ސީއެސްސީގެ ރައީސްގެ ކުރީގެ ބާރުތައް އަލުން ދިނުމަށް ފާސްކޮށްފި

ސިވިލް ސާވިސް ކޮމިޝަން (ސީއެސްސީ) ގެ ރައީސްގެ މަސްއޫލިއްޔަތުތައް ކުރިން އޮތް ގޮތަށް ބަދަލުކޮށް ސިވިލް ސާވިސްގެ ގާނޫނަށް އިސްލާހު ގެނައުމުގެ ބިލް ރައްޔިތުންގެ މަޖިލީހުން މިއަދު ފާސްކޮށްފި އެވެ.

މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) ހުށަހެޅުއްވި ބިލް މަޖިލީހުގެ މިނިވަން މުއައްސަސާތަކާބެހޭ ކޮމިޓީން ދިރާސާކޮށް ހުށަހެޅި ރިޕޯޓް ފާސްކުރުމަށް މަޖިލީހުގެ މިއަދުގެ ޖަލްސާގައި 44 މެންބަރުން ވޯޓުދިނެވެ.

ކޮމިޓީން ނިންމާފައިވަނީ ސަރުކާރުން ބިލު ހުށަހެޅި ގޮތަށް އެއްވެސް ބަދަލެއް ނުގެނެސް ފާސްކުރުމަށެވެ.

ސިވިލް ސާވިސްގެ ގާނޫނަށް އިސްލާހު ގެނައީ މީގެ ކުރިން މަޖިލީހުން އެ ގާނޫނަށް ގެނައި ހަވަނަ އިސްލާހުގައި ގާނޫނުގެ 17 ވަނަ މާއްދާ އެއްކޮށް އިސްލާހު ކުރުމުގެ ތެރޭގައި, ސީއެސްސީގެ ރައީސްގެ މަސްއޫލިއްޔަތު ބަޔާން ކުރުމާ އެކު ކޮމިޝަނުގެ ރައީސް މަސްއޫލިއްޔަތު އަދާކުރުމަށް ނުކުޅެދިއްޖެ ހާލަތެއްގައި ނުވަތަ އުޒުރުވެރިވެއްޖެ ހާލަތެއްގައި ނުވަތަ މަގާމު ހުސްވެއްޖެ ހާލަތެއްގައި އެ މަގާމު ވަގުތީ ގޮތުން އަދާކުރާނީ ކޮމިޝަނުގެ ނައިބު ރައީސްކަމަށް ބަޔާންކޮށްފައިވަނިކޮށް އެކަން އެއްކޮށް އުނިކޮށްފައިވާތީ އެވެ.

ސިވިލް ސާވިސްގެ ގާނޫނަށް ގެނައި އިސްލާހުގައި އެ ކޮމިޝަންގެ ރައީސްގެ މަސްއޫލިއްޔަތުތަކުގެ ގޮތުގައި ކޮމިޝަންގެ މަސްއޫލިއްޔަތު އަދާކުރުމަށް ބޭނުންވާ ލަފަޔާއި އިރުޝާދު ދިނުމާއި ކޮމިޝަނުގެ ބައްދަލުވުންތަކުގެ އެޖެންޑާ ކަނޑައަޅައި ބާއްވާނެ ތާރީހު ކަނޑައެޅުންފަދަ ކަންކަން ނިންމުން ހިމެނެ އެވެ. އަދި ހަމަ އެހެންމެ ބައްދަލުވުންތަކުގެ ރިޔާސަތު ބެލެހެއްޓުމާއި ކޮމިޝަންގެ ނިންމުންތައް ތަންފީޒުކުރުމާއި އިދާރީ އެކިއެކި މަސައްކަތްތައް ހިންގައި ބެލެހެއްޓުމާގުޅޭ އުސޫލު ކަނޑައެޅުމާއި އެ އުސޫލާއި އެއްގޮތަށް ކަންކަން ކުރިއަށްދޭތޯ ބެލުން ހިމެނެ އެވެ.

މީގެ އިތުރުން ކޮމިޝަނުގެ ރައީސް މަސްއޫލިއްޔަތު އަދާކުރުމަށް ނުކުޅެދިއްޖެ ހާލަތެއްގައި ނުވަތަ އުޒުރުވެރިވެއްޖެ ހާލަތެއްގައި ނުވަތަ މަގާމު ހުސްވެއްޖެ ހާލަތެއްގައި, އެ މަގާމު ވަގުތީ ގޮތުން އަދާކުރާނީ ކޮމިޝަނުގެ ނައިބު ރައީސް ކަމަށް އިސްލާހުގައި ބަޔާންކޮށްފައިވެ އެވެ.