އަލީ އަށް އަނެއްކާ ވެސް ހޮލީވުޑްގެ ފިލްމެއް

"ފާސްޓް އެންޑް ފިއުރިއަސް 7" އާއި "ވިކްޓޯރިއާ އެންޑް އަބްދުލް" އަދި "ޑެތު އޮން ދަ ނައިލް" ފަދަ އިންޓަނޭޝަނަލް ފިލްމުތަކުގައި މަސައްކަތްކޮށްފައިވާ ބޮލީވުޑްގެ އެކްޓަރު އަލީ ފަޒަލް އަނެއްކާވެސް ބޭރުގެ ބޮޑު ފިލްމަކަށް ސޮއިކޮށްފި އެވެ.

މީޑިއާތަކުން ބުނެފައިވާ ގޮތުގައި މި ފިލްމަކީ ހޮލީވުޑްގެ މަޝްހޫރު އެކްޓަރު ޖެރާޑް ބަޓްލާ މުހިއްމު ރޯލެއް ކުޅޭ "ކަންދަހާރު" އެވެ. މިއީ އަފްގާނިސްތާގެ ވާހަކައެއް ކިޔައިދޭ އެއްޗެކެވެ. އަދި މި ފިލްމަކީ އެމެރިކާގެ އަސްކަރިއްޔާގެ ކުރީގެ އިންޓެލިޖެންސް އޮފިސަރެއް ކަމަށްވާ މިޝެލް ލަ ފޯޗޫން އަފްގާނިސްތާނުގައި ކުރި ތަޖުރިބާގެ މައްޗަށް އޭނާ ލިޔެފައިވާ ސްކްރީންޕްލޭއަކަށް ހަދާ އެއްޗެކެވެ. އޭނާ އަކީ އަފްގާނިސްތާނުގައި ގާއިމުކުރި އެމެރިކާގެ ޑިފެންސް އިންޓެލިޖެންސް އެޖެންސީގައި މަސައްކަތްކުރި މީހެކެވެ.

"ކަންދަހާރު" ގެ ޑައިރެކްޝަނާ ހަވާލުވެފައި ވަނީ ޖެރާޑް އެކު ކުރިން ވެސް ފިލްމުތަކެއް ގެނެސްދީފައިވާ ރިކް ރޯމަން ވޯގް އެވެ. އޭނާ އަކީ "އެންޖެލް ހޭޒް ފޯލެން" އާއި "ފެލަން" އަދި "ގްރީންލޭންޑް" ފަދަ ފިލްމުތައް ގެނެސްދިން ޑައިރެކްޓަރެވެ. ރިކް އެންމެ އަވަހަށް ގެނެސްދޭން އޮތް ފިލްމަކީ މި މަހުގެ 10 ގައި ރިލީޒްކުރަން ހަމަޖެހިފައިވާ "ނެޝަނަލް ޗެމްޕިއަންސް" އެވެ.

"ނައިޓް ހޭޒް ފޯލެން" ކިޔާ ފިލްމެއް ވެސް އިއުލާންކޮށްފައި އޮތް ޑައިރެކްޓަރުގެ "ކަންދަހާރު" ގެ ޝޫޓިން ވަރަށް އަވަހަށް ސައުދީ އަރަބިއްޔާގައި ފަށަން ވަނީ ހަމަޖެހިފަ އެވެ.

އަލީ މުހިއްމު ރޯލެއް ކުޅެފައިވާ ޑައިރެކްޓަރު ކެނެތު ބްރެނާގެ "ޑެތު އޮން ދަ ނައިލް" އަކީ އަންނަ އަހަރުގެ ފެބުރުއަރީ 11 ގައި ރިލީޒްކުރަން ހަމަޖެހިފައިވާ އެއްޗެކެވެ. އޭގެ ކާސްޓްގައި ގަލް ގެޑޯ، އާމީ ހެމާ، ލެޓީޝިއާ ރައިޓް، ރަސެލް ބްރޭންޑް، ޑޯން ފްރެންޗް، ރޯޒް ލެޒްލީ، އެމާ މެކޭ އަދި ޖެނިފާ ސޯންޑާޒް ފަދަ ތަރިން ހިމެނެ އެވެ.

ބަތަލާ ރިޗާ ޗައްޑާއާ ލޯބީގެ ގޮތުން ގުޅިގެން އުޅޭ އަލީ، 35، ކުޅެފައިވާ ފިލްމުތަކުގެ ތެރޭގައި "ފުކްރޭ" ފްރެންޗައިޒް އާއި "ޕްރަސްތާނަމް" އާއި "މިލަން ޓޯކީޒް" އަދި "ހެޕީ ޕިރް ބާގް ޖޭއޭގީ" ހިމެނެ އެވެ.