ސިފައިންގެ މީހާއަށް އަނިޔާ ކުރި މައްސަލައިގައި ތިން މީހަކު ހައްޔަރުކޮށްފި

މާލޭގައި ސިފައިންގެ މީހަކަށް އަނިޔާ ކުރި މައްސަލައާ ގުޅިގެން ތުހުމަތުކުރެވޭ ތިން މީހަކު މިއަދު ހައްޔަރުކޮށްފި އެވެ.

އެމްއެންޑީއެފްގެ ސްޓާފް ސާޖެންޓުގެ މަގާމުގައި ހުރި ހަސަން ފަހީމަށް އަނިޔާ ކުރި މައްސަލައާ ގުޅިގެން މިއަދު ފުލުހުން ދިވެހި ތިން ފިރިހެނަކު ހައްޔަރު ކުރީ ކޯޓު އަމުރެއްގެ ދަށުންނެވެ. ފުލުހުން ބުނި ގޮތުގައި ހައްޔަރު ކުރީ 18 އަހަރުގެ މީހަކާއި 21 އަހަރުގެ މީހަކާއި 29 އަހަރުގެ މީހެކެވެ.

މި މައްސަލަ ފުލުހުން ތަހުގީގު ކުރަމުންދާއިރު، މީގެ ކުރިން ވިލިމާލޭގެ ގެސްޓްހައުސްއެއް ވެސް ބަލައިފާސްކޮށްފައިވާ ކަމަށް ފުލުހުން މިއަދު ބުންޏެވެ.

ސިފައިންގެ މީހާގެ އާއިލާއިން އޭނާއާ ހަވާލާދީ ކުރިން ބުނެފައި ވަނީ އޭނާ ރަހީނު ކުރީ ޔާގޫތު ގޯޅިން ކަމަށެވެ. އަދި އެކަން ކުރީ މާސްކު އަޅައިގެން ތިބި ދެ މީހުން ކަމަށާއި އެ މީހުން ބޭނުންވީ ފައިސާ ކަމަށް ބުނެފައިވެ އެވެ. އަދި ފަހުން ކޮޓަރިއަކަށް އޭނާ ގެންގޮސް އަނިޔާ ކުރުމަށްފަހު އައިޖީއެމްއެޗް ކައިރިއަށް އެއްލާލީ ކަމަށް ބުނެފައިވެ އެވެ.

އެހެންނަމަވެސް، ފުލުހުން މީގެ ކުރިން ބުނެފައި ވަނީ އެ ހާދިސާ އަކީ އޭނާގެ އަމިއްލަ ދިރިއުޅުމާ ގުޅުންހުރި ޒާތީ ކަމެއްގައި ޖެހުނު މައްސަލައެއް ކަމަށް ތަހުގީގުން ބެލެވޭ ކަމަށެވެ. އަދި އެކަން ކުރީ އޭނާ އަކީ ސިފައިންގެ މީހެއް ކަމަށްވާތީ ކަމަށް ބެލެވޭ ހެއްކެއް ނެތް ކަމަށެވެ.

ފަހީމުގެ މޫނުމައްޗަށާއި ބުރަކަށީގެ އެކި ތަންތަނަށް އަނިޔާ ކުރި އެވެ. އޭނާ ފެނުނު އިރު މޫނު މަތީގެ އެކި ތަންތަން ހުރީ ދުޅަވެފަ އެވެ. އަދި ގައިގެ ބައެއް ތަންތަނުން ހުރީ ލޭވެސް އައިސްފަ އެވެ.