ލަންކާ މުޒާހަރާ އަށް ބަޑިޖެހުމުން އެކަކު މަރުވެ 27 މީހުން ޒަޚަމްވެއްޖެ

ކޮލަމްބޯ (އެޕްރީލް 19) - ލަންކާ ސަރުކާރާ ދެކޮޅަށް މިހާރު ފަށާފައިވާ މުޒާހަރާތަކުގައި ރަމްބުއްކަނާގައި ފުލުހުން ބަޑިޖެހުމުގެ ސަބަބުން އެކަކު މަރުވެ 27 މީހުން މިއަދު ޒަޚަމްވެއްޖެ އެވެ.

މިއަދު ހަވީރު ހިނގި އެ ހާދިސާގައި މީހަކު މަރުވެފައި ވަނީ ތެލުގެ އަގުބޮޑުވުމާ ގުޅިގެން ރަމްބުއްކަނާގައި ކުރިއަށް ގެންދިޔަ މުޒާހަރާތައް ކޮންޓްރޯލް ކުރުމަށް ފުލުހުން ކަރުނަ ގޭސް ޖަހައި އަދި ފަހުން ބަޑިޖެހުމުގެ ސަބަބުންނެވެ. ޒަޚަމްވި މީހުން ވަނީ ކެގާލީ އަދި ރަމްބުއްކަނާ ހޮސްޕިޓަލަށް ގެންގޮސް ފަރުވާ ދޭން ފަށައިފަ އެވެ. މަރުވެފައި ވަނީ ކެގާލީ ހޮސްޕިޓަލުގައި ފަރުވާ ދެމުން ދިޔަ މީހެކެވެ. އިތުރު ދެ މީހެއްގެ ހާލު ސީރިއަސް ކަމަށް އެ ހޮސްޕިޓަލުން ބުނެ އެވެ. ފުލުހުންގެ ތެރޭން ވެސް 10 މީހުން ވަނީ ޒަޚަމްވެފަ އެވެ.

ފުލުހުން ވަނީ ރަމްބުއްކަނާގައި ބަޑިޖެހި ކަމަށް ބުނެފަ އެވެ. ބަޑި ޖަހަން ޖެހުނީ ރަމްބުއްކަނާ ރެއިލްވޭ ކްރޮސިން އަށް މިއަދު ހެނދުނުއްސުރެ ހުރަސް އަޅައިގެން ތިބި ބަޔަކު ދުރަށް ޖައްސަން ކަމަށް ފުލުހުން ބުންޏެވެ. އަދި ބަޑިޖެހީ އެތައް ފަހަރަކު އިންޒާރު ދިނުމަށް ފަހު ކަމަށް ވެސް ބުންޏެވެ. ފުލުހުން ބުނީ ބަޑިޖެހުމުގެ ކުރިން އެ ގްރޫޕުން ވަނީ ތެޔޮ ބައުޒަރެއްގައި ރޯކޮށްލަން މަސައްކަތް ކޮށްފައި ކަމަށެވެ.

ރަމްބުއްކަނާގެ ބައެއް ހިސާބުތަކުގައި މިހާރު ވަނީ ކާފިއު ހިންގައިފަ އެވެ.