އަލީއާ އެކު ޝާހިދަށް ފްރާންސް ފިލްމެއްގެ ރިމޭކް

ޝާހިދު ކަޕޫރާ އެކު ޑައިރެކްޓަރު/ޕްރޮޑިއުސަރު އަލީ އައްބާސް ޒަފަރު ހަދަން ނިންމާފައިވާ ފިލްމަކީ ފްރާންސްގެ ކާމިޔާބު ފިލްމެއްގެ ރިމޭކް ކަމަށް ރިޕޯޓްތައް ބުނެފި އެވެ.

ބޮލީވުޑް ހަންގާމާ އިން ބުނި ގޮތުގައި މި ފިލްމަކީ 2011 ގައި އެކްޝަން ތުރިލާ ނުއީ ބްލާންޗް (ސްލީޕްލެސް ނައިޓްސް) ގެ ރިމެކެކެވެ. އެ ފިލްމަކީ އަންޑަވޯލްޑާ ގުޅުން އޮންނަ ކަމަށް ފަޅާއަރާ ފުލުހަކު އިސްކޮށް ހުރެގެން ނުފޫޒު ގަދަ ޑްރަގް ލޯޑެއް އަތުލައިގަންނަން ހިންގާ އޮޕަރޭޝަނުގެ ތެރޭގައި އޭނާގެ އަންހެން ދަރިފުޅު ކިޑްނެޕްކުރުމުން ދިމާވާ ހާދިސާތަކެއް ކިޔައިދިން ފިލްމެކެވެ.

"ނުއީ ބްލާންޗް" ހިންދީ އޯޑިއަންސަށް ގެނެސްދޭ އިރު، އޭގެ ވާހަކަ އަށް އިންޑިއާވަންތަކަން ގެނެސް، ހިންދީ އޯޑިއަންސް ބޭނުންވާ ކަހަލަ ރަހަތައް ގެންނާނެ އެވެ. އެކަމަކު މި ފިލްމު ޑައިރެކްޓްކުރާނީ ސީދާ އަލީ ކަމެއް އަދި ކަށަވަރެއް ނުވެ އެވެ. ބެލެވޭ ގޮތުން ފިލްމު އަލީ ޕްރޮޑިއުސްކޮށް، ފިލްމު ޑައިރެކްޓްކުރާނީ އެހެން މީހެކެވެ.

ދެހާސް ނަވާރަ ވަނަ އަހަރު "ބާރަތު" ގެނެސްދިން ޑައިރެކްޓަރު 2020 އިން ފެށިގެން ތައްޔާރުވާ ކަމަށް އަޑުއަރާފައި ވަނީ ކެޓްރީނާ ކައިފާ އެކު ދެ ބަޔަކަށް ހަދަން ނިންމާފައިވާ ސުޕަހީރޯ ފިލްމު "ސުޕަ ސޯލްޖާ" އަށެވެ. އަލީ ޑައިރެކްޓްކޮށް ގެނެސްދިން އެންމެ ފަހުގެ އުފެއްދުމަކީ މި އަހަރުގެ ކުރީކޮޅު އެމެޒޯން ޕްރައިމް ވީޑިއޯ އިން ސްޓްރީމްކުރި ސައިފް އަލީ ޚާންގެ ވެބް ސީރީޒް "ތަންޑާވް" އެވެ.

އޭނާގެ ފިލްމަކުން ޝާހިދަށް ފުރުސަތު ލިބުނު އިރު، ޕްރޮޑިއުސްކޮށް މިދިޔަ އަހަރު އަލީ ގެނެސްދިން ފުރަތަމަ ފިލްމު "ކާލީ ޕީލީ" ގެ ބަތަލުގެ ރޯލު ކުޅުނީ ޝާހިދުގެ ކޮއްކޮ އިޝާން ހައްތަރު އެވެ. މަގްބޫލް ޚާން ޑައިރެކްޓްކުރި ފިލްމުގެ ބަތަލާ އަކީ އަނަންޔާ ޕާންޑޭ އެވެ.

ޝާހިދަށް ފްރާންސްގެ ފިލްމެއްގެ ރިމޭކް ކުޅެން ލިބުނު އިރު، އޭނާގެ އެންމެ ފަހުގެ ދެ ފިލްމަކީ ވެސް ރިމޭކްތަކެވެ. އެއީ 2019 ގެ "ކަބީރު ސިންގް" އާއި ނޮވެމްބަރުގައި ގެނެސްދޭ ހަމަޖެހިފައިވާ "ޖާޒީ" އެވެ. "ކަބީރު ސިންގް" އަކީ 2018 ގެ ތެލެގޫ ފިލްމު "އަރުޖުން ރެޑީ" ގެ ރިމޭކެކެވެ. އަދި "ޖާޒީ" އަކީ ހަމަ އެ ނަމުގައި ގެނެސްދިން 2019 ގެ ތެލެގޫ ފިލްމުގެ ރިމޭކެކެވެ.