހައްމަދު ހާނިމް، ހުސެއިން ފަޔާޒް، އިބްރާހިމް ޝަބާހު، އަހްމަދު ރިޔާޒް، އަހަމްދު ސާލިމް ސައީދު، މުހައްމަދު ނިޒާމް، އަހްމަދު އަމްޖަދު، އިބްރާހިމް މުހައްމަދު، އަބްދުﷲ ޝުހޫދު، އަޝްރަފު މުހައްމަދު އަލީ އަދި އަލީ އަބްދުލް ލަތީފް.

- ކައުންސިލްގެ އަންހެނުންނަށް ހާއްސަކުރި ހަތް ގޮނޑި އަށް، އައިމިނަތު ޝާއިދާ، އިފާ ޝަރީފް، އައިމަނަތު އަޒީމާ، އައިޝަތު ޝައްމާ، ސިޔާމާ އަލީ، ފާތިމަތު ނާޒީން އަދި ފާތިމަތު ރިފާއު.

އެމްއެންޕީގެ އިންތިގާލީ ކައުންސިލަށް ކުރިމަތިލާން ހުޅުވައިލި މުއްދަތު ހަމަވިއިރު، ޕާޓީގެ ރައީސަކަށް ނާޒިމް ފިޔަވައި އިތުރު އެއްވެސް ބޭފުޅަކު ކުރިމައްޗެއް ނުލަ އެވެ. އެހެން ކަމުން، އެންއެންޕީގެ ވަގުތީ ރައީސަކަށް އޭނާ ވަނީ އޮޓޮމެޓިކުން ހޮވިވަޑައިގެންފަ އެވެ.

ޕާޓީގެ ދިދަ އާއި ނިޝާން ވަނީ ފާސްކޮށްފައި

އެމްއެންޕީ އުފެއްދުމަށް ބާއްވަމުން އަންނަ ބައްދަލުވުމުގައި މިއަދު ވަނީ އެ ޕާޓީގެ ދިދަ އާއި ނިޝާނާއި ޕާޓީގެ އަސާސީ ގަވާއިދާއި އަދި ޕާޓީގެ އޮނިގަނޑު ވެސް ފާސްކޮށްފަ އެވެ.

އެމްއެންޕީއަކީ "އެއް ބޭފުޅަކު ވަށައި އެނބުރޭ" ފިކުރު ދޫކޮށް، އެހެން ސިޔާސީ ޕާޓީތަކާ ހިލާފަށް ހުރިހާ އެންމެނަށް ވެސް ފުރުސަތު ލިބޭ ޕާޓީއެއް ކަމަށް އެ ޕާޓީގެ އިސް މެންބަރުން ވަނީ ވިދާޅުވެފަ އެވެ.

ކުރިއަށް އޮތް 2023 ގައި ރިޔާސީ އިންތިހާބުގައި ވާދަކުރާނެ ކަމަށާއި އެ އިންތިހާބު ކާމިޔާބުކޮށް ވެރިކަމަށް ވެސް އަންނާނެ ކަމަށް އެ ޕާޓީން ބުނެ އެވެ.

އެމްއެންޕީ އުފައްދަން އިއުލާނު ކުރިތާ ދެ މަހެއްހާ ދުވަހުގެ ތެރޭގައި 5،000 މީހުންގެ ސޮއި ހޯދައި އިލެކްޝަންސް ކޮމިޝަނަށް ވަނީ ހުށަހަޅައިފަ އެވެ. މަޖިލީހުގެ މެމްބަރުންތަކެއް އިސްވެ ތިބެ އުފައްދަވާ ޕާޓީގެ އަމާޒަކީ މި އަހަރު ނިމޭއިރު 10،000 މެމްބަރުން ހަމަކުރުމެވެ.