އެސްޓީއޯއިން ވަކިވެ، މިފްކޯ މި އަހަރު އަމިއްލަ ފައިމައްޗަށް ތެދުވާނެ: ރައީސް

ސަރުކާރުގެ މަސް ކުންފުނި މިފްކޯ، އެސްޓީއޯގެ ދަށުން މި އަހަރު ވަކިކޮށް، އަމިއްލަ ފައިމައްޗަށް ތެދުވާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރައްޔިތުންގެ މަޖިލިހަށް އިއްވެވި މި އަހަރުގެ ރިޔާސީ ބަޔާނުގައި ރައީސް ވިދާޅުވީ، އެ ބަދަލު ފެންނާނީ މި އަހަރުގެ މެދުތެރޭގައި ކަމަށެވެ.

އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި މިފްކޯ ހިންގަން ފެށީ ކުރީގެ ރައީސް އަބްދުﷲ ޔާމީންގެ ސަރުކާރުގަ އެވެ. މިފްކޯގެ 300 މިލިއަން ރުފިޔާގެ ދަރަންޏާ ސަރުކާރުން ހަވާލުވެ، އެ ކުންފުނި އެސްޓީއޯގެ ދަށަށް އޮކްޓޯބަރު 2016 ގައި ގެނެސް އޭރުގެ ސަރުކާރުން ބުނީ މިފްކޯއަކީ ފައިދާ ނެރޭ ކުންފުންޏަކަށް ވާނެ ކަމަށެވެ. އެކަމަކު، މިހާތަނަށް ވެސް އެ ނަތީޖާއެއް ނުފެނެ އެވެ.

މިފްކޯގެ ކެޕޭސިޓީ އިތުރު ކުރާނެ ވާހަކަ މިދިޔަ އަހަރުގެ ރިޔާސީ ބަޔާނުގައި ވެސް ވިދާޅުވިކަން ފާހަގަކުރައްވަމުން ރައީސް އިބްރާހިމް މުހައްމަދު ސޯލިހު މި އަހަރުގެ ރިޔާސީ ބަޔާނުގައި ވިދާޅުވީ، މިދިޔަ 15 އަހަރުގެ ތެރޭގައި އެ ކުންފުންޏަށް އެންމެ ގިނަ މަސް ކިރުވީ މިދިޔަ އަހަރު ކަމަށެވެ.

ރައީސް ވިދާޅުވިގޮތުގައި، މިފްކޯ އިން ފައިސާ ލިބޭނެ ކަމުގެ ޔަގީންކަން މަސްވެރިންނަށް މިހާރު އޮންނާނެ އެވެ. އަދި ވިދާޅުވީ، އަންނަ މަހުގެ ފުރަތަމަ ހަފުތާ އިން ފެށިގެން އެ ކުންފުންޏަށް ދެން މަސް ގަންނަ އަގު ބޮޑުވާނެ ކަމަށެވެ.

"ދެން މިފްކޯ އިން މަސް ގަންނާނީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލާ އެއްގޮތަށް. ދުނިޔޭގެ ބާޒާރުގައި ބޮޑު އަގު ލިބޭ ނަމަ މިފްކޯ އަށް ގަންނަ މަހުގެ އަގު ބޮޑުވާނެ،" ރައީސް ވިދާޅުވި އެވެ.

މި ފަހަރުގެ ރިޔާސީ ބަޔާނުގައި، 118 ދޯންޏެއްގައި މަސް ފިނިކުރާ ނިޒާމު ހަރުކުރުމަށް 59 މިލިއަން ރުފިޔާގެ ލުއި ލޯނު މި އަހަރު ދޫކުރާނެކަން ވެސް ރައީސް އިއުލާނު ކުރެއްވި އެވެ.