އެކްސިޑެންޓްގައި ޒަހަމްވި އީމާން ނިޔާވެއްޖެ: އޭޑީކޭ

ހުޅުމާލޭގައި ބަންޕަރެއްގެ މައްޗަށް އެރިތަނުން ސައިކަލް ކަހާލައިގެން އާދިއްތަ ދުވަހުގެ ހަވީރު ވެއްޓި ސީރިއަސް އަނިޔާތަކެއް ލިބުނު އައިމިނަތު އީމާން ވެންޓިލޭޓަރުގައި ބާއްވާފައި އޮންނަތާ ގިނައިރުތަކެއް ފަހުން މީގެ އިރުކޮޅެއް ކުރިން ނިޔާވެއްޖެ އެވެ.

އޭނާގެ މަރު އޭޑީކޭ އިން ކަށަވަރުކޮށްދެމުން ބުނި ގޮތުގައި، މަރުވީ މިއަދު ހެނދުނު 7:45ހާ އިރު އެވެ.

އިމާން މަރުވި ކަމަށް އިއްޔެ ހެނދުނު އަޑުތައް ފެތުރިފައި އޮތް ނަމަވެސް، އޭޑީކޭ އިން އިއްޔެ ބުނެފައި ވަނީ މަރުވި ކަމަށް ނިންމާފައި ނުވާ ކަމަށެވެ. އެކަމަކު 29 އަހަރުގެ އީމާން މަރުވި ވާހަކަތަކާ އެކު އޭޑީކޭ ދޮށަށް ދެ ފަހަރެއްގެ މަތިން އޭނާގެ އާއިލާ އާއި ރަހުމަތްތެރިން ޒިޔާރަތްކުރި އެވެ.

ނިރޮޅުމަގުން ދެވަނަ ފިޔަވަހީގެ ބްރިޖުތައް ކައިރީގައި ހިނގި އެކްސިޑެންޓުގައި ސައިކަލާ އެކު ވެއްޓި އަނިޔާވި އިމާންއަކީ މާލޭ ސިޓީ ކައުންސިލްގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ ވިލިމާލޭގެ ދާއިރާގެ މެމްބަރެވެ.

އެކްސިޑެންޓުގައި އަނިޔާވީ އީމާންގެ ބޮލަށެވެ. ހަށިގަނޑުގެ ބޭރުން އަނިޔާގެ ނިޝާނެއް ނެތަސް ބޯ ފަޅައިގެން ގޮސް އޭނާގެ ސިކުނޑި ވެސް ދުޅަވެފައި އޮތްއިރު އޭނާ ނިޔާވީ އޭޑީކޭ ހޮސްޕިޓަލުގެ އައިސީޔޫގައި ފަރުވާދެމުންދަނިކޮށެވެ.

އީމާންގެ ސަލާމަތްވާނެ ކަމުގެ އުއްމީދު ކަނޑާލައި ވެންޓިލޭޓަރުން ނަގަން ނިންމީ އޭނާގެ ހާލަތަށް އެއްވެސް ބަދަލު އައިސްފައިނުވާތީ އެވެ.