100 ކިލޯގެ މަސްތުވާތަކެތި ހޯދީ ފަޅު ރަށެއްގައި ފޮރުވާފައި ހުއްޓާ

މިދިޔަ ބުދަ ދުވަހު ފުލުހުން އަތުލައިގަތް 100 ކިލޯގެ މަސްތުވާތަކެތި ހޯދީ ފަޅު ރަށެއްގައި ފޮރުވާފައި ހުއްޓާ ކަމަށް ފުލުހުން ބުނެފި އެވެ.

ފުލުހުން ހިންގި އޮޕަރޭޝަނެއްގައި 100 ކިލޯގެ މަސްތުވާތަކެތި އަތުލައިގަނެ، 10 މީހަކު ވަނީ ހައްޔަރުކޮށްފަ އެވެ. އޭގެ ތެރެއިން ދެ މީހަކު ދޫކޮށްލައި އަދި ބާކީ ތިބި މީހުންގެ ބަންދުގެ މުއްދަތު ކޯޓުން ވަނީ އިތުރުކޮށްފަ އެވެ.

ފުލުހުން ބުނީ ރާއްޖެއަށް މަސްތުވާތަކެތި އެތެރެކުރަން އުޅޭ ކަމަށް ލިބުނު އިންޓެލިޖެންސް މައުލޫމާތަކާ ގުޅިގެން މާލެ އާއި ހުޅުމާލޭގެ ބައެއް ތަންތަނާއި ފަޅު ރަށްތައް ފާސްކުރި ކަމަށެވެ. އަދި އެ މަސްތުވާތަކެތި ފެނުނީ ފަޅު ރަށެއްގައި ފޮރުވާފައި ހުއްޓާ ކަމަށް ފުލުހުން ބުންޏެވެ. އެކަމަކު އެއީ ކޮން ރަށެއް ކަމެއް ފުލުހުން ނުބުނެ އެވެ.

ފުލުހުން ބުނިގޮތުގައި އެ މައްސަލާގައި ހައްޔަރުކުރީ އަށް ދިވެއްސަކާއި ދެ ބިދޭސީއެކެވެ. އެ މީހުންގެ އެއްވެސް މައުލޫމާތެއް ވެސް ފުލުހުން އަދި ހާމައެއް ނުކުރެ އެވެ.

ފަޅު ރަށެއްގައި ފޮރުވާފައި ހުއްޓާ 100 ކިލޯގެ މަސްތުވާތަކެތި ހޯދިއިރު، މީގެކުރިން ގދ. އަތޮޅުގެ ފަޅު ރަށެއްގައި 149 ކިލޯގެ މަސްތުވާތަކެތި ވަޅުލާފައި ހުއްޓާ އަތުލައިިގަތެވެ. އެ މައްސަލާގައި ދައުލަތުން ފަސް މީހަކަށް ދައުވާ ކުރިޔަސް، ތަހުގީގުގައި ފުލުހުން އަމަލުކުރި ގޮތުން އޭގެ ތެރެއިން ހަތަރު މީހަކު ވަނީ ސަލާމަތްވެފަ އެވެ. އަދި ބާކީ ހުރި މީހާގެ ޝަރީއަތް އަދިވެސް ދަނީ ކުރިއަށެވެ.