އުދުހުން މަނާ ސަރަހައްދަކީ މުޅި ދުނިޔެއަށް ނުރައްކަލެއް: ޕުޓިން

ޔޫކްރޭންގެ ވައިގެ ސަރަހައްދަކީ އުދުހުން މަނާ ސަރަހައްދެއް ކަމަށް، އެއްވެސް ގައުމަކުން ކަނޑައަޅައިފި ނަމަ، އެއީ މުޅި ދުނިޔެއަށް ކުރިމަތިވާ ނުރައްކަލަކަށް ވެގެންދާނެ ކަމަށް ރަޝިޔާގެ ރައީސް ލަޑިމިއާ ޕުޓިން އިންޒާރު ކުރައްވައިފި އެވެ.

ޕުޓިން މި މޭރުމުން މުޅި ދުނިޔެ އަށް އިންޒާރު ކުރެއްވީ، ޔޫކްރޭނަކީ އުދުހުން މަނާ ސަރަހައްދެއް ކަމަށް ކަނޑައަޅަދިނުމަށް އެދި، ވިލާތުގެ އިއްތިހާދަށާއި ނޭޓޯ އަށް ޔޫކްރޭނުން ހުށަހެޅުމުން، އެ ދެ ޖަމާއަތުން ވެސް އެކަމަށް އިންކާރުކޮށްފައިވާ ދަނޑިވަޅެއްގަ އެވެ.

ޕުޓިން ވިދާޅުވީ، ޔޫކްރޭނަކީ އުދުހުން މަނާ ސަރަހައްދެއް ކަމަށް ކަނޑައަޅަން އެއްވެސް ގައުމަކުން މަސައްކަތް ކޮށްފި ނަމަ، ރަޝިޔާ އިން ދެކޭނީ، ރަޝިޔާ ސިފައިންނާއި ޔޫކްރޭން ސިފައިންނާ ދެމެދު މިހާރު ހިނގާ ހަނގުރާމައިގެ އެ ގައުމެއް ވަންނަނީ ކަމަށެވެ.

"އެ އަމާޒަށް އެއްވެސް ބަޔަކު ހަރަކާތްތެރިވާ ނަމަ، އަހަރެމެން ދެކޭނީ އެ ގައުމަކުން ހަނގުރާމައިގެ ތެރެއަށް ސީދާ ގޮތެއްގައި ވަންނަނީ ކަމަށް. އެކަމުގެ ސަބަބުން ހަމައެކަނި ޔޫރަޕެއް ނޫން، މުޅި ދުނިޔެ ވެސް ކުރިމަތިލާންޖެހޭނީ ވަރަށް ނުރައްކާތެރި ފަނާކުރަނިވި ނަތީޖާއަކާ،" ރަޝިޔާގެ ގައުމީ އެއާލައިން އެއޮރޯފްލޮޓްގެ މުވައްޒަފުންނާ މޮސްކޯގެ ބޭރުގައި ބައްދަލުކުރައްވަމުން ޕުޓިން ވިދާޅުވި އެވެ.

އުދުހުން މަނާ ސަރަހައްދެއް ގާއިމުކުރުމަށް ނޭޓޯ އިން ދެކޮޅު ހެދުމާ ގުޅިގެން ޔޫކްރޭންގެ ރައީސް ޒެލެންސްކީ ވިދާޅުވީ އެއީ ޔޫކްރޭގެ ސަހަރުތަކާއި އަވަށްތަކަށް ރަޝިޔާ ސިފައިން އިތުރަށް ބޮން އެޅުމަށް ދިން ފެހި ސިގްނަލެއް ކަމަށެވެ.

އަދި "މިއަދަށް ފަހުގައި މި ހަނގުރާމައިގެ ތެރޭގައި މަރުވެގެންދާ ކޮންމެ މީހަކު މަރުވެގެން އެދަނީ ކަލޭމެންގެ (ނޭޓޯގެ) ސަބަބުން،" ޒެލެންސްކީ ވިދާޅުވި އެވެ.

ޔޫކްރޭންގެ ހަނގުރާމައާ ބެހޭ ގޮތުން ޕުޓިން ވިދާޅުވީ އޭނާ މަސައްކަތް ކުރައްވަނީ، ޔޫކްރޭންގައި ދިރިއުޅޭ ރަޝިޔާ ބަހުން ވާހަކަދައްކާ ދަރިކޮޅުގެ މީހުން ހިމާޔަތް ކުރުމަށެވެ. އަދި ޔޫކްރޭނުގެ އަސްކަރީ ބާރުވެރިކަން ނައްތާލައި ނާޒީ ހަރަކާތްތައް ޔޫކްރޭނުން ނައްތައިލުމަށް ކަމަށް ވެސް ޕުޓިން ވިދާޅުވި އެވެ.

ރަޝިޔާ އަށް ދަތިކުރުމަށް ހުޅަނގުގެ ގައުމުތަކުން އަޅާފައިވާ ފިޔަވަޅުތަކާ ގުޅޭ ގޮތުން ޕުޓިން ވިދާޅުވީ އެއީ ރަޝިޔާއާ ދެކޮޅަށް ހަނގުރާމަ އިއުލާން ކުރުން ފަދަ ކަމެއް ކަމަށެވެ. އެހެން ނަމަވެސް އެ ފިޔަވަޅުތަކުން އެފަދަ ކަމެއް ހާސިލުނުވާނެ ކަމަށް އޭނާ ވިދާޅުވި އެވެ.

ޔޫކްރޭންގައި މިހާރު ކުރިއަށްދާ ހަމަލާތަކާ ގުޅޭ ގޮތުން ޕުޓިން ވިދާޅުވީ ރަޝިޔާގެ ހާއްސަ ފައުޖުގެ މެމްބަރުން ޔޫކްރޭންގެ އެތެރެއަށް އަދި ނުފޮނުވާ ކަމަށެވެ. އަދި އެފަދަ ކަމެއް ކުރަން ރާވާފައިވެސް ނެތް ކަމަށް އޭނާ ވިދާޅުވި އެވެ.

"އަހަރެމެންގެ އަސްކަރިއްޔާގައި ހިމެނޭ ސިފައިން ހުރިހާ ވާޖިބުތަކެއް އަދާކުރާނެ. ސިފައިންގެ ގާބިލުކަމާ ކަމާ މެދު ކުޑަވެސް ޝައްކެއް ނެތް. ހުރިހާ ކަމެއްވެސް ކުރިއަށް ދަނީ ރޭވުމާ އެއްގޮތަށް،" ޕުޓިން ވިދާޅުވި އެވެ.

ރަޝިޔާގައި އަސްކަރީ ގާނޫނު (މާޝަލް ލޯ) ތަންފީޒުކުރަން އުޅޭ ކަމަށް ހުޅަނގުގެ ގައުމުތަކުން ދައްކާ ވާހަކަތަކަށް ވެސް ޕުޓިން ރައްދު ދެއްވި އެވެ. އޭނާ ވިދާޅުވީ އަސްކަރީ ގާނޫނު ހިންގަނީ ބިދޭސީ ބާރަކުން ގައުމާ ދެކޮޅަށް އުދުވާނީ ހަމަލާއެއް ދޭ ހާލަތްތަކުގައި ކަމަށާއި، ރަޝިޔާގައި އެފަދަ ކަމެއް ނެތް ކަމަށެވެ.