އެކައުންޓްގައި ހުރި ވަރަށްވުރެ އިތުރަށް ދޫކުރާ ފައިސާ އަކީ ދަރަންޏެއް، ގިފްޓެއް ނޫން!

އެކަައުންޓްގައި ހުރި ވަރަށް ވުރެ އިތުރަށް ފައިސާ ނެގުމަކީ ނުވަތަ ވިޔަފާރި ކުރުމަކީ ގިނަ މީހުންނަށް ނޭނގި ނަމަވެސް ކުރެވޭ ކަމެކެވެ. އޯވްޑްރާފްޓްގެ ގޮތުގައި މިގޮތަށް ފައިސާ ބޭނުންކޮށްފައި ވަނިކޮށް އެކައުންޓަށް އެހެން ފައިސާއެއް ވަދެއްޖެ ނަމަ، ކުރީގެ ބައި ބޭންކުން އަތުލާނެ އެވެ.

އެކަމަކު އެ ފައިސާ ބޭންކަށް ނުލިބިއްޖެ ނަމަ އެއީ ދަރަންޏެއްތޯ އޮތް ސުވާލަށް ހައި ކޯޓުން އިއްޔެ ކުރި ހުކުމަކުން ފުރަތަމަ ފަހަރަށް ވަނީ ޖަވާބުދީފަ އެވެ. އެގޮތަށް ނިންމީ ރައީސް އޮފީހުގެ ޗީފް އޮފް ސްޓާފް އަލީ ޒާހިރުގެ ނަމުގައި މޮރިޝަސް ކޮމާޝަލް ބޭންކްގައި އޮތް އެކައުންޓަކުން 2018 ވަނަ އަހަރު އޭނާ ދޫކުރި 2.3 މިލިއަން ރުފިޔާގެ ޗެކެއްގެ މައްސަލައިގަ އެވެ.

އަލީ ޒާހިރުގެ އެކައުންޓަށް އަލީ ޒާހިރުގެ އެކައުންޓަށް ޖަމާކުރީ ރައީސް އޮފީހުގެ އަންޑަ ސެކްރެޓަރީ އަދި ހައްޖު ކޯޕަރޭޝަންގެ ޗެއާމަން އަބްދުﷲ ނަސީރު މުހައްމަދުގެ ޗެކެކެވެ. އެކައުންޓަކުން 4.1 މިލިއަން ރުފިޔާގެ ޗެކެއް ޖަމާކުރުމަށް ފަހު އަލީ ޒާހިރުގެ އެކައުންޓުން 2.3 މިލިއަން ރުފިޔާގެ ޗެކެއް ދިނީ ވެސް އަބްދުﷲ ނަސީރު މުހައްމަދަށެވެ.

އަލީ ޒާހިރު ޗެކް ދޫކުރެއްވީ އޭނާގެ އެކައުންޓަށް ހަތަރު މިލިއަން ރުފިޔާ ޖަމާވިކަމުގެ ޑިޕޮޒިޓް ސްލިޕެއް ލިބުމުންނެވެ. އެއަށް ބަރޯސާވެ، އޭނާ ޗެކް ދޫކުރެއްވިޔަސް، އޭރު އެކައުންޓަށް އެ ފައިސާ ޖަމައެއްނުވެ އެވެ. އެކަމަކު ބޭންކުން އެ ޗެކަށްވާ 2.3 މިލިއަން ރުފިޔާ ދޫކުރި އެވެ. ޖަމާކުރުމަށް ހުށަހެޅި ޗެކްގެ އެކައުންޓްގައި ފައިސާ ނެތްކަން އެނގުމުން ބޭންކުން އަލީ ޒާހިރަށް އެންގީ އަލީ ޒާހިރުގެ އެކައުންޓުން ދޫކުރި ފައިސާ ބޭންކަށް ދެއްކުމަށެވެ. އެހެންވެ އޭނާ އެ މައްސަލަ ކޯޓަށް ހުށަހެޅުއްވީ ބޭންކުގެ އެންގުން ބާތިލް ކުރުމަށެވެ.

އެކައުންޓްގައި ނެތަސް، ފައިސާ ދެވިދާނެ، އެއީ ދަރަންޏެއް

ހައި ކޯޓުގެ ދެ ފަނޑިޔާރުންގެ އަޣުލަބިއްޔަތުން އިއްޔެ ކުރި ހުކުމުގައިވަނީ އެކައުންޓްގައި ފައިސާ ނެތަސް، އޯވަޑްރާފްޓެއްގެ ގޮތުގައި ފައިސާ ދޫކުރުމުގެ ބާރު ބޭންކަށް އޮންނަ ކަމަށެވެ. އަދި ބޭންކްތަކާއި ކަސްޓަމަރުންނާ ދެމެދު އެއްބަސްވުމެއް އޮވެގެން ނުވަތަ އެއްބަސްވުމެއް ނެތި ވެސް، އެކަން އެގޮތަށް ކުރެވިދާނެ ކަމަށާއި އެ ހާލަތުގައި އިތުރަށް ދޫކުރި ފައިސާ އަނބުރާ ހޯދުމުގެ ބާރު ބޭންކަށް ލިބިގެންވާ ކަމަށް އެ ހުކުމުގައިވެ އެވެ.

"އޯވަޑްރާފްޓްގެ ގޮތުގައި ނެގޭ ފައިސާއަކީ ދަރަންޏަށް ނެގޭ ފަައިސާއެކެވެ. ނުވަތަ ލޯނުގެ ގޮތުގައި ނެގޭ ފައިސާ އެކެވެ." ބޭންކިން ގާނޫނުތަކަށް ހަވާލާދެއްވައި، ފަނޑިޔާރު ހަސަން ޝަފީއުގެ ރައުޔުގައިވެ އެވެ.

ފަނޑިޔާރު ޝަފީއު ލިޔުއްވާފައިވާ ގޮތުން އޯވާޑްރާފްޓްގެ ގޮތުގައި ދޫކުރާ ފައިސާއަކީ އެ މީހަކަށް ބޭންކުން ދޭ "ފްރީ ގިފްޓެއް" ނޫނެވެ. އެހެންވެ، އަލީ ޒާހިރުގެ އެކައުންޓުގައި ފައިސާ ނެތީސް، ބޭންކުން އޯވާޑްރާފްޓްގެ ގޮތުގައި ދޫކުރި 2.3 މިލިއަން ރުފިޔާ އޭނާގެ ފަރާތުން ބޭންކަށް ދައްކަން ޖެހޭނެ ކަމަށް ހުކުމުގައިވެ އެވެ.

ފަނޑިޔާރު ޝަފީއުގެ ރައުޔަށް ތާއީދު ކުރެއްވި، ރިޔާސަތު ބެލެހެއްޓެވި ފަނޑިޔާރު ޝުއައިބު ހުސެއިން ޒަކަރިއްޔާގެ ރައުޔުގައިވަނީ ރާއްޖޭގެ ޗެކާ ބެހޭ ގާނޫނު އޮތްގޮތުން ޗެކެއް ދޫކުރާއިރު އެކައުންޓްގައި ފައިސާ ނެތަސް، އޯވްޑްރާފްޓެއްގެ ގޮތުގައި ފައިސާ ދޫކުރުމާއި ނުކުރުމުގެ ބާރު ބޭންކްތަކަށް އޮންނާނެ ކަމަށެވެ. އަދި އެވޯޑްރާފްޓްގެ ގޮތުގައި ފައިސާ ދޫކުރުމުގެ ބާރު ބޭންކަށް އޮންނާތީ އެ ފައިސާ އަނބުރާ ބޭންކަށް ހޯދުމުގެ ބާރު ވެސް ބޭންކަށް އޮންނާނެ ކަމަށް އޭނާގެ ރައުޔުގައިވެ އެވެ.

ތަފާތުވި ރައުޔު

މިކަމުގައި ރައުޔު ތަފާތުވީ ފަނޑިޔާރު މުހައްމަދު ފައިސަލެވެ. ޗެކާބެހޭ ގާނޫނުގެ އެހެން މާއްދާއަކާ ހަވާލާދެއްވައި، އޭނާ ވިދާޅުވެފައިވަނީ އެކައުންޓްގައި ފައިސާ ނެތް ނަމަ، ޗެކަށް ފައިސާ ދޫކުރުމުގެ ބާރު ބޭންކަށް ނޯންނާނެ ކަމަށެވެ.

ފަނޑިޔާރު ފައިސަލްގެ ރައުޔުގައިވަނީ އަލީ ޒާހިރު ޗެކް ދޫކުރީ އޭނާގެ އެކައުންޓަށް ފައިސާ ޖަމާވެފައިވާ ކަމަށް ބުނެ ބޭންކުން ދިން ލިޔުމަށް އިތުބާރު ކޮށްގެން ކަމަށްވާތީ ޗެކަށް ފައިސާ ދޫކުރުމުގައި ބޭންކްގެ އިހުމާލު އެބައޮތް ކަމަށެވެ. އަދި އެ ފައިސާ އެހެން މީހެއްގެ އެކައުންޓަށް ޖަމާވެ، އޭނާ ފައިސާ ބޭނުން ކޮށްފައިވާއިރު އެހެން މީހަކު ބޭނުންކުރި ފައިސާއަކަށް އަލީ ޒާހިރު ނަގަން ނުޖެހޭނެ ކަމަށް ފަނޑިޔާރު ފައިސަލް ލިޔުއްވާފައިވެ އެވެ.

އޭނާގެ ރައުޔަކީ ބޭންކުގެ އެންގުން ބާތިލް ކުރުމަށެވެ.

އެހެން ނަމަވެސް އަނެއް ދެ ފަނޑިޔާރުންގެ އަޣުލަބިއްޔަތުން ކުރެއްވި ހުކުމުގައިވަނީ ބޭންކުގެ އެންގުން ބާތިލް ނުކުރެވޭނެ ކަމަށެވެ. އެހެންވެ، ބޭންކާ އެއްކޮޅަށް ސިވިލް ކޯޓުން ކުރި ހުކުމް ދަމަހައްޓާ ކަމަށް އެ ހުކުމުގައިވެ އެވެ.