އެމިރޭޓްސް އިން "ޕްރިމިއަމް އިކޮނޮމީ" ކްލާސް އިތުރު ބޯޓުތަކަށް ގެންނަނީ

ޔުނައިޓެޑް އަރަބް އެމިރޭޓްސްގެ ގައުމީ އެއާލައިން، އެމިރޭޓްސް އިން މިދިޔަ އަހަރު ތައާރަފް ކުރި "ޕްރިމިއަމް އިކޮނޮމީ" ކްލާސް އެ އެއާލައިންގެ އިތުރު ބޯޓުތަކަށް ގެނައުމުގެ މަސައްކަތް ފަށައިފި އެވެ.

އެމިރޭޓްސް އިން ވަނީ އެ އެއާލައިންގެ 105 ވައިޑް ބޮޑީ އެއާކްރާފްޓަށް މި ކްލާސް ތައާރަފް ކުރަން ނިންމާފަ އެވެ. "ޕްރިމިއަމް އިކޮނޮމީ" ކްލާސް ވެސް ހިމެނޭނީ ބިޒްނަސް ކްލާހެކޭ އެއްގޮތަށް ވަކި ކެބިންއެއް ގޮތަށެވެ.

މި ބޯޓުތަކުގެ އެއްބައި "ޕްރިމިއަމް އިކޮނޮމީ" ލެވެލް އަށް ގެންނަން 18 މަސް ދުވަސް ނަގާނެ އެވެ. މި ބަދަލުތައް ގެންނަނީ އެމިރޭޓްސްގެ އޭ380 ގެ 52 ބޯޓާއި ބޮއިން 777 މަރުކާރުގެ 53 ބޯޓަށެވެ. އިކޮނޮމީ ކްލާހުގެ ޕްރިމިއަމް ތައާރަފް ކުރި އިރު ބިޒްނަސް ކްލާހުގެ އިތުރު ޕްރޮޑަކްޓަށް ތައާރަފް ކުރަން ވެސް އެމިރޭޓްސް އިން ވަނީ ނިންމައިފަ އެވެ.

"ޕްރިމިއަމް އިކޮނޮމީ" ކްލާހުން ހަ ފަރާތަށް އެޑްޖަސްޓް ކުރެވޭ ހެޑްރެސްޓް ބައެއް ގޮޑީގައި ހިމަނާފައިވެ އެވެ. މީގެ އިތުރުން ފަސޭހައިން ފައި ދަމާލެވޭނެ ގޮތަށް ޖާގަ އޮންނާނެ އެވެ. މި ކްލާހުގައި ހުންނަ ގޮނޑިތައް ފުޅާވެފައި ބުރަކަށި ރީތިކޮށް ހަމަޖައްސާލެވޭނެ އެވެ. އާންމުކޮށް ބޯޓުތަކުގައި ހުންނަ ޑައިނިން ޓޭބަލަށް ވުރެ ބޮޑު ޑައިނިން ޓޭބަލެއްގެ އިތުރުން ވަކިން ކޮކްޓެއިލް ޓޭބަލެއް ވެސް ގޮޑީގައި އިނދެ އެވެ.

އެމިރޭޓްސްގެ ރައީސް ޓިމް ކްލާކް ވިދާޅުވީ، އާ ބަދަލުތައް ގެންނަނީ ކަސްޓަމަރުންނަށް އެންމެ ފުރިހަމަ ހިދުމަތްތައް ދިނުމަށް ކަަށެވެ.

"ޕްރިމިއަމް އިކޮނޮމީ ކްލާހަށް ގިނަ ބައެއްގެ ތަރުހީބު އެބަލިބޭ. ކަސްޓަމަރުން ތިބީ މި އެއާލައިން އިން ދޭ ހިދުމަތްތަކާ މެދު ވަރަށް ބޮޑަށް ހިތްހަމަޖެހިފައި،" އޭނާ ވިދާޅުވި އެވެ. ޕްރިމިއަލް ކްލާސް ތައާރަފް ކުރާ އާ ބޯޓުތަކުގެ ރިނޮވޭޝަން މަސައްކަތް ކުރަނީ ދުބާއީގަ އެވެ.

އާ ބޯޓުތަކާ އެކު ޕްރިމިއަމް ކްލާސް ތައާރަފްކޮށްފައިވާ ބޯޓުތަކުގެ އަދަދު 111 އަށް އަރާނެ އެވެ. އެމިރޭޓްސްގެ "ޕްރިމިއަމް އިކޮނޮމީ" ކްލާހުގައި މިވަގުތު ދަތުރުކުރެވޭނީ ފްރޭންކްފަޓާއި ލަންޑަންގެ ހީތުރޯ އާއި ނިއު ޔޯކްގެ ޖޭއެފްކޭ އާއި ޕެރިސްއަށް ދަތުރުކުރާ ފްލައިޓަކުންނެވެ.