ޖަލުތަކުގައި ހަރުކަށި ފިކުރު ފަތުރާ މީހުންނަށް ޔުނިޓެއް ހަދައި އެކަހެރި ކުރަން ތައްޔާރުވަނީ

ޖަލުތަކުގައި ހަރުކަށި ފިކުރު ފަތުރާ މީހުން އެކަހެރި ކުރުމަށް 100 މީހުންގެ ޖާގައިގެ ޔުނިޓެއް ތައްޔާރުކޮށް އެކަން ކުރަން ތައްޔާރުވަމުންދާ ކަމަށް ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެ އެވެ.

މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި އަހުމަދު މުހައްމަދުފުޅު ވިދާޅުވީ، ޖަލުތަކުގައި ޖާގައިގެ ދަތިކަން ދިމާވެފައި އޮތުމަކީ އެތަންތަނުގައި ހަރުކަށި ފިކުރު ފަތުރާ މީހުންނަށް ލިބޭ ވަރަށް ބޮޑު ފަސޭހައެއް ކަމަށެވެ. އެކަން ހައްލު ކުރަން އެ ފިކުރު ފަތުރާ މީހުން އެކަހެރި ކުރަން ހާއްސަ ތަނެއް ހަދައި އެތަނަށް ބަދަލު ކުރާނެ މީހުން ދެނެގަތުމުގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ.

"އެކަން މަދުކުރުމަށް ޓަކައި އެކަމަށް ހާއްސަ ކުރެވޭ 100 މީހުންގެ ޖާގައިގެ ޔުނިޓެއް މިހާރު ހުރީ ގާއިމް ކުރެވިފައި،" އަހުމަދު މުހައްމަދުފުޅު ވިދާޅުވި އެވެ.

އޭނާ އިތުރަށް ވިދާޅުވީ، އެ ޔުނިޓުގައި ބަހައްޓަން ޖެހޭ މީހުން ދެނެގަތުމަށް ޖަލުތަކުގައި ތިބި މީހުންގެ ނުރައްކާތެރިކަން ބެލުމަށް ރިސްކް އެސެސްމެންޓު ހަދަމުން ދަނީ ބައިނަލްއަގުވާމީ ފަރާތްތަކާ ގުޅިގެން ކަމަށެވެ.

އެ މަސައްކަތުގެ ތެރެއިން ޖަލުގައި ތިބި މީހުންނާ އިންޓަވިއު ކުރުމުގެ އިތުރުން ފުލުހުންގެ އިންޓެލިޖެންސް މެދުވެރިކޮށް ހޯދަން ޖެހޭ ބައެއް މައުލުމާތުތައް ހޯދުމުގެ މަސައްކަތް ކުރަމުންދާ ކަމަށް ވިދާޅުވި އެވެ.

އަހުމަދު މުހައްމަދުފުޅު ވިދާޅުވީ ހަރުކަށި ފިކުރު ފަތުރާ މީހުން ވަކި ތަނަކަށް ބަދަލުކުރާއިރު އެ މީހުން ބަލައްޓަން ހަމަޖައްސާ މުވައްޒަފުންނަށް ވެސް އެކަމަށް ހާއްސަ ތަމްރީނު ދީފައިވާ ކަމަށެވެ. އަދި އެފަދަ މީހުންނާ މެދު އަމަލު ކުރާނެ ގޮތުގެ އެސްއޯޕީއެއް ނުވަތަ އުސޫލެއް ވެސް އެކުލަވާލާނެ ކަމަށް ވިދާޅުވި އެވެ.

ހޯމް މިނިސްޓަރު އިމްރާން އަބްދުﷲ ވިދާޅުވީ، ޖަލުތަކުގައި ހަރުކަށި ފިކުރު ފަތުރާ 40 މީހަކު މިހާތަނަށް ފާހަގަކުރެވިފައިވާ ކަމަށެވެ.

"އަޅުގަނޑުމެންނަށް ފުރަތަމަ އެސެސްމެންޓުގެ ތެރެއިން 40 އަށް ވުރެ ގިނަ މީހުން ވަނީ ފާހަގަކުރެވިފައި،" އިމްރާން ވިދާޅުވި އެވެ.

އަންނަ އަހަރުގެ ޖެނުއަރީ ހިސާބުގައި ރިސްކް އެސެސްމެންޓް އެއްކޮށް ނިންމާލައި އެ މީހުންނަށް ހާއްސަ ޔުނިޓަށް ބަދަލު ކުރެވޭނެ ކަމަށް ވިދާޅުވި އެވެ.

ހަރުކަށި ފިކުރުމުގެ މީހުން ރިހެބިލިޓޭޓު ކުރުމަށް އެ މީހުންނަށް ހާއްސަ ޕްރޮގްރާމުތައް މިހާރު އެކުލަވާލާފައިވާ ކަމަށް ވެސް އިމްރާން ވިދާޅުވި އެވެ. އަދި އެ ޕްރޮގްރާމް ހިންގައިދޭނެ މީހަކު ހަމަޖެހުނުހާ އަވަހަށް އެކަން ފަށާނެ ކަމަށް އޭނާ ވިދާޅުވި އެވެ.

ޖަލުތަކުގައި ހަރުކަށި ފިކުރު ފަތުރާ މީހުން އެކަހެރި ކުރުމަށް ތައްޔާރުވެފައިވާއިރު، އެ ފިކުރު ޖަލުތަކުގައި ފެތުރޭ ގޮތް ބެލުމަށް ހޯމް މިނިސްޓްރީން މިހާރު ވަނީ ދިރާސާއެއް ވެސް ހަދަން ފަށައިފަ އެވެ.