ޕާކިސްތާނުގެ ނިއުކްލިއާ މަޝްރޫއުގެ ބާނީ އަވަހާރަވެއްޖެ

ޕާކިސްތާނުގެ ނިއުކްލިއާ މަޝްރޫއުގެ ބައްޕަގެ ގޮތުގައި މަޝްހޫރުވެފައިވާ، އެ ގައުމުގެ ކުޅަދާނަ ނިއުކްލިއާ ސައެންސްވެރިޔާ އަބްދުލްގަދީރު ޚާން، 85، މިއަދު އަވަހާރަވެއްޖެ އެވެ.

ނިއުކްލިއާ ހަތިޔާރުގެ ގާބިލްކަން ލިބިގެންވާ ފުރަތަމަ އިސްލާމީ ގައުމުގެ ލަގަބު ޕާކިސްތާނަށް ހޯދައިދިން މަޝްހޫރު ސައެންސްވެރިޔާ، އަބްދުލްގަދީރަކީ ޕާކިސްތާނުގެ އާންމު ރައްޔިތުންގެ މެދުގައި ވަރަށް ބޮޑު މަގްބޫލުކަމެއް ހޯއްދަވާފައިވާ ބޭފުޅެކެވެ.

ކޮވިޑް ޖެހުމާ ގުޅިގެން، ނޭވާލާ ނިޒާމަށް މައްސަލަތަކެއް މެދުވެރިވުމުން، އަބްދުލްގަދީރު ހޮސްޕިޓަލުގައި އެނދުމަތިކުރީ މިދިޔަ އޮގަސްޓް މަހުގެ ތެރޭގަ އެވެ. ހޮސްޕިޓަލުގައި ބާއްވައިގެން ދުވަސްތަކެއް ވަންދެން ފަރުވާ ދިނުމަށް ފަހު، ހާލުކޮޅު ތަންކޮޅެއް ރަނގަޅުވުމުން ގެއަށް ބަދަލުކުރީ މީގެ ހަފުތާތަކެއް ކުރިންނެވެ.

ނަމަވެސް މިއަދު ހެނދުނު އަނެއްކާ ވެސް ނޭވާލާން އުނދަގޫވުމާ ގުޅިގެން އިސްލާމްއާބާދުގެ ހޮސްޕިޓަލަކަށް ގެންގޮސް އިތުރު ފަރުވާ ދޭން ފެށި އެވެ. ނަމަވެސް ފަރުވާ ދޭން ފެށިތާ މާ ގިނައިރުތަކެއް ނުވަނީސް އަވަހާރަވީ ކަމަށް ޕާކިސްތާނު ސަރުކާރުން ބުންޏެވެ.

ޕާކިސްތާނުގެ ދާހިލީ ވަޒީރު ޝައިޚް ރާޝިދު އަހްމަދު ވިދާޅުވި ގޮތުގައި، އަބްދުލްގަދީރު ޚާން ރަސްމީ އިއްޒަތުގައި ފަސްދާނުލުމުގެ ކަންތައް އިންތިޒާމު ކުރުމަށް ބޮޑުވަޒީރު އިމްރާން ޚާން ވަނީ އަންގަވައިފަ އެވެ. ކަށުނަމާދު މިއަދުގެ އަސްރު ނަމާދަށް ފަހު އިސްލާމް އާބާދުގެ ފައިސަލް މިސްކިތުގައި ބާއްވާނެ އެވެ.

Deeply saddened by the passing of Dr A Q Khan. He was loved by our nation bec of his critical contribution in making us a nuclear weapon state. This has provided us security against an aggressive much larger nuclear neighbour. For the people of Pakistan he was a national icon.
— Imran Khan (@ImranKhanPTI) October 10, 2021

ޕާކިސްތާނުގެ ބޮޑުވަޒީރު އިމްރާން ޚާން ވިދާޅުވި ގޮތުގައި، ނިއުކްލިއާ ސައެންސްވެރިޔާ އަވަހާރަވުމަކީ މުޅި ގައުމަށް ލިބުނު ފޫނުބެއްދޭ ވަރުގެ ގެއްލުމެކެވެ. އަދި އޭނާއަކީ ޕާކިސްތާނަށް ނިއުކްލިއާ ހަތިޔާރުގެ ގާބިލްކަން ހޯއްދަވައިދެއްވުމުގެ ސަބަބުން، ރައްޔިތުންގެ މެދުގައި މަގުބޫލު ބޭފުޅެއްކަން ވެސް އިމްރާން ފާހަގަ ކުރެއްވި އެވެ.

ނިއުކްލިއާ ހަތިޔާރުގެ ގާބިލްކަން ލިބިގެންވާ އަވައްޓެރިއެއްގެ ފަރާތުން ކުރިމަތިވެދާނެ އުދުވާނަކުން ސަލާމަތް ވުމުގެ ކުޅަދާނަކަން ޕާކިސްތާނަށް ހޯދައިދިނީ ވެސް އަބްދުލްގަދީރު ކަމަށް، ބޮޑުވަޒީރު އިމްރާން ޚާން ވިދާޅުވި އެވެ.

انا للّٰہ وانا الیہ راجعون

Deeply saddened to learn about the passing of Dr. Abdul Qadeer Khan. Had known him personally since 1982.
He helped us develop nation-saving nuclear deterrence, and a grateful nation will never forget his services in this regard. May Allah bless him.
— Dr. Arif Alvi (@ArifAlvi) October 10, 2021

ޕާކިސްތާނުގެ ރައީސް އާރިފް އަލްވީ ކުރެއްވި ޓުވީޓެއްގައި ވިދާޅުވީ އަބްދުލްގަދީރަކީ 1982 ވަނަ އަހަރުން ފެށިގެން ދަންނަ ވަރަށް ގާތް އެކުވެރިއެއް ކަމަށެވެ. އަދި ޕާކިސްތާނަށް ނިއުކްލިއާ ހަތިޔާރުގެ ގާބިލްކަން ހޯދައިދިނުމަށް އޭނާ ކުރެއްވި މަސައްކަތް، ޕާކިސްތާނު ރައްޔިތުން ދުވަހަކުވެސް ހަނދާން ނުނެތޭނެ ކަމަށް ވެސް ރައީސް އާރިފް އަލްވީ ވިދާޅުވި އެވެ.

Comments